Istanbuldiki Uyghurlar yighilip roza héytni xushal ‏- xuram ötküzdi

• Muxbirimiz arislanning bu heqtiki toluq melumati
• Download story audio

Roza héyt musulmanlarning dini bayrimi bolup her yili ramizan éyida 30 kun roza tutup bolghandin kéyin ötküzülidu. Roza héyt bolsa Uyghurlarning dini bayrimi bolupla qalmastin belki milliy en'eniwi bayrimi. Ulugh ramizan éyi axirliship roza héytmu yétip keldi. Pütkül dunyadiki musulmanlar bu héytni tentenilik qizghin keypiyat ichide ötküzmekte. Ana wetinidin ayrilip istanbulda yashawatqan Uyghurlarmu bir orun'gha yighilip roza héyt bayrimini xushal - xuram ötküzdi.

9 ‏- Ayning 13 ‏- küni istanbuldiki sherqiy türkistan teshkilat we jem'iyetlerning uyushturushi bilen istanbulda yashawatqan Uyghurlar sherqiy türkistan wexpige yighilip roza héytni xushal ‏- xuram ötküzdi.

Sherqiy türkistan wexpi, sherqiy türkistan ma'arip jem'iyiti, sherqiy türkistan yashlar jem'iyiti, sherqiy türkistan hemkarliq jem'iyiti, qatar 4 teshkilat birlikte roza héytni tebriklesh pa'aliyiti uyushturup istanbuldiki Uyghurlarni birlik we inaqliqqa chaqiriq qildi. Pa'aliyet sherqiy türkistan wexpide ötküzülgen bolup shu yerning waqti sa'et 14:00 de bashlinip 17:00 de axirlashti.

Pa'aliyetke 600 din artuq kishi qatnashqan bolup sherqiy türksitan wexpi xadimliridin kamal ependi riyasetchilik qildi. Qur'an oqush bilen bashlan'ghan pa'aliyette sherqi türkistan wexpining bash katipi hamutxan köktürk échilish nutqi sözlep weten ichi we sirtidiki pütkül Uyghurlarning roza héytni tebriklidi. Andin kéyin sherqiy türkistan ma'arip we hemkarliq jem'iyitining ijra'iye re'isi abdulhekimxan mexsum sözge teklip qilindi, abdulhekimxan mexsum sözide Uyghurlarning roza héytni tebrikligendin kéyin pütkül Uyghurlarni birlik we inaqliqqa chaqriq qildi.

Pa'aliyetke qatnashqan barliq méhmanlar abdulhekimxan mexsumni qizghin alqishlidi. Kéyin yene sherqiy türkistan yashlar jem'iyiti re'isi tibet yüje türk, sherqiy türkistan hemkarliq jem'iyitige wekaliten kamal ependi, péshqedem wetenperwer seleyhajim artushi, türkiyining sabiq qatnash ministirining bash katipi ehmet ateshchi, qatarliq shexsler bir - birlep sehnige chiqip söz qildi hemde pütkül méhmanlarning roza héytni qizghin tebriklidi.

Rahile, aygüzel, qelbinur qatarliq ösmur qizlar sehnige chiqip, "u yerde bir weten bar sherqiy türkistan" namliq türkche shé'ir oqudi, "jan dada manga öz wetinim kérek" namliq Uyghurche maqalini nahayiti héssiyatliq oqughan bolup pa'aliyetke qatnashqan méhmanlar köz yashlirini toxtitalmay qaldi. Mehmutjanning ijrasida dutar bilen orunlan'ghan Uyghurche naxshilar teqdim qilindi. Uningdin bashqa yene sherqiy türkistan yashlar jem'iyitining mes'ulliridin yüsüp yüsüp oghli shé'ir déklamatsiye qildi.

Axirida méhmanlargha sherqiy türkistan bayriqi bilen türkiye bayriqi oyulghan achquch asqu we qur'an kerimning ayetliri yézilghan lewhe qatarliq maddiy eshyalar hediye qilindi. (Arislan)