Astanada kolléktip bixeterlik shertnamisi teshkilatining nöwettiki uchrishish bolup ötti

Yéqinda qazaqistan paytexti astanada kolléktip bixeterlik shertnamisi teshkilatigha eza memliketler rehberlirining gheyriy resmiy uchrishishi bolup ötti.
Ixtiyariy muxbirimiz oyghan
2011-08-18
Share
kollektip-bixeterlik-shertnamisi-305.jpg Astanada kolléktip bixeterlik shertnamisi teshkilatining nöwettiki uchrishishigha qatnashqan wekiller. 2011-Yili 12-awghust.
AFP

Uninggha qatnashqan rusiye, bélorusiye, qirghizistan, erminiye, tajikistan we qazaqistan prézidéntliri teshkilat aldida turghan muhim mesililerni muhakime qilghan.

"Kazaxstanskaya prawda" gézitining melumatlirigha qarighanda, qazaqistan prézidénti nursultan nazarbayéf mezkur uchrishishning échilish murasimida bir qatar mesililerni, shu jümlidin amérika qoshma shtatlirining öz eskerlirini afghanistandin chiqirishi, teshkilatning jawabkarliqi astida turuwatqan rayonlarda yüz bériwatqan tebi'iy apetlerge qarshi turush, xelq ariliq térrorchiliq xewpining küchiyishi, qanunsiz qoral-yaraq we zeherlik chékimlik etkeschiliki qatarliq mesililerni muhakime qilishning muhimliqini ilgiri sürgen.

U axbarat bixeterliki boyichimu bir qatar mesililerning mewjut ikenlikini bildürgen hemde hazirqi murekkep weziyette mundaq mesililerni kéchiktürmey hel qilishta teshkilat ezalirining chong küch chiqirish hajetlikini tekitligen. U mundaq dégen:
-Biz bügün kolléktip bixeterlik shertnamisi teshkilatigha eza döletlerning bixeterliki we turaqliqi üchün xelq'araliq we rayonluq xaraktérge ige xewplerge oxshash mesililer boyiche pikir almashturush meqsitide yighilduq. Buningdin tashqiri, teshkilat qatnashquchiliri arisida tughuluwatqan mesililerni hel qilish bilen bille teshkilat pa'aliyitining sapasini kötürüshning zörürlüki ayan bolmaqta.

Shuningdin kéyin söz alghan teshkilatning bu yilqi re'islik wezipisini atqurghuchi bélorusiye prézidénti uchrishish qatnashquchilirigha utuqlar tilep, xelq'ara meydanda qéliplashqan bezi mesililerni bu teshkilat da'iriside muhakime qilishning, shundaqla uning her bir qatnashquchisining tutqan mewqesini éniqlashning zörürlükini bildürdi.

Uchrishish dawamida, bolupmu shimaliy afriqa hem yéqin sherq weziyiti, shundaqla merkiziy asiyadiki bixeterlikni teminlesh boyiche teshkilatning tutqan mewqeliri we bélorusiyining teshkilatni rawajlandurush boyiche otturigha qoyghan tekliplirini emelge ashurush ishliri muhakime qilindi. Gézitte éytilishiche, uchrishishning bezi netijilirini bélorusiye prézidénti aléksandir lukashénko we teshkilatning bash katipi nikolay bordyuzha zhurnalistlar aldida bildürgen.

A. Lukashénko teshkilatni kücheytish mesiliside uning qatnashquchilirining bir qarargha kelgenlikini, bu qararning éniq ish-heriketlerge asaslinidighanliqini, her bir qatnashquchining öz ishigha jawabkarliq bilen qarighanliqini, shuning bilen bir qatarda teshkilat ichide orun alghan bezi ichki kamchiliqlarnimu körsetken.

Melumatlargha qarighanda, teshkilat rehberliri deslepki qétim qazaqistanning borowo'é rayonida, andin qirghizistanning cholpan-ata, shundaqla rusiye we erminiye paytextliri moskwa we yéréwan sheherliride uchrashqan.

Peqet kolléktip bixeterlik shertnamisi teshkilatila emes, belki musteqil döletler hemkarliqi, yawro'asiya iqtisadiy ittipaqi da'irisidimu memliketler rehberliri yawro'asiya döletlirining turaqliqi we güllinishi üchün birliship heriket qilish niyitide bolmaqta.

"Kommmérsant" gézitide élan qilin'ghan "Birleshme inqilabqa qarshi teshkilatqa aylanmaqta" maqalisining aptori aléksandir gabuyéf astana uchrishishi netijilirini mundaq dep chüshendürgen: birinchidin, uchrishish qatnashquchiliri teshkilatni "Renglik inqilablar" yolidiki qoghdash qoshunigha aylandurushqa kélishti, ikkinchidin, teshkilat ezaliri ereb mezmunidiki tertibsizliklerning bashlinishi teqdiride özlirining kolléktip küchlirini mustehkemlesh qararigha keldi. Maqale aptori shundaqla teshkilatning resmiy we gheyriy resmiy uchrishishliri otturisidiki periqlerni körsitip, gheyriy resmiy uchrishishlarda birer qarar qobul qilish we höjjetke qol qoyush shertining pilanlanmaydighanliqini tekitligen.

Aléksandr gabuyéf mezkur uchrishish qatnashquchilirini hakimiyet üstide uzaq muddet olturush alahidilikining birleshtüridighanliqini éytip kélip, ularning ehwalini tunis, misir we liwiye rehberlirining teqdiri bilen sélishturghan hemde qazaqistan prézidéntining textte 20 yil, tajikistan we bélorusiye prézidéntlirining 17 yil olturghanliqini eskertken. U shundaqla analizchilarning kolléktip bixeterlik shertnamisi teshkilatining heqiqetenmu inqilablargha qarshi mustehkem ittipaq quralaydighanliqidin gumanliniwatqanliqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet