Уйғур елидә кәлкүн апити давамлашмақта

• Мухбиримиз әқидәниң бу һәқтики толуқ мәлумати
• Download story audio

Уйғур елиниң бир қисим җайлирида 16 ‏- июл күнидин буян яққан қаттиқ ямғур, кәлкүн апити пәйда қилип, қатнашниң еғир дәриҗидә тосулуп қелишини һәтта бир кишиниң өлүмини, 5 кишиниң из - дерәксиз йоқап кетишини мәйданға кәлтүргән.

Истансимиз кәлкүн апити еғир дәриҗидә йүз бәргән қумул, турпан қатарлиқ җайлардин мәлумат игиләш үчүн, қумул вилайәтлик һава райи идариси вә қумул шәһәр аһалиси шуниңдәк турпандики аһалиләргә телефун урди.

Апәт асасән уйғур елиниң шәрқи шимал районида

Хитай ахбарат вастилири, уйғур елиниң қумул вә турпан вилайәтлири, санҗи области вә қанас саяһәт районлирида еғир кәлкүн апити йүз бериватқанлиқини, һәтта мори наһийисидә бир кишиниң қаза қилип, 4 кишиниң көмүлүп қалғанлиқини 5 кишиниң из - дерәксиз йоқап кәткәнликини һәмдә апәт йүз бәргән җайлардики таш йолларниң бузулғанлиқидин нәччә йүзлигән аптомобил вә нәччә йүзлигән йолучиларниң нишаниға йетәлмәй тохтап қелишқа мәҗбур болғанлиқини елан қилмақта.

Истансимиз аптоном районлуқ һава райи идариси вә кәлкүндин мудапиә көрүш ишханиси қатарлиқ орунлардин йүз бәргән кәлкүн апити һәққидә тәпсилий мәлумат елиш үчүн көп издәнгән болсақму , әмма телефун турупкисини алидиған киши чиқмиди.

Зияритимиз җавабсиз қалди

Биз йәнә апәт әң еғир йүз бәргән қумул вилайитидин мәлумат игиләш үчүн, қумул вилайәтлик һава райи идарисиниң башлиқи вей генчеңни зиярәт қилдуқ.

Вей геңчең биздин алди билән, силәр қайси ахбарат идарисиниң дәп сориди.

Америкидики әркин асия радиосидин телефун уруватқанлиқимиздин хәвәрдар болған һава райи идарисиниң бу мәсули, "салаһийитиңлар ениқ әмәс икән, бизниң сиртқа мәлумат бериштә бир қатар қаидә - принсиплиримиз бар, униң үстигә һазир апәт әһвалидин техи ениқ хуласә чиқириш қейин, мән сизгә һечнәрсә ейтип берәлмәймән" дәп, бизниң қумул вилайитидә йүз бәргән апәт әһвали, апәттин келип чиққан зиян, кәлкүнгә учриған аһалиларниң һазирқи вәзийити вә кәлкүн йәнә давамлашса униң алдини елиш чарә - тәдбирлири һәққидә сориған суаллиримизниң биригиму җаваб бәрмиди.

Уйғур пухралириниң җаваби

Биз қумул шәһиридики бир қанчә аһалигә телефун уруп, кәлкүн тоғрисида ениқрақ учур игиләшкә тиришқан болсақму, бир хитай пуқраси"мениң кәлкүндин ениқ хәвирим йоқ " деди. Йәнә бир уйғурму бизгә қанаәтлинәрлик җаваб бәрмиди.

Биз йәнә кәлкүнниң турпан вилайитидики йезиларға еғир зиянларни елип кәлгәнликидин хәвәрдар болған идуқ, турпан шәһиридә турушлуқ бир уйғур қиз зияритимизни қобул қилип, кәлкүнниң һәқиқәтән чәт йезилардики деһқанларға еғир зиян йәткүзгәнликини ейтти. (Әқидә)