Gensu ölkisining partkom sékritari su rong zambiyede qachaqta

Xitayning memliketlik xelq qurultiyi da'imiy komititining re'isi wu banggoning bashchiliqidiki bir wekiller ömiki 10 - ayning 29 - künidin bashlap kéniye, zimbabuwé, zambiya, nigiriyelerdin ibaret töt afriqa dölitini ziyaret qilishqa bashlighan idi.

Shinxu'a agéntliqining xewer qilishiche, bu wekiller ömikining 100 din artuq ezasi we 40 tin artuq muxbiri bar idi. "Ulugh ira géziti" ning xewer qilishiche, wu banggoning wekiller ömiki 11 - ayning 4 - küni zambiyigha kelgen. Ömek ezaliri zambiyening mu'awin bash ministiri lupantoning heshemetlik ziyapitidin qaytip mihmanxanigha kelgende, xitay wekiller ömikining ezasi, gensu ölkilik partkomning sékritari surong ependi zambiya ali sot mehkimisi falun'gongchilarning sotqa sun'ghan shikayitike asasen ewetken chaqiriqni tapshurup alghan. Shu kündin bashlap su rongning pa'aliyiti bu wekiller ömikining ichide körünmeydu.

Zambiye ali sotining tutush buyruqi

Gensu ölkilik partkomning sékritari su rong wu banggo bashchiliqidiki xitay wekiller ömikidin ayrilip zambiyida qépqalghanliqi éniq. Chünki, wu banggoning wekiller ömiki 11 - ayning 6 - küni zambiyidin ayrilip bashqa döletke ziyaretke mangghanda, zambiye chégrisidin chiqqanlarning tizimlikide su rong ependining ismi yoq. Su rong ependi zembiyaning lusaka shehridiki taj pamozi dégen ali qawaqxanidiki yataq öyini 11 - ayning 8 - küni kech sa'et 2 de qayturghan. Démek xitay wekiller ömiki zambiyedin qaytqanda su rong bille mangmighan.

"Ulugh ira géziti" ning bayan qilishiche, gensu ölkilik partkomning sékritari su rong zambiye ali sot mehkimisi belgiligen waqitta uchuq sotqa barmighanliqi üchün, zambiye ali sot mehkimisi 11 - ayning 8 - küni uni "qanunni mengsitmigenlik" jinayiti ötküzdi dep hésablap, tutush buyruqi chüshürgen, tamozhnilarghimu su rongni chégridin chiqarmasliqni uqturghan.

Xitayda qanun'gha ri'aye qilip baqmighan emeldar chet'elde qanun aldida

Falun'gongchilargha ziyankeshlik qilghuchilarni xelq'arada tekshürüsh teshkilatining bayan qilishiche, su rong 1948 - yili tughulghan. 1994 - Yili jilin ölkilik partkomning mu'awin sékritari bolghan. 2001 - Yili 10 - aydin bashlap chingxey ölkilik partkomning sékritari bolghan. 2003 - Yili 8 - aydin bashlap gensu ölkilik partkomning sékritari bolup kelmekte. Su rong jilindiki waqittin bashlapla falun'gong mesilisini birterep qilish rehberlik guruppisining bashliqi bolup, falun'gongchilani "özgertish" ishigha yétekchilik qilip kelmekte.

Su rong falun'gongchilarni basturush jehette jang zémin üchün alahide xizmet körsetken emeldarning biri. Falun'gongchilargha ziyankeshlik qilghuchilarni xelq'arada tekshürüsh teshkilatining bayan qilishiche yene, birnechche yildin buyan, xitayda falun'gongchilargha ziyankeshlik qilghanliki kommunist emeldarliri xelq'arada qaysi döletke barsa falun'gongchilar shu dölette ularning üstide sot mehkimilirge eriz sunup, ularni sotqa chaqirtip turmaqta. Emma her qaysi döletlerning qanuni oxshash emes.

Afriqidiki zambiyening qanunida belgilinishiche, sot mehkimiliri sotqa chaqirish we tutushqa buyruq chüshürüshtin bashqa, tutush buyruqida nami atalghan kishilerni dölet chégrisidin chiqarmasliq toghrisida tamozhnilarghimu buyruq chüshüreleydu. Shunglashqa xitayda falun'gongchilargha ziyankeshlik qilghan, qanun'gha héchqachan ri'aye baqmighan kommunist emeldarliri bu döletke kelgende sottin qachsa chégridin qachalmaydu. Uchur - waste tarmaqliri gensu ölkilik partkom sékritari su rongni hazir xitaygha qaytip kélelmey, chet'elde chashqan'gha oxshash yoshurunup - qéchip yürmekte dep qaraydu.

Xitayning dölet komissari chén jilimu hazir tanzaniyide soraq qilinmaqta

Falun'gongchilargha ziyankeshlik qilghuchilarni xelq'arada tekshürüsh teshkilatining bayan qilishiche, xitayning sabiq ma'arip ministiri, hazirqi dölet komissari chén jilining délosimu hazir tanzaniye sot mehkimiside soralmaqta. U buyil 7 - ayda tanzaniyeni ziyaret qilghanda, tanzaniye sot mehkimisi falun'gongchilarning eriz -shikayitige asasen chén jilini "qiyin - qistaqqa élish, "xarlash" jinayiti ötküzgen dep tutup qalghan idi. (Weli)