Ismayil semet xitay hökömiti teripidin ölümge höküm qilindi


2006-04-06
Share

Ürümchi sheherlik xelq ottura sotning 2005 yili 10‏-ayning 31‏- küni chiqarghan hökümnamisida, ismayil qari weya ismayil semet döletni parchilash jinayiti, qanunsiz partlatquch yasash jinayiti ötkezdi dep eyiblen'gen.

Hökümet tereptin eyiblesh

Ürümchi sheherlik xelq teptish mehkimisi, ismayil semetni, 1997‏- yili 1‏- ayda abduqadir emet we hesen mexsum qatarliq 26 adem bilen birge se'udi erebistan'gha barghan, hesen mexsum, abduqadir emet we ismayil semetler " sherqiy türkistanni musteqil qilish mesilisi toghrisida körüshken, 1997‏- yili 3‏- ayda pakistanning rawalpindi shehiride hesen mexsum, abduqadir emet qatarliq 9 kishi bilen birge" sherqiy türkistan islam partiysi" ni qurup chiqqan hemde mujahit terbiyilesh üchün 1997‏-yili 5‏- ayda tunji türkümdiki 11 ademni afghanistan'gha terbiyilesh üchün élip barghan dep eyibligen.

Teptish mehkimisi shundaqla, ismayil semetning 1997‏- yili 9‏- ayda afghanistanda ximiyiwiy partlitish qurulmisi yasashni ögitidighan" liza" lagirini qurup, 100 ge yéqin ademni terbiyiligenlikini hemde shu yili 10‏-ayda hesen mexsumning orunlashturushi bilen pakistanning islam'abad shehiride ikki qararda 20 ge yéqin ademge partlitish qurulmisi yasashni ögitip, ularni yette türkümge bölüp, xitaygha térrorluq pilanini ijra qilishqa kirgüzgenlikini ilgiri sürgen.

Teptish mehkimisi yene ismayil semetni, 1998‏- yili 3‏- ayning 19‏-küni " sherqiy türkistan islam partiyisi" ning wekili süpitide, qirghizistanning béshkek shehiride " sherqiy türkistan azatliq teshkilati" ning wekili memtimin hezret qatarliqlar bilen körüshüp yéghin échip, ikki teshkilatni birleshtürüsh toghrisida meslihetleshken hemde birlikke kélip " sherqiy türkistan islam partiyisi" bilen " sherqiy türkistan azatliq teshkilati" ning birleshkenliki toghrisida kélishim imzalighan, dep eyibligen.

Jawabkarning inkasi

Lékin, sotning hökümnamisidimu bayan qilin'ghandek, ismayil semet pütün eyibleshlerni ret qilip, eybnamida békitilgen pakitlar pütünley xata, men gunahisz, dégen.

Ismayil semetning aqlighuchisi" jawabkar ismayil semet qanunsiz qoral-yaragh, oq-dora, partlatquch yasighan dégen pakitni békitishning delil-ispati toluq emes. Guwahchilarning guwahliqi bilen jawabkarning iqrari mas kelmeydu. Shunga ularning guwahliqini békitishke bolmaydu, dep ismayil semetni aqlighan.

Hökümnamida ismayil semetning 1997‏- yili 3‏- ayda hesen mexsum we abduqadir qatarliq toqquz kishi bilen birge abdu qadir emetning pakistanning rawalpindi shehiridiki öyide ötküzülgen " sherqiy türkistan islam partiyisi" ni qurush yéghinigha qatnashqanliqi ilgiri sürülgen. Emma abdu qadir emet bilen ötküzgen téléfon söhbtimizde u ismayil semetni tonumaydighanliqini, bundaq bir yéghinning pakistanning rawalpindi shehiride ötküzülgenlikidinmu qet'iy xewiri yoqliqini bildürdi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet