Норвегийидә шәрқий түркистан җумһурийәтлири хатириләнди


2006-11-13
Share
Шәрқий түркистан җумһурийитиниң баш катиби абдуроп мәхсум ибраһими

Норвегийидики уйғурлар бир йәргә җәм болуп 12 - ноябир шәрқи түркистан җумһурйәтлири қурулған күнни дөләт байрими сүпитидә тәбриклиди шундақла , уйғур хәлқиниң азадлиқи , шәрқий түркистан дөлитиниң мустәқиллиқи үчүн қан төккән әзимәтләрниң роһиға атап дуа тилавәтләр қилишти. Йеқинда уйғур сиясий паалийәтчилири арисидин вақитсиз аләмдин өткән атақлиқ сәнәткар , актип сиясий паалийәтчи күрәш көсән әпәндини һәмдә униң иш излирини әсләп өтти.

11-Айниң 12-куни, йәкшәнбә норвегийиниң осло вә бергин шәһәрлиридики уйғурлар бир йәргә җәм болуп, икки җумһурийәт күнини хатирилиди. Паалийәттә алди билән икки җумһурийәтниң қурулуш җәряни вә кейинки ақивити қисқичә әсләп өтүлди.

1933-Йили 11-айниң 12 – күни қәшқәрдә әҗдатлиримизниң әсирләр бойи қилған әркинлик ,мустәқиллиқ арзуси вә сансиз қурбанларни бериши бәдилигә, савут дамоллам қатарлиқ вәтәнпәрвәр әҗдатлиримизниң баш болуши билән "шәрқий туркистан ислам җумһурйити" қурулди вә әйни чағдики қумул деһқанлар инқилабиниң йолбашчиси хоҗа нияз һаҗи җумһурийәт рәисликигә тәйинләнгән иди. Әпсуски руслар билән хитайларниң тил бириктүрүп елип барған суйиқәстлик һуҗумлири ақивитидә бу җумһурйитимиз анчә узунға бармай оз мәвҗутлиқидин айрилди.

Шундин йәнә 11 йил өтуп хәлқимиз хитайниң зулумиға қарши шималдики уч вилайәттә қайта қозғалди вә узун өтмәй ғулҗида иккинчи қетим "шәрқий туркистан җумһурийти" қурулди. Бу қетимқи инқилабқа, әлихан төрәм, әхмәтҗан қасими, ғәни батур қатарлиқ бир түркүм вәтәнпәрвәр затлар башчилиқ қилған иди. Толиму әпсуски сансизлиған аҗдатлиримизниң иссиқ қени бәдилигә дуняға кәлгән бу җумһурйитимизму йәнә охшашла рус вә хитайдин ибарәт икки дүшмәнниң бирлишип ойниған сияси оюнлириниң қурбани болуп кәтти.

Хатириләш паалийитигә қатнашқан барлиқ уйғурлар бирдәк һалда, икки җумһурийәтниң қурулуши уйғур хәлқиниң алдинқи әсирдә икки қетим мустәқил дөлити болғанлиқиниң испати, шуниңдәк шәрқий түркистанниң хитайлар тәрипидин беқивелинған дөләт икәнликиниң рошән бир пакити, буниң бүгүнки милли дәва ишлиримизда вә бүгүнки өсүп йетиливатқан әвлатларниң иптихар туйғусини ашурушта ғайәт зор роли бар, дәп қарайдиғанлиғини билдүрүшти. Йиғин қатнашчилиридин әнвәр әпәнди бундин кейин бу хил тәбрикләш паалийәтлирини һәр йили кәң –көләмдә, техиму мол мәзмунлуқ паалийәтләр билән хатирләшниң зөрүрлүкини тәкитләп оз көзқаришини баян қилди.

Паалийәтниң җумһурийәт күнини хатирләш қисми ахирлашқандин кейин, мәрһум көрәш күсәнниң ниң хәлқимиз қәлбидин чуңқур орун алған өлмәс сәнити, вәтән – милләт ишлириға қошқан өчмәс төһпилири һөрмәт билән әсләп өтүлди вә мәрһумниң роһиға дуа оқулди.

Биз йәнә бергиндики паалийәт әаһвалидин хәвәрдар болуш үчүн норвегийә уйғур комитетиниң диний ишлар бойичә мәсули вә бергин шәһиридики вәкили кәрим қаримни зиярәт қилдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт