Хитай бихәтәрлик назаритиниң бесими вә "хәт алақә горупписи" ниң сүйқәсти


2007.03.08

Д у қ ички ишлар комитетиниң мәлуматиға асасланғанда, уйғур аптонум раюнлуқ бихәтәрлик назарити бир қанчә йиллардин буян уйғурлар арисидин чәтәлләргә оқушқа чиқидиған оқуғучилар вә тәтқиқатчиларни өзлири үчүн хизмәт қилишқа мақул кәлтүргәндин кейин, уларниң чәткә чиқишиға иҗазат бериш йолини тутупла қалмастин, чәтәлләрдин туғқан йоқлап кәлгән уйғурларниму бир қанчә күн сорақ – соал вә тәрбийә астиға елип, өзлири үчүн ишләшкә көндүргәндин кейин, андин уларниң саяһитигә рухсәт қилиш йолини тутуп кәлгән болуп, бу оқуғучилар яки вәтәнгә берип кәлгәнләрниң конкретни вәзиписи дәсләпки қәдәмдә өзи турушлуқ дөләттики хитайға қарши уйғур тәшкилатлириниң паалийәтлиридин мәлумат бериш, уйғур тәшкилатлирида актип хизмәт қиливатқанларниң турмуши вә алақә даирисидин мәлумат бериш, тәшкилатларниң йеңи пилан – программилиридин мәлумат бериш қатарлиқ саһәләрни өз ичигә алған. Бу хил шәхсләрниң қәйәрдә ишләйдиғанлиқи, қанчә пул мааш алидиғанлиқи, кимләр билән йеқин арилишидиғанлиқи, турмуш сәвийисиниң юқири – төвәнлики қатарлиқ инчикә тәрәпләрму улар тәминләшкә тегишлик учурлар болуп һесабланған.

Чәтәлдин вәтәнгә барға уйғурлар хитайға җасуслуқ қилишқа зорланмақта

Д у қ ички ишлар комитети мудири абдуҗелил қариһаҗимниң игилигән мәлуматлириға бинаән ейтишичә, "уйғур аптонум раюнлуқ бихәтәрлик назарити юқириқи учурларға еришкәндин кейин, һәр қайси вилайәтләрдики бихәтәрлик башқармилириға өз тәвәсидин чиқип кәткән чәтәлләрдики уйғурларни өзлири үчүн хизмәт қилишқа яки уйғур тәшкилатлиридин йирақ турушқа мәҗбурлаш вәзиписини тапшурған. Йәрлик бихәтәрлик башқармилири болса өз хизмәтчи хадимлириға бу вәзипини һөддигә берип ишқа ашуруш йолини тутқан. Вилайәтлик бихәтәрлик башқармисиниң җасуслири өзи һөддигә алған уйғурларниң аилисигә берип, уларниң ата -. Анисини чәтәлләрдики пәрзәнтлиригә хизмәт ишләшкә қистапла қалмастин, өзлири бивастә телефон уруп, чәтәлләрдики уйғурларни өзлиригә ишләшкә мәҗбурлашқа башлиған.

Абдуҗелил қараҗимниң әскәртишичә, вәтәнгә саяһәткә барған яки чәтәлгә оқушқа чиққанларниң чәтәлләрдики уйғур тәшкилатлириға йеқинлишип мәлумат игилиши барғансири қейинға тохтиғандин кейин, хитай җасуслуқ органлири чәтәлдики уйғурларға қарита бирму бир томур тутуп көрүш чарисини қолланған. Болупму дуня уйғур қурултийи вә униң тәркибидә актип хизмәт қиливатқан шәхсләр хитай җасуслуқ органлириниң һуҗум нишаниға айланған.

Асаслиқ мәқсити – д у қ ни йетим қалдуруш

2 – Нөвәтлик д у қ дин кейин, хитайниң тәһдитигә учриған вә азған бир қисим уйғурлар қурултай ички ишлар комитетиға өзини мәлум қилип, хитай җасуслуқ органлириниң қувлуқ – шумлуқлири һәққидә мәлуматлар бәргән. Болупму қурултай тәшкилий комисиюниниң қарари елан қилинғандин кейин, бу хилдики уйғурларниң сани көпәйгән һәмдә қурултай ички ишлар комитетиму азған уйғурларни ениқлаш хизмитини чиң тутуп ишлигән.

"Уйғур аптонум раюнлуқ бихәтәрлик назарити" ниң чәтәлләрдики уйғурларға қаратқан нөвәттики муһим вәзипилиридин бири: д у қ ни парчилаш вә д у қ ниң рәһбири хадимлирини йетим қалдуруштин ибарәт болуп, буниң үчүн хитай бихәтәрлик назарити һәр хил васитиләргә мураҗиәт қилғандин ташқири, бихәтәрлик назарити хәт – алақә гурупписиниң ролиға тайинип д у қ рәһбәрлириниң ә – маиллири мәхпи көрүш, уларниң ә – маил адреслириға вирус әвәтип компиютерлирини керәктин чиқириш, д у қ хадимлири арисида ялған хәтләрни әвәтип зиддийәт пәйда қилишқа башлиған.

2 – Нөвәтлик д у қ ечилиштин илгири, д у қ ниң баварийә йешиллар партийисиниң мәсули Margarita Bause ханимға йоллиған тәклип хети мюнхендики хитай баш консулиниң қолиға чүшүп қалған иди. Д у қ хадимлириниң билдүришичә, бу хәтни хитай җасуслуқ органлири д у қ ниң ә – маилидин оғрилап, өзлириниң баш консулини тәминлигән болуши мумкин икән. (Әкрәм)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.