Sherqiy türkistan teshkilat mes'ulliri istanbul mu'awin waliysi bilen iptar ziyapitide uchrashti

Süret, 2010 ‏- yili 9 ‏- ayning 2 ‏- küni istanbulning zeytinburnu rayonigha jaylashqan öz türkistan réstoranda, réstoranining xojayini mehmet dünmes ependi teripidin uyushturulghan iptar ziyapitidiki xatire süret.

Iptardin kéyin öz türkistan réstoranida bir yighin uyushturulghan bolup, bu yighin'gha istanbul mu'awin waliysi mustapa altuntash, parlamént ezasi nijat birinji, zeytinburnu sheher bashliqi murad aydin, mu'awin bashliqi ilyas saka qatarliq muhim shexsler qatnashti. Yighinda dunya Uyghur qurultiyining mu'awin bashliqi siyit tümtürk, parlamént ezasi nijat birinji, zeytinburnu sheher bashliqi murad aydin ependiler söz qildi.

Zeytinburnu sheher bashliqi murad aydin ependi söz qilip mundaq dédi: "démokratiye bar yerde hörlük bolidu, hörlük bar yerde güzellik, xushalliq we huzur bolidu, bayliq bolidu, yéqinda xelqimizning qollishi bilen dölitimizning asasiy qanunigha özgertish kirgüzülidu. Buning bilen dölitimiz, üchinchi sinip démokratiyidin ikkinchi sinip démokratiyige ötidu, uningdin kéyin yene birinchi sinip démokratiyige ötüsh üchün qaytidin bir mujadile qilimiz. Zulumgha uchrighan kishilerning du'asi qobul bolidu, sherqiy türkistandiki qérindashlirimizgha téléfun qilip, ulardin türkiye üchün, biz üchün du'a qilishni silerdin soraymen. Bu yerdiki sherqiy türkistanliq qérindashlirimizning sherqiy türkistan toghrisidiki hés ‏- tuyghulirini men yaxshi bilimen, bu hés - tuyghuning türkiye sirtigha kéngiyishi, téximu köp kishilerning buninggha köngül bölüshi intayin muhim. Küchlük, démokratik we bay bir türkiye bolsa mezlum milletlerning awazi we her nersisi bolalaydu. Men buninggha ishinimen, shuning üchün türkiye asasiy qanunigha özgertish kirgüzüsh hemmimiz üchün intayin muhim, xususen zulum astida qalghan milletler üchün, mezlum qérindashlirimiz üchün eng muhim."

Yighinda yene, parlamént ezasi nijat birinchi ependi söz qilip mundaq dédi: "men 12 yash waqtimda altaylardin anatoliyige büyük köchüsh dégen kitabni oqup, sherqiy türkistanni bilgen, eysa yüsüp aliptékinni bilgen idim. Men bu yerde hayajanlanmidim désem yalghan bolidu. Türkiye, dunya türkliri dawamliq séghin'ghan, ularni közligen, ulargha du'a qilghan, ularning mewjut bolup turalishi üchün we özlirining mewjutluqini saqlap qélishi üchün birlikte bolghan bir dölet. Emma türkiye özi buni bilmidi, bir sherqiy türkistanliqtin, bir qirghizdin yaki bir balqan türkidin, türkiyining qandaq dölet ikenlikini sorisingiz, sizge chüshendüridu. Emma, buni biz bilmey kéliwatimiz. Hemmimiz birlikte büyük türkiye we büyük bir türk dunyasini yéngidin birlikte qurayli!"

Yighin jeryanida yene, Uyghurlargha alaqidar we nöwettiki türkiyining asasiy qanunigha özgertish kirgüzüsh toghrisidiki saylamgha alaqidar öz ‏- ara pikir almashturuldi.

Biz bu yighin heqqide téximu köp melumatqa érishish üchün dunya Uyghur qurultiyining mu'awin bashliqi siyit tümtürk ependi bilen söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.