Xitay ishghalining 63-yili munasiwiti bilen istanbulda namayish ötküzüldi

2012-Yili 9-ayning 30-küni xitay ishghalining 63-yili munasiwiti bilen istanbulda yashawatqan Uyghurlar xitayning istanbuldiki konsulxanisi aldida namayish ötküzdi.
Ixtiyariy muxbirimiz arslan
2012.10.01
Share on WhatsApp
Share on WhatsApp
Xitay-Bayriqi-koyduruldi-305.jpg Istanbuldiki xitay konsulxanisi aldida ötküzülgen namayishta xitay bayriqi köydürüldi. 2012-Yili 30-séntebir.
RFA/Arslan

Istanbulda pa'aliyet qiliwatqan sherqiy türkistan ammiwi teshkilatlirining birlikte uyushturushi bilen “Hör sherqiy türkistan munbiri” nam astida istanbuldiki xitay konsulxanisi aldida namayish ötküzüldi.

Istanbuldiki xitay konsulxanisi aldida ötküzülgen namayishtin körünüsh. 2012-Yili 30-séntebir.
Istanbuldiki xitay konsulxanisi aldida ötküzülgen namayishtin körünüsh. 2012-Yili 30-séntebir.
RFA/Arslan

Namayishqa istanbulda yashawatqan Uyghurlar we Uyghurlarning türk dostliri bolup 200 din artuq kishi qatnashti. Namayishchilar, “Sherqiy türkistan 63 yildin buyan xitay ishghal astida”, “Sherqiy türkistandiki xitay ishghaliyitining 63-yiligha lenet oquymiz”, dégen'ge oxshash chong hejimde xetler yézilghan pilakilarni kötürgen halda xitay konsulxanisi aldigha yéqinlap keldi. Namayishchilar konsulxana aldida qollirida ay yultuzluq kök bayraq we pilakilarni kötürgen halda, “Ishghalchi qizil xitay sherqiy türkistandin yoqal!”, “Yashisun musteqil sherqiy türkistan”, “Türkiye uxlima qérindashliringgha sahib chiq”, “Shinjang emes sherqiy türkistan” dégen'ge oxshash sho'arlar towlidi. Namayishchilar xitayning 2 dane bayriqigha ot yéqip köydürüp tashlidi.

Istanbuldiki xitay konsulxanisi aldida ötküzülgen namayishtin körünüsh. 2012-Yili 30-séntebir.
Istanbuldiki xitay konsulxanisi aldida ötküzülgen namayishtin körünüsh. 2012-Yili 30-séntebir.
RFA/Arslan

Kéyin sherqiy türkistan ma'arip we hemkarliq jem'iyitining re'isi hidayetullah oghuzxan “Hör sherqiy türkistan munbiri” ge wakaliten, xitayning sherqiy türkistanni ishghal qiliwalghanliqigha qarshi yézilghan bayanatni oqup ötti.

Hidayetullah oghuzxan sözide mundaq dédi: özining mewjutluqini shan-sherep bilen dawam qilghan sherqiy türkistan 1949-yili rus we xitayning hemkarliqi we suyiqestliri netijiside qanunluq dölitimiz xitay kommunistliri teripidin ishghal qilindi. Mekteplerni taqap xelqimizni nadan qaldurush, ana tilimizdin uzaqlashturush, medeniyet, örp-adetlirimizni buzup yoq qilish üchün her xil usullarni qollandi.

Hidayetullah oghuzxan sözide yene ereb baharining sherqiy türkistan'ghimu tesir körsitidighanliqigha isharet bérip mundaq dédi: bügünki künde dunyaning töt etrapigha keng tarqalghan azadliq nidaliri we küchlük bir shekilde otturigha chiqqan bahar shamili sherqiy türkistan asminighimu tarqilishqa bashlidi. Bu heqiqet xitayni chongqur sarasimige salmaqta.

Namayish jeryanida yene istanbuldiki wetenperwer péshqedem Uyghurlardin abdul'eziz ependi söz qilip xitayning sherqiy türkistanni bésiwalghanliqini qattiq eyiblidi.

Axirida namayishchilardin 5 kishi namayishchilargha wakaliten xitay konsulxanisining derwazisi aldigha qara chembirek qoydi. Qara chembirek üstige sherqiy türkistanliqlar dégen chong hejimlik xet qizil rengde yézilghan bolup, qara chembirek qoyush türkiyide insaniyetke qarshi jinayet ishligenlerni eyibleydighanliqning ipadisi dep qarilidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.