Алтай кәлкүн апитиниң зәрбисигә учриди


2005.06.02

Алтайдики мунасивәтлик даириләрдин игә болушимизчә, бир һәптидин буян алтайниң һава келимати асасән ямғурлуқ болған болуп, 1 - июнда ямғур күчийип бәзидә мөлдүргә айланған. Қаттиқ яққан ямғур кәлкүн пәйда қилип, алтай шәһәр ичидики кочиларға толған суниң чоңқурлиқи 40 сантиметирдинму ешип кәлкән.

Алтай шәһәр ичиниң қатнаш, учур -алақә ишлири дәхлигә учрап тохтап қалғандин башқа, һазирғичә бәзи көрүкләр үзүлүп, икки өй өрүлгән һәмдә нурғун идарә - орган һәмдә сода дуканлириға су киргән.

Зия хели көп болған

Алтай шәһәр ичигә қариғанда, алтайниң бурчин вә қаба наһийилиридә апәтниң кәлтүрүп чиқарған зиянлири техиму еғир икән.

ямғурда бурчин дәрясиниң сүйи шиддәт билән көтүрүлүп, бурчин наһийисиға қиян кәлгән. Вә йәнә, қаба дәрясиниңму сүйи тешип, әтраптики йеза - наһийиләрдә охшимиған дәриҗидә кәлкүн апити туғдурған.

Тәңритағ тор бетидә алтайдики кәлкүн апити һәққидә, 2 - июн күни бәргән хәвәрдә көрситилишичә, апәт бир қәдәр еғир болған бурчин наһийисиниң тағлиқ районлирида 700 аилә 3000 миң киши бихәтәр җайларға көчүрүлгән.

Уйғур райони ахбарат орунлириниң хәвиригә қариғанда, бәхткә яриша, бу қетимқи кәлкүндә һазирға қәдәр техи өлүм - йетим вәқәлири көрүлмигән болсиму әмма толуқ болмиған истатистикиларға асасланғанда, бу кәлкүндә алтай шәһәр ичиниң учриған бивастә иқтисади зийини 8милйон юәндин ашқан. Икки өй өрүлгәндин башқа җәмий 301 еғиз өй хәтәрлик өйләргә айланған. 910 Мо терилғу йәр вәйран қилинған. Йәнә 60 туяқ мал-варанни кәлкүн еқитип кәткән.

Апәт әһвали хели еғир

Һазирғичә, алтай даирилири техи кәлкүн еғиррақ болған қаба һәмдә бурчин наһийилириниң апәт әһвали һәққидә толуқ мәлумат бәрмиди. Биз кәлкүн апитиниң зәрбисигә бәкрәк учриған қаба һәмдә бурчин наһийилириниң апәт әһвалини игиләшкә тириштуқ.

Алтай вилайәтлик һөкүмәтниң кәлкүндин мудапиәлиниш ишханисиға телефон қилғинимизда, зияритимизни қобул қилған хадим, һөкүмәт орунлириниң дәрһал һәрикәт қилип кәлкүнни тизгинливалғанлиқини, һазирғичә һечқандақ адәм өлгән әһвалларниң көрүлмигәнликини һәмдә башқа наһийиләрниң апәт әһвалидин техи толуқ истатистика чиқирип болалмиғанлиқини, дәря әтрапидики наһийиләрниң апәт әһвалиниң бир қәдәр еғир икәнликини билдүрди.

Игилишимизчә, алтайда һазирғичә ямғур тохтимай йеғиватқан болуп, тағлиқ районларда ямғур техиму қаттиқ йеғиватқан болғачқа кәлкүнни тизгинләш ишлири қийин болмақта икән. Бу һәқтә қаба наһийилик һөкүмәт ишханисиниң бир хадими телефонни елип "наһийимиздә көлбай йезисиниң әһвали бир қәдәр еғир, көп өйләр өрүлди, наһийимизниң терилғу йәрлириниң үчтин икки қисмини кәлкүн вәйран қилинди, наһийиниң, йезиниң рәһбәрлири тәкшүрүшкә чүшүп кәткән, башқа әһваллири әтә мәлум болиду" –деди.

Һөкүмәттин техи ярдәм кәлмигән

Биз йәнә қаба наһийиси көлбай йезисидики бир қазақ чарвичидин апәт әһвалини игилидуқ. Бу қазақ чарвичи мухбиримизниң зияритини қобул қилип, йезида ямғур қаттиқ йеғиватқанлиқини кәлкүндә чарвичиларниң өйлири, қотанлири өрүлүп еғир әһвалда қалғанлиқини билдурди. У киши йәнә өйлири өрүлгән чарвичиларниң амалсиз қалғанлиқини, һөкүмәттин техи һечким ярдәмгә кәлмигәнликини ейтти. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.