Дик чейни муавин прездент кандидати намзатлиқини қобул қилди


2004-09-02
Share

Америка җумһурийәтчиләр партийиси вәкилләр қурултийи давам етиватқан мәзгилдә, муавин прездент дик чейни(Dick Cheney ) чаршәнбә күни йиғинда нутуқ сөзләп, өзиниң җумһурийәтчиләр партийиси көрсәткән муавин прездент кандидати намзатлиқини рәсмий қобул қилғанлиқини җакалиди.

Қурултайда бир саәтчә нутуқ сөзлигән муавин прездент дик чейни буш һөкүмитиниң ираққа қилған урушини ақлаш билән биргә демократчилар партийисиниң прездент намзати җон кәррийгә һуҗум қилип, униң дөләт бихәтәрлик тәдбирлирини йиниклитиш идийисини мәсхирә қилди.

Дик чейни сөзидә йәнә, гәрчә җон кәррийниң вейтнам урушидики төһпилирини мәдһийләп өткән болсиму, лекин униң уруштин кейин узун мәзгил қаймуқуп йүргәнликини әскәртип, җорҗ W бушниң рәһбәрлик иқтидариға игә, прездент болушқа лайиқ киши икәнликини билдүрди.

Җумһурийәтчиләр партийиси вәкилләр қурултийда нутуқ сөзлигән дик чейни йәнә, америкиниң муавин прездентлиқ вәзиписини өтигәндин буян, прездент бушниң хизмәт қилиш үнүми вә мәсилиләрни қандақ бир тәрәп қилиш җәһәттики маһаритигә өз көзи билән шаһит болғанлиқини, шундақла өзиниң бушниң қайта прездентлиққа сайлинишиға пүтүн күчи билән ярдәм қилидиғанлиқини тәкитлиди. Униң сөзи, җумһурйәтчиләр партийиси вәкиллириниң қизғин алқишиға еришип, йиғиндикиләр җорҗ W бушқа " йәнә 4 йил" дәп товлашти.

Гәрчә дик чейнини қоллаш нисбити мәзкүр йиғин сәвәбидин азрақ өрлигән болсиму, әмма америка симлиқ телевизийә хәвәр тори вә "бүгүнки америка гезити" ниң бирликтә елип барған хәлқ райини синаш тәкшүришидин мәлүм болишичә, нөвәттә дик чейнини қоллаш нисибити барғансери төвәнләп меңип, әллик персәнттинму төвәнгә чүшүп қалған.

Бу қетимлиқ йиғинда, дик чейни башчилиғидики җумһурийәтчиләр партийиси рәһбәрлири ирақ вә террорлуққа қарши уруш һәққидә көп сөз қилған болсиму, әмма иқтисад, сәһийә-сағламлиқ вә ишсизлиқ қатарлиқ дөләт ичи мәслилири һәққидә еғиз ачмиди.

Җумһурийәтчиләр партийисиниң вәкилләр қурултийи ечиливатқан мәзгилдә, нйо-йорк шәһиридә буш һөкүмитигә қарши намайишлар үзүлмиди. Чаршәнбә күниму нәччә миңлиған киши кочиға чиқип намайиш өткүзүп, бушниң иқтисадий сияситиниң америкида еғир ишсизлиқ вәзийитини кәлтүрүп чиқарғанлиқини әйиплиди.

Җумһурийәтчиләр партийиси вәкилләр қурултийи дүшәнбидин пәйшәнбигичә төт күн давам қилиду. Пәйшәнбә күни кәчтики йиғинда прездент җорҗ W буш җумһурийәтчиләр партийисиниң прездент намзатлиқини қобул қилип, мәхсус нутуқ баян қилмақчи. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт