Aqsu sheher yéngi bazardiki Uyghurlar mejburi köchürülmekte

• Muxbirimiz gülchéhrening bu heqtiki toluq melumati
• Download story audio

Yéqinda bir Uyghurning melumat yetküzüshiche, aqsu shehride bir qanche yildin buyan hökümet bir qisim xitay ölkiliridin kelgen meblegh salghuchilar bilen birliship, sheher ichide olturaqliship kelgen yerlik Uyghurlarni öyliridin mejburi köchürüp, qedimi Uyghur mehellilirini chéqip uning ornigha égiz imaret yaki bashqa soda orunlirini qurmaqta iken. Shundaqla bu xil mejburi öy köchürüsh chéqish herikiti Uyghurlarning naraziliqigha qarimay dawam qilmaqta iken.

Ismini ashkarilashni xalimighan bu kishining bildürüshiche, yéqinda yene aqsuning Uyghurlar zich olturaqlashqan rayoni bolghan yéngi bazarda hökümet Uyghurlarni mejburi köchürüwatqan bolup, hökümet yerlik ammining öylirini erzan bahalap éliwalghandin sirt yene ularni, turmush, qatnash esliheliri qolaysiz bolghan sheher sirtidiki kona ayrodrom terepke köchürmekte iken.

Hökümet terep bu öy köchürüshke maslashqanlarni mukapatlap, qarshi chiqquchilargha bolsa xizmitidin haydap hetta solap qoyush arqiliq bésim ishlitip köchürmekte iken.

Texirsiz inkas

Bizge melumat bergüchi kishi xitay hökümitining Uyghurlarni ziminliridin mejburi köchürüwatqanliqigha nahayiti narazi ikenlikini bildürüp "bu öylerge chiqarghan baha intayin töwen, hökümetning bu öylerge bergen puligha aqsu shehrining héchqandaq bulungidin öy sétiwalalmaymiz, biraq hökümet bizdin alghan yer - zéminlarni ichkiridin kelgen xitaylargha özgertip qurush üchün yuqiri bahada satidu. Hazir aqsuning kochiliridin Uyghurni tapmaq tes bolup ketti chünki Uyghurlarning köpükchisi sheherning sirtidiki nahayiti chet, muhiti nachar, qolaysiz jaylargha köchürülmekte. Mushu sewebtin nurghun a'ililer weyran boldi. "Dédi.

Uyghurlarning oylirining chéqilishidiki heqiqiy seweb nime?

Biz ige bolghan bu uchurgha asasen aqsu shehiri yéngi bazardin melumat élishqa tirish tuq. Yéngi bazarda téxi chiqilmighan bir qanchila öyler qalghan bolup, bir Uyghur qiz, bu mehellide dawamlishiwatqan öy chiqish ishliri heqqide sorighan so'allirimizgha jawab berdi.

Gerche öy igiliri hökümetning buyruqi bilen köchürüwatqan bolsimu néme üchün köchürüliwatqanliqi özlirigimu mujimel bolup, bir qanche kishidin oxshimighan jawablarni alduq. Yene bir a'ilidin bir qiz, hökümetning yéngi bazarning ornigha bir sayahet rayoni qurmaqchi boliwatqanliqini bildürdi.

Öylerni mejburi chéqish hökümet élip bériwatqanliqi üchünla qanunluqmu?

Biz hökümetning bu öylerni qandaq bahalawatqanliqi, xelqning buninggha qarita pikri, ularning öy köchüshke qandaq usullarda mejburliniwatqanliqigha da'ir yenimu éniq melumat élish üchün waqtinche bu mehellide chéqishni saqlap turghan bir nechche a'ililikke téléfon qilghan bolsaqmu, ular bu heqte bizge melumat berse hökümet tereptin birer awarigerchilikke yoluqup qélishidin ensirep ziyaritimizni ret qildi. Biz kéyinki programmimizda aqsudiki munasiwetlik orunlardin yéngi bazardiki Uyghurlarning mejburi köchürülishige da'ir yenimu tepsili melumatlar élishqa tirishimiz.