Ali mektepte oqughan köpligen oqughuchilar pushayman qilmaqta


2006.08.17
Share on WhatsApp
Share on WhatsApp

"Xitay yashlar géziti" teripidin élip bérilghan bu qétimqi tekshürüshtin melum bolushiche, mezkur tekshürüsh ziyaritini qobul qilghan 9000 gha yéqin aliy mektep oqughan oqughuchilarning 40% ke yéqini özlirining aliy mektepte oqughanliqidin qattiq pushayman qilghan. Hemde 50% tin artuqi " nurghun pul xejlep aliy mektepte oqughan bilen, héchbir kéreklik nerse öginelmiduq. Oqughan nersilerning emeliy ehmiyiti bolmidi" dep qaqshap, özlirining aliy mektep dersliklirige intayin narazi ikenlikini bildürgen.

Pashaymaning sewebi

"Xitay yashlar géziti "ning mezkur tekshürüsh doklatida körsitilishiche, 40% ke yéqin ali mektep püttürgen oqughuchining pushayman qilishidiki seweb, mektep püttürgendin kéyin xizmet tapalmaywatqanliqi iken.

Xitay ma'arip ministirliqining yéqinda élan qilghan sanliq melumatida körsitilishiche, 2001 ‏- yili xitaydiki aliy mektep püttürgenler sani 1 milyon 150 ming, 2003 ‏- yili 2 milyon 120 ming, 2005 ‏- yili 3 milyon 300 ming bolup, 2006 ‏- yiligha kelgende, bu san 4 milyon 130 mingdin ashqan. Démek yéqinqi yillardin buyan xitaydiki aliy mektep püttürgen oqughuchilar sani izchil halda nahayiti téz sür'ette köpiyishke bashlighan, shuning bilen bir waqitta, aliy mektep püttürgen oqughuchilarning xizmet tépish mesilisimu barghanséri tesliship ketken.

Ma'ashqa bolghan telep barghanséri töwenlimekte

Munasiwetlik melumatlarda körsitilishiche, deslepte xitaydiki herqaysi aliy mektepler kéngeytip oqughuchi qobul qilish siyasitini yolgha qoyushtin burun, aliy mektep püttürgen oqughuchilarning ayliq ma'ashqa bolghan telipi 2500 yüendin 3000 yüen'giche idi. Lékin 2005 ‏- yiligha kelgende mektep püttürüp xizmet tapalmay yürgenlerning ayliq ma'ashqa bolghan telipi barghanséri töwenlep, 1000 yüen, 800 yüen hetta 500 yüen'gimu chüshüp qalghan.

Uyghur élidiki ehwal téximu éghir

Radi'omizning heqsiz léniyisige kéliwatqan téléfonlardin melum bolushiche, hazir Uyghur élide aliy mektep püttürgen Uyghur oqughuchilirining mektep püttürgendin kéyin xizmet tapalmasliqi, mezkur jaydiki xitay oqughuchilirigha qarighanda téximu éghir bolmaqta, shundaqla aliy mektep oqughan Uyghur oqughuchiliri arisida pushayman qilish ehwali téximu éghir bolghan. Bu xil ehwal Uyghur élining yéziliridiki déhqan ata -anilarning béshini téximu qattiq qaturghan.

Ziyaritimizni qobul qilghan ghulja rayonidiki bir déhqan ayal, déhqanlarning öz perzentlirini oqutush üchün nurghun pul serip qilidighanliqini, lékin mektep püttürüp kelgen balilarning xizmetke orunlishalmay yürgenlikini sözlep kélip, bir qisim ata -anilarningmu oqughuchilargha oxshash pushaymanda ikenlikini bildürdi.

Ziyaritimizni qobul qilghan bu déhqan ana, söhbet jeryanida yene baliliri aliy mektep püttürgendin kéyin meyli xizmet tapalisun yaki tapalmisun, özi ming japa tartsimu yenila ularni oqutmaqchi boluwatqanliqini éytti. (Méhriban)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.