Талибанларниң баянатчиси җәнубий корийиниң әлчиси билән телефон арқилиқ сөзләшти


2007.08.03

Афғанистанда талибанлар тәрипидин гөрүгә елинған 21 нәпәр пуқрасини қутқузуш үчүн һәрбий һәрикәт елип берилишини қәтий рәт қилған җәнубий корийә һөкүмити, талибанлар билән бивастә алақә қурған болуп, юқирида баян қилинғандәк, талибанлар билән сөһбәт орнини бәлгиләш үчүн тиришмақта.

Җүмә күни телефон арқилиқ җәнубий корийиниң баш әлчиси каң суңзу билән көрөшкәнликини тәкитлигән талибанларниң баянатчиси юсоф әхмәди, "җәнубий корийә баш әлчиси, гөрүгә елинған җәнубий корийиликләрни қутқузуш үчүн түрмидики талибан паалийәтчилирини қоюп бериш мәсилисидә афғанистан вә америка һөкүмитини қайил қилишқа тиришиватқанлиқини билдүрди" дәп көрсәтти.

Дәсләптә талибанлар сөһбәтниң афғанистан һөкүмити контроллиқидики районда елип берлишиға қарши чиққан иди. Лекин җүмә күни талибанларниң баянатчиси," әгәр б д т ниң афғанистандики ишханиси җәнубий корийә һөкүмәт хадимлири билән елип берилидиған сөһбәткә қатнишидиған талибан вәкиллириниң бихәтәрликигә капаләтлик қилиса, талибанлар сөһбәтниң һөкүмәт контроллиқидики районда өткүзүлишини қобул қилиду" деди.

Җәнубий корийидики бир хирстиан гурупписиниң әзалири болған 16 си қиз вә аяллардин тәшикил тапқан 23 нәпәр җәнубий корийә пуқраси 19‏- июл күни афғанистанниң җәнубий районида талибанлар тәрипидин гөрүгә елинған иди.

Афғанистан һөкүмити талибанларниң тәлипини рәт қилмақта

Талибанлар, гөрүгә елинған җәнубий корийә пуқралириниң қоюп берилиши үчүн афғанистан һөкүмитидин түрмидики талибан мәһбуслирини қоюп беришни тәләп қилмақта. Лекин афғанистан һөкүмити талибанларниң бу тәлипини рәт қилмақта. Афғанистан һөкүмәт даирилири талибанларниң тәлипини қобул қилиш, уларни техиму җасарәтләндүрүп, гөрүгә елиш вәқәлирини техиму көпәйтиши мумкин, дейишмәктә.

Хәвәрләргә қариғанда, америка һөкүмити, талибанларниң тәләплирини қобул қилмаслиқ вә улар билән гөрүгә елинған корийә пуқралири мәсилисидә сөһбәт өткүзмәслик тоғрисида афғанистан һөкүмитигә бесим ишләтмәктә.

Әмма , гөрүгә елинған җәнубий корийә пуқралириниң көпинчисиниң саламәтлик әһвалиниң начар икәнлики вә афған һөкүмити тәләплирини қобул қилмиғанлиқи үчүн талибанларниң гөрүгә елинғанларниң иккисини өлтүргәнлики һәм җәнубий корийә һөкүмитини һәмдә хәлқара җамаәтни уларни қутқузуш үчүн җиддий һәрикәт қилишқа мәҗбурлаватиду.

" Талибанларға мумкин болған пүтүн бесимни ишлитиш керәк"

Пәйшәнбә күни 40 әтрапида аммивий тәшкилат америка һөкүмитидин, гөрүгә елинған җәнубий корийә пуқралириниң өлтүрүлишиниң алдини елиш үчүн, җәнубий корийигә вакалитән талибанлар билән бивастә сөһбәт елип беришини тәләп қилди.

Гөрүгә елинған пуқралирини қутқузуш үчүн, һәрбий һәрикәт елип берилишиға қарши чиққан җәнубий корийә һөкүмити, бу мәсилини сөһбәт арқилиқ бир тәрәп қилиш мәсилисигә ярдәм бериши үчүн америка һөкүмитигә бесим ишләтмәктә. Лекин , афғанистанни зиярәт қиливатқан америка ташқи ишлар ярдәмчи минстири ричард бавчәр, гөрүгә елинған җәнубий корийә пуқралирини қутқузуш үчүн талибанларға мумкин болған пүтүн бесимни ишлитиш керәк. Гөрүгә елинғанларни қутқузуш үчүн елинидиған тәдбирләрниң һәрбий һәрикәтниму өз ичигә алидиғанлиқини тәкитлиди.

Сиясий мулаһизичиләрниң ейтишичә, йеқинда афғанистанда йүз бәргән гөрүгә елиш вәқәлири, талибанлар һакимийити гумран болуп 6 йилға йеқин бир вақит өткән болсиму, афғанистанда бихәтәрлик мәсилисиниң техи бир тәрәп болмиғанлиқини, әксичә, вәзийәтниң күнсери җиддийлишиватқанлиқини көрситидикән. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.