Istanbulda yashawatqan Uyghur jama'iti qurban héyt bayrimini tebrikleshti
2007.12.24

Qurban héyt musulmanlarning yilda bir qétim élip baridighan bayramdur, qurban héytta iqtisadi imkaniyiti bar bolghan musulmanlar allah yolida qoy boghuzlaydu. Qurban héyt musulmanlarni inaq - ittipaqliqqa, birlik- barawerlikke, baylar yoqsullargha yardem qilip héytning xushalliqidin ortaq behrimen bolushni teshebbus qilidu.
Bu künde, Uyghurlarmu öz - ara, bir - birige xushalliqini izhar qilishidu, uruq - tughqanlarni ziyaret qilidu, méhmanlarni qizghin qarshi alidu, bu kün Uyghurlarning eng xushalliq bayram künidur. Shu sewebtin Uyghurlar bu xushalliq künde, ata - anilirini, uruq - tughqanlirini ziyaret qilidu, yétimlerge, yoqsullargha yardem qilidu, mushundaq qilish arqiliq, bir - birige bolghan méhri - muhebbetni ashuridu.
Bu xushalliq künde istanbulda yashawatqan Uyghurlarmu istanbulning aqsaray rayonidiki yultuz toy zaligha yighilip öz - ara qurban héyt bayrimini tebrikleshti.

2007 - 12 - Ayning 22 - küni yeni qurban héyt bayrimining 3 - küni istanbulda pa'aliyet qiliwatqan sherqiy türkistan teshkilat we jem'iyetlerning uyushturushi bilen istanbulda yashawatqan pütkül Uyghurlar istanbulning aqsaray rayonidiki yultuz toy zaligha yighilip qurban héytni xushal - xuram ötküzdi.
Sherqiy türkistan wexpi, sherqiy türkistan ma'arip jem'iyiti, sherqiy türkistan yashlar jem'iyiti, sherqiy türkistan hemkarliq jem'iyiti, qatar 4 jem'iyet birlikte uyushturghan bu pa'aliyet türkiye waqti sa'et 30:13 de bashlinip 16:30 axirlashti.
Pa'aliyetke 1000 din artuq kishi qatnashqan bolup sherqiy türksitan wexpi xadimliridin kamal öztürk, sherqi türkistan ma'arip we hemkarliq jem'iyitining xadimliridin, abduréhim qeshqeri riyasetchilik qildi. Qur'an oqush bilen bashlan'ghan pa'aliyette sherqi türkistan wexpining mes'ulliridin proféssor sultan mehmut qeshqerli, échilish nutqi sözlidi hemde pa'aliyetke qatnashqan méhmanlarning qurban héyt bayrimini tebriklidi. Sherqiy türkistan ma'arip we hemkarliq jem'iyitining re'isi doktur atawulla shehyar, sherqiy türksitan yashlar teshkilatining re'isi tibet yüjetürk,sherqiy türkistan hemkarliq jem'iyitining re'isi isma'il chin'giz, 1944 - yili ghuljida qurulghan sherqi türkistan jumhuriyitining re'isi merhum elixan töremning oghli qutluqxan törem qatarliq rehberler bir - birlep sehnige chiqip söz qildi we pütkül méhmanlarning qurban héyt bayrimini tebriklidi.
Exmetjan "hemdiler bolsun" dégen naxshini orunlighandin kéyin rahile, aygüzel, qelbinur qatarliq ösmür qizlar sehnige chiqip, memet'éli tewpiqning "milli marsh" namliq shé'irni déklamatsiye qildi. Kéyin "güzel türkistan" namliq naxshini orunlap, yighin zalini hayajan'gha saldi. Iliyarjanning orunlishida ghérip - senem filimidiki, "yarim kelmidi" qatarliq bir qanche parche naxsha teqdim qilindi. Uningdin bashqa yene sha'ire siytinsa loqmanning "bu weten kimning", "himmitim" dégen shé'irliri pezilet qatarliq 4 oqughuchi teripidin déklimatisiye qilindi. 3 Yashtin 6 yashqiche bolghan 12 ösmürdin terkip tapqan bir gurup, "Uyghurum" qatarliq bir qanche parche shé'ir oqup pa'aliyetke qatnashqanlarning qizghin alqishigha érishti. Yighin axirida pa'aliyet körsetken ösmür balilar kitab somkisi qatarliq maddi buyumlar bilen mukapatlandi. )Arslan(
Munasiwetlik maqalilar
- Qurban héyt munasiwiti bilen Uyghur milli herikitining yétekchisi rabiye qadir xanim bilen söhbet
- Dinniy erkinliktin mehrum qurban héyt
- Türkiyide qurban héyt
- Qirghizistandiki Uyghurlar qurban héytni tebriklidi
- Otluq salam - séghinishliq küyler - héyt mubarek!
- Hej pa'aliyetliri dawamlashmaqta
- Qurban héyt harpisidiki endishe
- Istanbulda échilghan xelq'araliq körgezme pa'aliyitige Uyghurlarmu qatnashti
- Stanbulda sherqiy türksitan jumhuriyitining qurulghanliqini xatirilesh yighini ötküzüldi
- Miyunxénda roza héytliq pa'aliyet ötküzüldi
- Istanbuldiki Uyghurlar yighilip roza héytni xushal - xuram ötküzdi
- Uyghur musulmanliri, mubarek roza héytinglar qutluq bolghay !
- Turkiyediki Uyghurlar rozi héytini tentenilik etküzmekte