Xéylongjyangdiki kan weqeside ölgenlerning sani 148 ke yetti

• Muxbirimiz arzuning bu heqtiki melumati
• Download story audio

Yekshenbe küni kechte xéylongjyang ölkilik long kömür kan guruhining tarmiqidiki chi teyxé shirkiti bashquruwatqan dongféng kömür kénida shiddetlik partlash weqesi yüz berdi. Deslepki éniqlashlargha qarighanda, weqe kömür tozanglirigha ot kétishtin kélip chiqqan. Eyni waqitta, kan astida 221 neper ishchi meshghulat élip bériwatqan bolup, weqe yüz bergendin kéyin, hökümet da'iriliri nechche yüzligen qutquzush xadimlirini ewetken.

Shinxu'a agéntliqining seyshenbe küni bergen xewirige qarighanda, seyshenbe küni kech sa'et beshkiche, weqede 148 ademning ölgenliki éniqlan'ghan. Yene, 3 ademning iz ‏- dériki tépilmighan.

Shirkettikiler weqedin xewersiz

Muxbirimiz tepsiliy melumat igilesh üchün mezkur shirketke téléfon qilghan bolsimu, emma téléfon alghan beziliri, ehwaldin xewersiz ikenlikini, yene beziliri özlirining bu shirketke ish béjirishqa kelgenlikini, kan partlashtin xewersiz ikenlikini bildürdi.

Xitay metbu'atliri dongféng kanida yüz bergen partlashta ölgenlerning 148 ke yetkenlikini bildürüwatqan bir peytte, téléfon ziyaritimizni qobul qilghan chiteyxé sheherlik hökümetning sékritarliq ornidiki xizmetchi xadim, weqede adem ölgenlikini qet'iy tilgha almidi:

"Tepsili ehwalini uqmaymen, ular bilen alaqilishalmiduq. Bu heqte kimning melumat béreleydighanliqini uqmaymen. Neq meydan'gha barmidim. Bizning sheher bashliqimiz neq meydan'gha ketti. Dölet we ölke rehberlirimu bar. Bu ölkilik long guruhining qarmiqidiki kan bolghachqa, pütün küchimiz bilen qutquziwatimiz ''

Her tereplime xewerler

Shinxu'a agéntliqining xewirige qarighanda, xéylongjyang ölkilik hökümet da'iriliri weqedin kéyin, derhal jiddiy yighin échip, her qaysi jaylardin bixeter ishlepchiqirish chong tekshürüshi élip bérishni telep qilghan. Xewerde ölgenlerning axiret ishlirining jiddiy bir terep qiliniwatqanliqi körsitilgen.

Emma b b s radi'o ‏- téléwiziyisining xewer qilishiche, qazagha yoluqqan bir qisim kan ishchilirining uruq‏- tughqanliri qehritan soghuqta kanning derwazisining aldigha kélip, özlirining yoqalghan toghqanlirini izdeshni telep qilghan. Bu jeryanda, ular kanning amanliq qoghdighuchiliri bilen toqunushup qalghan.

Yéqinqi yillardin buyan, xitay hökümiti kömür kanlarning bixeterlikige alahide ehmiyet bériwatqanliqini bildürüp, ilgiri‏- kéyin bolup, her xil belgilimilerni chiqarghan idi. Peqet mexsus kan bixeterlikini nazaret qilishqila 30 mingdin artuq xadimni qoyghan. Emma xitayda ejellik kömür kan weqeliri köplep yüz bermekte. Xitay hökümitining istatéstikilirigha qarighanda, bu yilning aldinqi yérimidila kömür kan weqeliride ölgenlerning sani 2600 din ashqan. Bu san téxi, yerlik hökümet da'iriliri we kan igiliri til biriktürüp yoshurghan kan weqelirining sanini öz ichige almaydu.

Weqe heqqidiki munaziriler

Xitaydiki "shimaliy terep tori" qatarliq bir qisim tor betliride, kishiler, "emeldarlar we kan igilirining til biriktürüshi" ning kan weqelirining ayiqi üzülmesliktiki bir tügün dep bildürmekte. Mezkur weqe yüz bergen chiteyxé shehiride bu yil 3 ‏- aydila bir qétim kömür kan weqesi yüz bérip, 18 adem ölgen idi. Weqedin kéyin, kan igisining yerlik bixeter ishlepchiqirishni nazaret qilish idarisining mu'awin bashliqi ikenliki pash bolghan. Gerche xitay merkizi hökümiti emeldarlarni kömür kanlargha salghan pay chékini qayturuwélishni telep qiliwatqan bolsimu, emma emeldarlarning kömür kanlargha salghan " péyi" pul bolmastin, hoquq bolghachqa, bu usulning ünümimu körülmidi.

Fransiyide turushluq, ataqliq xitay obzorchisi sey zunggo ependi ilgiri élan qilghan obzorida, "ejellik kan weqelirining köplep yüz bérishi xitay hökümitining inawitini gümran qiliwatidu hemde xitay hökümitining qabiliyetsizlikini körsitiwatidu. Xitay hökümiti qolliniwatqan, alaqidar kan igiliri, karxana we hökümettiki mes'ol xadimlarni jazalash, bixeter ishlepchiqirish ölchemlirige toshmighan kanlarni taqash, bixeterlikni kücheytishke meblegh sélish qatarliq wastilar tolimu yitersiz. Eger xitay ishlepchiqirish bixeterlikini nazaret qilish tüzülmisini pütünley islah qilmisa, ishchilarni ishlepchiqirish bixeterlikini nazaret qilishqa qatnashturmisa, xitaydiki kan weqeliri azaymaydu" dep körsetken. (Arzu)