Oqughuchilarni paxta térishke kim orunlashturghan?


2005-09-27
Share

Biz ata - ana we oqughuchi - oqutquchilarning naraziliqini közde tutup, oqughuchilarning paxta térishi heqqide mexsus belgilime tüzüp chiqqan aptonom rayonluq ma'arip komitétigha téléfon qilduq.

Ziyaritimizni qobul qilghan bir xadim "ata - anilarning bu xil könglini toghra chüshinishke bolidu. Lékin yene bir nuqtidin qarighanda, oqughuchi balilarning bundaq emgeklerge qatnishishi ular üchün bir xil chiniqish. Bu xil oqup turup ishlesh pa'aliyiti her yili dawamliship kéliwatidu" dep bildürdi.

Yerlik: merkezning orunlashturushi

Ziyaritimizni qobul qilghan ma'arip komitétining bu xadimi muxbirimizning "oqup turup ishlesh" dégen herikitinglarni oqughuchilargha paxta tergüzüsh bilen emes, belki bashqa türlük yénikrek emgeklerni qildurush arqiliq élip barsanglar bolmamdu ?” dégen so'aligha jawab bérip mundaq dédi:

"Kéwezlikke bizmu barghan, heqiqeten nahayiti japaliq, lékin bu yuqiridin kelgen höjjet boyiche orunlashturulghan ish. Biz buni özgertimiz depla özgertelmeymiz. Bizningmu ularni bundaq éghir emgekke salghimiz yoq. Bizning buninggha amalimiz yoq. Biz höjjet boyiche ish qilmisaq bolmaydu. Eger bashqa türdiki emgekke almashturidighan ish bolsa, aldi bilen yuqirining testiqi boyiche bolidu. Yuqiri testiqlimay turup, biz öz aldimizgha özgertelmeymiz. Shunga eger bu heqte pikiringlar bolsa, merkiziy ma'arip komitétigha biwaste téléfon qilip inkas qilsanglar bolidu".

Merkez: yerlikning orunlashturushi

Biz aptonom rayonluq ma'arip komitétining dégini boyiche, béyjingdiki merkiziy ma'arip komitétigha téléfon qilduq. Lékin téléfonimizni alghan melum bir ishxana bashliqi so'alimizgha jawab bérip "ma'arip komitéti peqet makroluq siyasetnila békitidu. Konkrét we emeliy mesililerni, yenila yerlik özi bashquridu" dep oqughuchilarning paxta térish emgikige qatnishishigha aptonom rayonluq ma'arip komitéti özi mes'ul bolushi kéreklikini bildürdi.

Uyghur élidiki bashlan'ghuch mektep balilirining éghir hem uzun muddetlik paxta térish emgikige séliniwatqanliqidin xewerdar bolghan washin'gtondiki xitay uchur merkizining mes'uli chin küydé ependi bu heqte toxtilip mundaq dédi:

"Menche bu, yash - ösmür balilarni xorlap, ularni nabut qilghanliq. Emeliyette bu balilarni uqughuchi ornida emes, belki bala ishchi ornida qul qilip ishletkenlik. Bundaq qilish xelq'ara qanunda qattiq cheklen'gen. Xitayning balilarni bundaq éghir emgekke sélishi bekmu chong bir mesile. Buninggha hergizmu sel qarimasliq kérek. Ular balilarning qan teri arqiliq özige iqtisadiy menpe'et élip kélishnila oylap, balilarni meyli jismaniy jehette bolsun yaki rohi jehette bolsun, qattiq azablimaqta. Bu, xitayning ma'arip sistémisida mewjut bolup turiwatqan éghir mesililerni körsitip béridu. Xitay ma'arip sistémisida, herqandaq bir belgilimini békitkende, hergizmu oqughuchi, oqutquchi yaki mektep, ata -ana qatarliqlarning pikirini asasiy orun'gha qoymaydu. Ular peqet yuqirining yolyoruqi boyiche buyruq ijra qilishnila bilidu". (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet