Istanbulda noruz bayrimini tebriklesh murasimi

• Muxbirimiz arislanning bu heqtiki toluq melumati
• Download story audio

Noruz bayrimi dunyadiki türk tili séstimisidiki milletlerning wekillik xaraktérige ige milliy en'eniwi bayrimi. Her yili 3 ‏- ayning 21 ‏- küni Uyghur qatarliq türkiy milletler bu bayramni tebriklep katta yighilish we murasim ötküzidu. . Bu bayramda xushal ‏- xoram halda naxsha éytip, usul oynap, noruz éshi yéyiship, baharning yétip kelgenlikini tebriklishidu, uningdin bashqa yene chélishish, qochqar soqushturush, oghlaq tartishish qatarliq en'eniwi tenterbiye pa'aliyetlernimu ötküzidu. Hem shu kündin bashlap yer térip , köchet tikip baharning ishlirini bashliwétidu.

Türkiyining her qaysi sheherliride xelq ammisi bir heptidin biri noruz bayrimini tebriklesh pa'aliyiti ötküzmekte, 2008 ‏- yili 3 ‏- ayning 21 ‏- küni istanbul waliyliqi teripidin noruz bayrimini tebriklesh murasimi ötküzüldi. Istanbul waliyliq binasida échilghan bayram tebriklesh murasimigha türkiy til séstimisidiki milletlerning jem'iyet we teshkilatlirining wekilliri teklip qilin'ghan, Uyghur, qazaq, qirghiz, türkmen, azari, türk qatarliq qérindash milletlerning wekilliri istanbul waliyliqigha jem bolup, birlikte noruz bayrimini tebriklesh pa'aliyiti ötküzdi. Bu murasimgha sherqiy türkistan wehpi, sherqiy türkistan ma'arip we hemkarliq jem'iyiti, sherqi türkistan köchmenler jem'iyiti, türkmenistan jem'iyiti, qirghizistan oqughuchilar oyushmisi, qazaq - türk wehpi, aydinlar jem'iyiti, shéhid we ghazilar jem'iyiti, ehmed yesewiy wehpi qatarliq jem'iyet we teshkilatlarning wekilliri ishtirak qildi.

Murasimgha istanbul shehirining mu'awin walisi mustafa altuntash ependi sahipxanliq qilghan bolup türk tili séstimisidiki milletlerning her qaysi jem'iyet we teshkilatliridin kelgen wekillerni qizghin qarshi aldi. Mustafa altuntash ependi jem'iyet we teshkilatlarning wekillirini ayrim ‏- ayrim halda sehnige teklip qilip, noruz bayrimini tebriklesh bilen birge qimmetlik sowgha buyumliri hediye qildi. Murasimgha qatnashqan jem'iyet wekilliri, mehtab gurubining orunlishi bilen dumbaq - sunay tengkesh qilghan türklerning milliy marshi oqulghan halda istanbul waliyliqidin istanbul toluq ottura mektepning aldighiche yürüsh qildi.

Türkiye waqti sa'et 10:30 da istanbul toluq ottura mektepning yighin zalida 2 ‏- qétimliq murasim bashlandi. Bu murasimgha türkiy milletlerning jem'iyet we teshkilatlirining wekilliri bolup jem'iy 2000 din artuq kishi ishtirak qildi, murasimda istanbulning mu'awin waliysi mustafa altuntash ependi, istanbul sheherning mu'awin bashliqi ehmet salamet, éminunu rayoni bashliqi newzat er, ezerbeyjanning istanbulda turushluq bash elchisi seyyad aran, türkiye 66 ‏- piyade qoralliq qisim qumandani général pikret tulun'güch qatarliq shexisler söz qildi. Türkiye bash minisitiri rejep tayyip erdughan, dölet ministiri mustapa séyit yazichi'oghli, adalet ministiri mehmet eli shahin, medeniyet we sayahet ministiri qatarliq ministirlarning noruz bayrimini tebriklep ewetken téligrammiliri oqup ötüldi.

Istanbulning mu'awin waliysi mustafa altuntash ependi söz qilip mundaq dédi: "noruzning bir jezbisi bar, noruz kélishi bilen nurghun nersilerdin ,yamanliqlardin qutulup yéngidin tughulghan'gha oxshash bolisiz, bu yéngi kün bilen hayatingizni yéngidin bashlighandek bolisiz, shuning üchün qérindashliq, hemkarliq we tinchliq bu kündin , bu yildin bashlansun. Noruz insanlarni bir yerge jem qilip xushalliq béghishlaydighan bir bayramdur, qan qérindashliq tomurlirimiz bilen baghlan'ghan türk tupraqliri, türk dunyasining bir ‏- birige téximu yéqin chemberches baghlinishni telep qilidu. Insanlar we janliqlar yéngi kün bilen janlinidu, noruz bext ‏- sa'adetning anisi, beriket we xushalliqning menbesidur, bu sewebtin kishiler bir - birining noruz bayrimini tebriklep, qérindashliq könglini ipadilep séxilarche xushalliqini namayen qilishi lazim."

Kéyin noruz bayrimining en'eniwiy örp ‏- aditi buyiche tömürni sendel üstide qoyup bazghan bilen urush , tuxum chékish, noruz bayrimini küylep naxsha éytish, usul oynash qatarliq pa'aliyetler élip bérildi, tamaq ziyapitidin kéyin murasim axirlashti. Murasim axirlashqanda biz bu murasimgha qatnashqan Uyghurlar bilen bu murasim heqqide söhbet élip barduq. (Arslan)