Uyghur élide kelkün apiti dawamlashmaqta

• Muxbirimiz eqidening bu heqtiki toluq melumati
• Download story audio

Uyghur élining bir qisim jaylirida 16 ‏- iyul künidin buyan yaqqan qattiq yamghur, kelkün apiti peyda qilip, qatnashning éghir derijide tosulup qélishini hetta bir kishining ölümini, 5 kishining iz - déreksiz yoqap kétishini meydan'gha keltürgen.

Istansimiz kelkün apiti éghir derijide yüz bergen qumul, turpan qatarliq jaylardin melumat igilesh üchün, qumul wilayetlik hawa rayi idarisi we qumul sheher ahalisi shuningdek turpandiki ahalilerge téléfun urdi.

Apet asasen Uyghur élining sherqi shimal rayonida

Xitay axbarat wastiliri, Uyghur élining qumul we turpan wilayetliri, sanji oblasti we qanas sayahet rayonlirida éghir kelkün apiti yüz bériwatqanliqini, hetta mori nahiyiside bir kishining qaza qilip, 4 kishining kömülüp qalghanliqini 5 kishining iz - déreksiz yoqap ketkenlikini hemde apet yüz bergen jaylardiki tash yollarning buzulghanliqidin nechche yüzligen aptomobil we nechche yüzligen yoluchilarning nishanigha yételmey toxtap qélishqa mejbur bolghanliqini élan qilmaqta.

Istansimiz aptonom rayonluq hawa rayi idarisi we kelkündin mudapi'e körüsh ishxanisi qatarliq orunlardin yüz bergen kelkün apiti heqqide tepsiliy melumat élish üchün köp izden'gen bolsaqmu , emma téléfun turupkisini alidighan kishi chiqmidi.

Ziyaritimiz jawabsiz qaldi

Biz yene apet eng éghir yüz bergen qumul wilayitidin melumat igilesh üchün, qumul wilayetlik hawa rayi idarisining bashliqi wéy génchéngni ziyaret qilduq.

Wéy géngchéng bizdin aldi bilen, siler qaysi axbarat idarisining dep soridi.

Amérikidiki erkin asiya radi'osidin téléfun uruwatqanliqimizdin xewerdar bolghan hawa rayi idarisining bu mes'uli, "salahiyitinglar éniq emes iken, bizning sirtqa melumat bérishte bir qatar qa'ide - prinsiplirimiz bar, uning üstige hazir apet ehwalidin téxi éniq xulase chiqirish qéyin, men sizge héchnerse éytip bérelmeymen" dep, bizning qumul wilayitide yüz bergen apet ehwali, apettin kélip chiqqan ziyan, kelkün'ge uchrighan ahalilarning hazirqi weziyiti we kelkün yene dawamlashsa uning aldini élish chare - tedbirliri heqqide sorighan su'allirimizning birigimu jawab bermidi.

Uyghur puxralirining jawabi

Biz qumul shehiridiki bir qanche ahalige téléfun urup, kelkün toghrisida éniqraq uchur igileshke tirishqan bolsaqmu, bir xitay puqrasi"méning kelkündin éniq xewirim yoq " dédi. Yene bir Uyghurmu bizge qana'etlinerlik jawab bermidi.

Biz yene kelkünning turpan wilayitidiki yézilargha éghir ziyanlarni élip kelgenlikidin xewerdar bolghan iduq, turpan shehiride turushluq bir Uyghur qiz ziyaritimizni qobul qilip, kelkünning heqiqeten chet yézilardiki déhqanlargha éghir ziyan yetküzgenlikini éytti. (Eqide)