Kanada 2011 - yilidin kéyin afghanistandin esker chékindürmekchi

Kanada metbu'atliridin melum bolushiche, yéqinda kanadada échilghan sana'etleshken 8 dölet tashqi ishlar ministirliri yighinigha qatnishish üchün kanadagha kelgen amérika tashqi ishlar ministiri hillariy klinton xanim kanada tereptin, 2011 - yilidin kéyinmu afghanistanda esker turghuzush teklipide bolghan bolsimu, emma kanada terepning pütünley ret qilishigha uchrighan.
Muxbirimiz gülshen abduqadir
2010-04-05
Élxet
Pikir
Share
Print
Sürette, kanada bash ministiri stéfén xarpér sözde.
Sürette, kanada bash ministiri stéfén xarpér sözde.
AFP Photo

Kanada bash ministiri stewén xarpérning bayanatchisi dimitri so'udas ning kanada metbu'at sahesige bergen melumatigha asaslan'ghanda, ottawa 2011 - yilidin kéyin afghanistanda wezipe ötewatqan eskerlirini tamamen chékindürüp chiqidiken , emma afghanistanni qaytidin qurush we güllendürüsh ishlirigha asasi küchini qaritish meydanida özgirish bolmaydiken.

Hillariy kilintonning kanada s b s téléwiziyisining siyasi ishlar programmisigha bergen, amérika terepning kanadaning afghanistanda dawamliq halda eskiri tesir küchini saqlap qélishini xalaydighanliqi heqqidiki söhbet programmisidin kéyin, kanada tashqi ishlar ministiri lawrens kanon metbu'at sahesige bayanat bérip, kanadaning 2011 - yilidin kéyin afghanistandin pütünley esker chékindürüp chiqidighanliqini we bu qararning amérika ‏ - kanada munasiwetlirige héchqandaq kölengge chüshürmeydighanliqini bildürgen.

Amérika tashqi ishlar ministiri hillariy klinton xanim bu mesile heqqide bash ministir stewen harpér bilen 20 minut etrapida söhbetleshken bolup, klinton xanim harpérdin kanadaning 2011 yilidin kéyin afghanistanda esker turghuzmighan teqdirdimu, eskiri meshiq we arqa sep mulazimiti qatarliq jehetlerde dawamliq qélip amérikigha yardemde bolushni telep qilghanliqi melum. Hillariy yene, kanada eskerlirini maxtighan bolup ularning afghanistanda masliship ishlesh rohigha yuqiri baha bergen.

Kanadaning hazir afghanistanning qendihar wilayitide 2900 eskirining wezipe ötewatqanliqi melum bolup, kanadadiki köpligen siyasi partiyiler, 2011 - yilidin kéyin kanadaning afghanistanda izchil esker turghuzushining héchqandaq ehmiyiti yoq dep qaraydiken.

Analizchilar hillariy xanimning kanada tereptin bundaq bir telepte bolushtiki mexsitini afghanistan mesilisi heqqide munazire peyda qilish üchün dep qarimaqta iken.

Yéqinda kanada parlaméntimu afghanistanning jenubigha jaylashqan qendihar wilayitige ewetilgen kanada eskerlirining wezipe ötesh mudditining 2011 - yilida axirlishidighanliqi heqqide qarar maqullighan.

Amérikida yüz bergen 9 - séntebir térrorluq weqesidin kéyin, kanada amérika bilen bir septe turup afghanistan'gha esker ewetken tunji dölet bolup, hazirgha qeder kanadaning afghanistanda 141 eskiri we bir diplomati ölgenliki melum. Kanada yene amérikining iran'gha esker ewetish telipinimu ret qilghan.

Chet'el metbu'atliri bolupmu nyuyork waqti qatarliq gézitler, afghanistan mesilisi bilen shimaliy muz okyanning ékologiyisi mesilisini kanada bash ministiri stewin harpérning aldidiki ikki chong sinaq dep mulahize qilip kelgen bolup, mulahizichilerning bildürüshiche, kanada qandaqtur urush qalaymiqanchiliqliri ichidiki küchlük dölet emes, belki tinchliq ichidiki sana'etleshken küchlük dölet bolushni arzu qilidiken.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet