“Karwan Uyghur ansambili” ning pa'aliyetliri netijilik axirlashti

Gérmaniyining töt shehiride oyun körsitip Uyghur medeniyiti, sen´iti, tarixi we edebiyatini tonutup alqishqa érishken “Karwan Uyghur ansambili”ning pa'aliyetliri 22-öktebir axirlashti.
Ixtiyariy muxbirimiz ekrem
2011.10.25
karwan-uyghur-ansambili1-305.jpg “Karwan Uyghur ansambili” pa'aliyitidiki tamashibinlar we artislardin körünüsh. 2011-Yili 14-öktebir, gérmaniye.
RFA/Ekrem

Gérmaniyining bawariye ölkisi Uyghur siyasiy pa'aliyetchiliri köprek merkezleshken we d u q ning bash shtabi jaylashqan orun bolup, Uyghur pa'aliyetchiler uzun yillardin buyan Uyghurlar mesilisini siyasiy nuqtidin gérmaniye hökümiti we xelqige bildürüshke tiriship kelgen idi. Bu qétim otturigha chiqqan “Karwan Uyghur ansambili” bolsa, Uyghurlar mesilisini tarix, medeniyet, sen´et, edebiyat nuqtisidin tonutush yolini talliwalghan hemde deslepki qedemdila belgilik tesir qozghighan.

karwan-uyghur-ansambili-385.jpg
“Karwan Uyghur ansambili” sen'etkarliri. 2011-Yili 14-öktebir, gérmaniye.
RFA/Ekrem

Gérmaniyide teshkillen'gen “Karwan Uyghur ansambili” pa'aliyetlirini 2010-yili bashlighan bolup, bu yil 10-ayning 14-künidin 22-künigiche yene bawariye ölkisining töt shehiride oyun körsetken. Pa'aliyetke gérmaniye we gollandiyidin kelgen Uyghur sen'etkarlar qatnashqan. 21-Öktebir nürinberg shehiride, 22-öktebir karlisruhi shehiride körsetken oyunlirining zor alqishqa érishkenlikini eskertken nurnisa xanim, pa'aliyetning bundin kéyinki tereqqiyatidin köp ümidwar ikenlikini hayajan bilen tilgha aldi.

Gollandiyidin kélip bu pa'aliyetke ishtirak qilghan perhat abit ependi sehnilerde Uyghur xelq naxshilirini orunlap qiziqish qozghighan bolup, u “Karwan Uyghur ansambili”ning bu qétimqi pa'aliyetlirining gérmaniye jama'itining yaxshi bahasigha érishkenlikini éytti.

“Karwan Uyghur ansambili”ning teshkilligüchiliridin biri bolghan nurnisa xanimning bildürüshiche, 2012-yili gérmaniye hökümiti teripidin “Xitay medeniyet yili” pa'aliyitini ötküzüsh qarar qilin'ghan bolup, “Karwan Uyghur ansambili” bu pursettin paydilinip gérmaniyining ondin artuq shehiride nomur körsitish arqiliq, “Xitay medeniyet yili” gha qarshi Uyghur medeniyitini tonutushni dawamlashturidiken.

Nurnisa xanim bu qétimqi pa'aliyetni gérmaniyidiki xeter astidiki milletlerni qoghdash teshkilati qatarliq kishilik hoquq teshkilatlirining yéqindin qollawatqanliqini, gérmaniye medeniyet sahesidiki bezi zatlarning “Karwan Uyghur ansambili” ning pa'aliyetlirini dawamlashturushni teshebbus qiliwatqanliqini hemde ularning tégishlik yardemde bolidighanliqini tilgha alghanliqini eskertti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.