Xitay yer shari kilimatining issip kétishidin qattiq endishe qilmaqta

• Muxbirimiz méhribanning bu heqtiki melumati
• Download story audio

Mutexessislerning bildürüshiche, hawa kilimati tüpeylidin kélip chiqqan apetning bashqa apetlerge qarighanda, xitay iqtisadigha élip kélidighan ziyini téximu zor iken. Yéqinda, xitay hawarayi idarisi we xitay pen ‏-téxnika ministirliki birlikte achqan axbarat élan qilish yighinida we shundaqla birlikte élan qilghan bu heqtiki bu heqtiki doklatida, yershari hawa kélimatining issip kétishi xitaydiki tebi'iy apet we su menbesining kemchillikini keltürüp chiqiridighanliqi tekitlinip, xitay hökümitining bu xil halettin qattiq endishe qiliwatqanliqini bildürgen.

Xitay hawarayi idarisi we xitay pen ‏-téxnika ministirliki birlikte élan qilghan yer shari hawa kilimati heqqidiki bu doklatta yene, hawaning issip kétishi xitayning gherbiy rayonidiki su menb'esigimu zor tesir yetküzidighanliqi, shundaqla mezkur rayonda bundin kéyin apet xaraktérliq hawa kilimatining téximu köpiyidighanliqi, muztaghlarning aziyishi bilen derya ‏-éqin sulirining téximu aziyip kétidighanliqi alahide tekitlen'gen.

Kilimatning issishi xitayda tebi'iy apet we su menbesining kemchillikini keltürüp chiqiridu

Washin'gtondiki xelq'ara muhitni qoghdash orginining mes'uli jéni xanim yer shari hawa kilimatining issip kétishi heqiqeten xitaydiki tebi'iy apet we su menbesining kemchillikini keltürüp chiqiridighanliqini tekitlep mundaq dédi:

"Yer shari hawa kilimatining issip kétishi hazirdin bashlap yaman aqiwetlerni élip kélishke bashlidi. Xitay hökümitining bu heqte élan qilghan doklatida perez qilghanlirining hemmisi toghra. Xitayning derya éqinlirining su asasen muz taghlardin kélidu. Lékin hazir xitaydiki muz taghlar barghanséri aziyip, xitayning su menbesimu intayin kemchil halette qalghan. Bundaq bolushi xitaydiki yer asti suni qalaymiqan ishlitilgenliki we éghir derijide bulghinip ketkenlikidin".

Hawa kilimatning özgirishi xitaydiki ashliq ishlep chiqirish ishlirigha biwaste tesir körsitidu

Xitay dölet muhitni qoghdash idarisining bashliqi juw shingshyen yéqinda xitaydiki su menbesining intayin kemchil boluwatqanliqini tekitlep, "xitayda hazir az dégende 300 milyon yéza xelqi bulghan'ghan suni istimal qiliwatidu" dep bildürdi.

Xitay hawarayi idarisi we xitay pen ‏-téxnika ministirliki birlikte élan qilghan doklatta tekitlinishiche, hawa kilimatning özgirishi xitaydiki ashliq ishlep chiqirish ishlirigha biwaste tesir körsitidiken. Xitay hawarayi idarisining mes'uli lu yung "xitay hazir ashliq ishlepchiqirishta zor xeterge duch kelmekte. Chünki hawarayining özgirishi xitaydiki ashliq ishlepchiqirish ishlirigha eng biwaste tesir körsetmekte. Bu xitayning yéza igilik sahesige bolghan bir artuqche bésim bolup qaldi" dep bildürdi.

Xitay pen -téxnika waqit gézitide bérilgen melumatta körsitilishiche, hawa kelimatining issishi tüpeylidin, xitayda ishlepchiqirilidighan déhqanchiliq mehsulat türliridimu köp özgirishler bolidiken. Hazirning özide, yeni térilghu qanuniyiti we mehsulat türi özgermigen shara'itta, hawaning issip kétishining özi ashliq ishlep chiqirish nisbitini 10%etrapida töwenlitiwétidiken.

Mutexessislerning körsitishiche, xitaydiki hawa we suning bulghinish derijisi heqiqeten nahayiti éghir bolup, bundin kéyin yer shari hawa kilimatning issip kétishi bilen, bu xil ehwal téximu éghirlishishi mumkin iken.

En'giliye b b s radi'o téléwiziye shirkitining xitaydiki muhit we bulghan'ghan su mesilisi heqqide bergen melumatida, "gerche xitay hökümiti muhitni asrash mesiliside jiddiy chare tedbirlerni qolliniwatqanliqini bildürgen bolsimu, xitaydiki muhitni qoghdash emeldarliri bulghinish mesilisi heqqide bergen doklatlirida dawamliq saxtiliq we köz boyamchiliq qilmaqta" dep bildürülgen. (Méhriban)