Җаң чиңли тибәт аптоном райони парткоминиң муваппәқ секритарлиқиға тәйинләнди


2005-11-28
Share

Җаң чиңли ким?

Шәндуңлуқ җаң чиңли 1979 - йилидин башлап хитай коммунистик яшлар иттипақи мәркизи комитетида хизмәт қилип, 1986 - йили шәндоң дуңйин шәһиригә қайтуруп келингән. 1998 - Йили у гәнсу өлкилик парткомниң даимий һәйәт әзаси, тәшвиқат бөлүминиң башлиқи қатарлиқ вәзипиләрни өтигән. 1999 - Йили җаң чиңли хитай һөкүмитиниң уйғур елидики ишләпчиқириш қурулуш биңтүәниниң баш қоманданлиқиға тәйинләнгән, 2004 - йили уйғур аптоном районлуқ парткомниң муавин секритарлиқ вәзиписини өтигән.

Ройтирс агентлиқиниң хәвиригә қариғанда, ху җинтавниң бу кона сәпдишини тибәттики әң муһим орунға қоюши, униң сиясий улини техиму мустәһкәмләштүргән.

Әмма америкида турушлуқ, узундин буян хитайдики әмәлдарларниң алмишишиға диққәт қиливатқан һәмдә бу һәқтә нурғун әсәрләрни язған язғучи гаң шин әпәнди, җаң чиңлиниң өсишиниң бу қетим тибәткә тәйинлинишидин башланмиғанлиқини билдүрди:

"Җаң чиңли тибәткә тәйинлиништин бурунла, өлкә дәриҗликкә өстүрүлүп болған. Тибәт шунчилик муһим болғачқа, хуҗинтав уни таллап, буни таллап ахири йәнә өлкә дәриҗилик бирсини қоюшни тоғра тапти. Әгәр тибәтниң партком баш секритари яң чүәнтаң ағрип қелип, мәсилә чиқмиған болса, җаң чиңли бу орунға қоюлмайтти. Җаң чиңли әсли ваң лечүәнниң арқа сәп орунбасари иди. У , ваң лечүән мәркәзгә йөткәлсила, уйғур аптоном районини қолға елишни күтүп турған. Шуңа җаң чиңлиниң муһим орунға қоюлуши бурунла мөлчәрләнгән".

Уйғурларни бастурушқа тәҗрибилик

Гаң шинниң қаришичә, хитай һөкүмитиниң уйғур елидә миллий мустәқилчиләрни бастуруш тәҗрибиси бар җаң чиңлини тибәткә йөткиши, хитай һөкүмитиниң тибәткә алаһидә етибар бериватқанлиқидин дерәк бериду. У мундақ дәйду:

"Хитай компартийиси тибәтниң җуғрапийилик, сиясий вә дипломатийидики муһим орниға алаһидә диққәт қилидиғанлиқи үчүн, халиған бир муавин өлкә дәриҗилик әмәлдарни тибәткә йөткәштә хатирҗәм болалмиған. Улар, чоқум мәркәзниң қаттиқ ишәнчисигә еришкән һәмдә башқуруш қабилийити, сиясий башқуруш тәҗрибиси мол бир кишигә муһтаҗ. Һалбуки, җаң чиңли узун мәзгил уйғур елидә мустәқилчиләрни бастурушта чениққан. Униң үстигә, у йерим һәрбий характергә игә биңтүәнгә қоманданлиқ қилған. Шуңа ху җинтав уни тибәткә қоюшни тоғра тапқан."

Тибәткә болған контроллуқ күчийиши мумкин

Бир қисим тибәт паалийәтчилири болса җаң чиңлиниң тибәткә йөткилишигә әндишә билән қаримақта. Хоңкоңдики нәнхуа сәһәр гезитиниң, мәркизи лондондики тибәт учур ториниң мәсули додәнниң сөзини нәқил кәлтүрүшичә, ху җинтав җаң чиңлини тибәт аптоном райони парткоминиң мувәппәқ баш секритарлиқиға тәйинләш арқилиқ тибәткә техиму көп һоқуқ бериш әмәс, бәлки контроллуқини күчәйтиши мумкин. Шуңа бу тибәт хәлқигә пайдилиқ болуши натайин. Әмма униң көрситишичә, ху җинтав бираз әмәлий иш көридиған болғачқа, әгәр у тибәт хәлқигә көпрәк һоқуқ бериш, өз һөкүмитигә техиму көп пайда елип келиду дәп қариса, шу йолни тутишиму мумкин икән. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт