Jang zémin, kéler yili baharda dölet herbiy ishlar komititining re'islik wezipisidin istipa bermekchi

Xitay metbu'atlirining tekitlishiche, 2004 - yili 12 - ayning 29 - küni échilghan 10 -nöwetlik memliketlik xelq qurultiyi da'imiy komitétining 13 - qétimliq yighinida, 10 - nöwetlik memliketlik xelq qurultiyining 3 - omumiy yighinini 2005 -yili 3 -ayning 5 -küni béyjingde ötküzüshni qarar qilghan .

Xitay metbu'atining xewer qilishiche yene, jang zéminning dölet herbiy ishlar komitétining re'isilik wezipisidin istipa bérish iltimasini we yéngidin merkizi herbiy ishlar komitétigha re'is bolidighan namzat bilen we bashqa ezalirini memliketlik xelq qurultiyining wekilliri közdin köchürüp testiqlaydiken.

Bu yil 9 -ayda 16 - nöwetlik xitay kommunist partiyisi merkizi komitétining 4 -omumiy yighinida, jang zéminning merkizi herbiy ishlar komitétining re'islik wezipisidin istipa bérish telipi otturgha qoyulghan bolup, shundaqla bu wezipige xu jintawning teyinlinidighanliqi élan qilin'ghan idi.

Mörcherleshlerge qarighanda, memliketlik xelq qurultiyi kéler yili 3 -ayda jang zéminning wezipidin istipa bérish teliwini testiqlaydiken.

Jang zémin buningdin ilgiri xitay kompartiyisi merkizi komitétining bash sékritari, dölet re'isi, partiye merkizi komitét herbiy ishlar komitétining re'isi we shuningdek dölet herbiy ishlar komitétining re'isi qatarliq wezipilerni ötigen bolup, u, aldinqi üch wezipisini hazirqi dölet re'isi xu jintawgha alliqachan ötküzüp bergen idi.

Bu heqte élan qilin'ghan bir qisim obzorlarda éytilishiche, xitayda kommunist partiye merkizi komitétining herbiy ishlar komitéti bilen dölet herbiy ishlar komitéti namda ikki xil ataq bolsimu, emma her ikkilisi teng derijilik organ hésablinidu. Dölet herbiy ishlar komitétining re'islik wezipisidin istipa béridighan jang zémin xitay kompartiyisi merkizi komitétining herbiy ishlar komitéti re'islikidinmu teng istipa bérishi kérek.

Sin'gapor dölet unwersitéti sherqiy asiya tetqiqat merkizining mudiri "78 yashliq jang zéminning dölet herbiy ishlar komitétining re'islik wezipisidin istipa bergenning hichqanchilik chong ehmiyiti yoq, chünki jang zémin bir siyasiy shexs bolush süpiti bilen xitayda yenila özining tesirini körsiteleydu, biraq uning tesiri xitayning sabiq rehberliridin biri bolghan ding shawpingchilik bolmaydu" dep tehlil qilghan.

Jang zémin, 1989 - yili "4 - iyun" weqesidin kéyin shangxeydin merkizi hökümetke wezipisi östürülüp, yötkep kélin'gen we shundin étibaren xitayda 10 nechche yildin buyan eng hoquqluq bir ademge aylan'ghan.

Bir qisim xitay mutexessisler, jang zémin'ge mundaq baha béridu: jang zémin wezipe ötesh jeryanida herbiy qisimlarni zamaniwilashturush, diplomatiye yollirini échish, iqtisadni tereqqi qildurush qatarliq jehetlerde tirishchanliq körsitip, xitayning xelq'aradiki ornining üzlüksiz yuqiri kötürülishide rol oynidi.

Xitay mutexessisliri jang zéminning orun basari xu jintawgha bolsa mundaq baha béridu: xu jintawmu iqtisadni üzlüksiz tereqqi qildurush, baylar bilen kembeghellerning perqini azaytishni otturgha qoyush bilen birge, wezipige teyinlen'gen birinchi yilidila "dölet mudapi'e aq tashliq kitawini" élan qilip, döletning herbiy küchini kücheytip, herbiy islahat élip bérip teywen musteqilliqigha qarshi qattiq pozitsiye tutup keldi. (Eqide)