Jidde shehiridiki Uyghurche radi'oning qurghuchiliridin merhum sabt hajimni esleymiz

Se'udi erebistani dölet radi'osi terkibidiki türkistan bölümi 1982-yili Uyghur élidin kelgen muhajir ölimalarning ish bashlishi bilen anglitish bashlighan.
Ixtiyariy muxbirimiz ömerjan
2011-01-21
Share
sabt-hajim-305 Jidde shehiridiki Uyghurche radi'oning qurghuchiliridin merhum sabt hajim.
RFA/Omerjan

Bu radi'oda ötken 29 yil jeryanida köp kishiler ishligen bolsimu, deslepki qurghuchilardin merhum muhemmed emin islami bilen sabit hajimlarning qaldurghan izliri we qilip ketken ulughwar xizmetliri untulmaydu.

Sabit hajim toghriliq köprek melumat élish üchün se'udi erebistani radi'osi türkistan bölümining eng péshqedem diktorliridin ellame abdulmennan hajimgha muraji'et qilghan iduq.

Ellame abdulmennan hajim mundaq dédi: "Sabit damollam bu radi'oda ishligenlerning eng koniliridin biri hésablinidu. Biz u kishi bilen jidde rayonining buxariye mehellisidiki bir meschitte tonushqan iduq, u kishi shu mehellidiki bir meschitte imam idi. Menmu shu kishining yardimi we tonushturushi bilen radi'ogha kirgen idim. Özi katta alim idi. Sherqiy türkistan dewasida aldinqilardin idi. Radi'ogha munasiwetlik köp ishlarni we diniy mesililerni u kishidin ögen'gen iduq. Bu kishini türkistan bölümini tesis qilghanlardin biri dések bolidu. Men ishqa kirip ikki yil ishlidi. Kéyin ten saqliqi ajizlap ketkenlik sewebidin radi'odin chiqip ketken idi."
Sabit hajimning oghli ehmed sabitning éytishiche, sabit salih tahir hajim 1919- yili Uyghur élining guma nahiyiside meshhur diniy alim salih damollamning a'iliside dunyagha kelgen bolup, iptida'iy telimini dadisida alghan sabit hajim qeshqer xanliq medrisige bérip ilim tehsil qilghan. 1944- Yili qeshqerdiki oqushini püttürüp tughulghan yurti guma nahiyisige yétip kelgen we shu yili nahiyilik chong meschitning xatipi we imamliqigha teyinlen'gen iken. Téximu köp ilim tehsil qilishqa bel baghlighan sabit hajim 1947- yili hindistan'gha chiqip kétip, hindistanning dangliq medrisiliride qaytidin ilim tehsil qilishqa kirishken. 1952-Yili hindistandin ayrilghan sabit hajim mekke mukerreme shehirige yétip kélip, yene ilim tehsil qilishning yolini élip, se'udi erebistani paytexti riyad shehiride institutni püttürgendin kéyin, 1961-yili medine munewwere shehiridiki dangliq islam uniwérsitétigha oqushqa kirip 1964- yili uniwérsitétni aliy netije bilen püttürgen iken.

Sabit hajimning emgekliri

Ehmed sabitning éytishiche, sabit hajim 1965-yili se'udi erebistan hökümiti teripidin sherqiy rayonning qetif dégen yérige mu'ellimlikke teyinlen'gen iken. Kéyinche xizmiti ta'if shehirige yötkilip 1973- yilighiche shu jayda mu'ellimlik qilip ötken. 1982 - Yili se'udi erebistanining jidde shehiride Uyghurche radi'o échilish harpisida, ta'iftin jidde shehirige yötkilip kélip, mezkur radi'oning qurghuchiliridin biri bolush süpiti bilen jidde radi'osining tunji Uyghur diktori bolghan. " Erebche we Uyghurche shé'irlar toplimi", " Hej qilish qa'idisi" namliq kitabliri neshr qilinip tarqitilghan. Mundin bashqa "Miras", "Tepsir" qatarliq kitablarni ereb tilidin öz waqtidiki chaghatay Uyghur tiligha terjime qilip neshr qildurghan iken.

Sabit hajimning wapati

Sabit hajim hayatining axirigha qeder se'udi erebistanining jidde radi'osi Uyghurche anglitish bölümide xizmet qilip, 1999- yili 82 yéshida alemdin ötken we mekke mukerreme shehiridiki mu'ella qebristanliqigha depne qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet