Altay kelkün apitining zerbisige uchridi


2005.06.02

Altaydiki munasiwetlik da'irilerdin ige bolushimizche, bir heptidin buyan altayning hawa kélimati asasen yamghurluq bolghan bolup, 1 - iyunda yamghur küchiyip bezide möldürge aylan'ghan. Qattiq yaqqan yamghur kelkün peyda qilip, altay sheher ichidiki kochilargha tolghan suning chongqurliqi 40 santimétirdinmu éship kelken.

Altay sheher ichining qatnash, uchur -alaqe ishliri dexlige uchrap toxtap qalghandin bashqa, hazirghiche bezi körükler üzülüp, ikki öy örülgen hemde nurghun idare - organ hemde soda dukanlirigha su kirgen.

Ziya xéli köp bolghan

Altay sheher ichige qarighanda, altayning burchin we qaba nahiyiliride apetning keltürüp chiqarghan ziyanliri téximu éghir iken.

Yamghurda burchin deryasining süyi shiddet bilen kötürülüp, burchin nahiyisigha qiyan kelgen. We yene, qaba deryasiningmu süyi téship, etraptiki yéza - nahiyilerde oxshimighan derijide kelkün apiti tughdurghan.

Tengritagh tor bétide altaydiki kelkün apiti heqqide, 2 - iyun küni bergen xewerde körsitilishiche, apet bir qeder éghir bolghan burchin nahiyisining taghliq rayonlirida 700 a'ile 3000 ming kishi bixeter jaylargha köchürülgen.

Uyghur rayoni axbarat orunlirining xewirige qarighanda, bextke yarisha, bu qétimqi kelkünde hazirgha qeder téxi ölüm - yétim weqeliri körülmigen bolsimu emma toluq bolmighan istatistikilargha asaslan'ghanda, bu kelkünde altay sheher ichining uchrighan biwaste iqtisadi ziyini 8milyon yu'endin ashqan. Ikki öy örülgendin bashqa jem'iy 301 éghiz öy xeterlik öylerge aylan'ghan. 910 Mo térilghu yer weyran qilin'ghan. Yene 60 tuyaq mal-waranni kelkün éqitip ketken.

Apet ehwali xéli éghir

Hazirghiche, altay da'iriliri téxi kelkün éghirraq bolghan qaba hemde burchin nahiyilirining apet ehwali heqqide toluq melumat bermidi. Biz kelkün apitining zerbisige bekrek uchrighan qaba hemde burchin nahiyilirining apet ehwalini igileshke tirishtuq.

Altay wilayetlik hökümetning kelkündin mudapi'elinish ishxanisigha téléfon qilghinimizda, ziyaritimizni qobul qilghan xadim, hökümet orunlirining derhal heriket qilip kelkünni tizginliwalghanliqini, hazirghiche héchqandaq adem ölgen ehwallarning körülmigenlikini hemde bashqa nahiyilerning apet ehwalidin téxi toluq istatistika chiqirip bolalmighanliqini, derya etrapidiki nahiyilerning apet ehwalining bir qeder éghir ikenlikini bildürdi.

Igilishimizche, altayda hazirghiche yamghur toxtimay yéghiwatqan bolup, taghliq rayonlarda yamghur téximu qattiq yéghiwatqan bolghachqa kelkünni tizginlesh ishliri qiyin bolmaqta iken. Bu heqte qaba nahiyilik hökümet ishxanisining bir xadimi téléfonni élip "nahiyimizde kölbay yézisining ehwali bir qeder éghir, köp öyler örüldi, nahiyimizning térilghu yerlirining üchtin ikki qismini kelkün weyran qilindi, nahiyining, yézining rehberliri tekshürüshke chüshüp ketken, bashqa ehwalliri ete melum bolidu" –dédi.

Hökümettin téxi yardem kelmigen

Biz yene qaba nahiyisi kölbay yézisidiki bir qazaq charwichidin apet ehwalini igiliduq. Bu qazaq charwichi muxbirimizning ziyaritini qobul qilip, yézida yamghur qattiq yéghiwatqanliqini kelkünde charwichilarning öyliri, qotanliri örülüp éghir ehwalda qalghanliqini bildurdi. U kishi yene öyliri örülgen charwichilarning amalsiz qalghanliqini, hökümettin téxi héchkim yardemge kelmigenlikini éytti. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.