Talibanlarning bayanatchisi jenubiy koriyining elchisi bilen téléfon arqiliq sözleshti


2007.08.03

Afghanistanda talibanlar teripidin görüge élin'ghan 21 neper puqrasini qutquzush üchün herbiy heriket élip bérilishini qet'iy ret qilghan jenubiy koriye hökümiti, talibanlar bilen biwaste alaqe qurghan bolup, yuqirida bayan qilin'ghandek, talibanlar bilen söhbet ornini belgilesh üchün tirishmaqta.

Jüme küni téléfon arqiliq jenubiy koriyining bash elchisi kang sungzu bilen köröshkenlikini tekitligen talibanlarning bayanatchisi yusof exmedi, "jenubiy koriye bash elchisi, görüge élin'ghan jenubiy koriyiliklerni qutquzush üchün türmidiki taliban pa'aliyetchilirini qoyup bérish mesiliside afghanistan we amérika hökümitini qayil qilishqa tirishiwatqanliqini bildürdi" dep körsetti.

Deslepte talibanlar söhbetning afghanistan hökümiti kontrolliqidiki rayonda élip bérlishigha qarshi chiqqan idi. Lékin jüme küni talibanlarning bayanatchisi," eger b d t ning afghanistandiki ishxanisi jenubiy koriye hökümet xadimliri bilen élip bérilidighan söhbetke qatnishidighan taliban wekillirining bixeterlikige kapaletlik qilisa, talibanlar söhbetning hökümet kontrolliqidiki rayonda ötküzülishini qobul qilidu" dédi.

Jenubiy koriyidiki bir xirsti'an guruppisining ezaliri bolghan 16 si qiz we ayallardin teshikil tapqan 23 neper jenubiy koriye puqrasi 19‏- iyul küni afghanistanning jenubiy rayonida talibanlar teripidin görüge élin'ghan idi.

Afghanistan hökümiti talibanlarning telipini ret qilmaqta

Talibanlar, görüge élin'ghan jenubiy koriye puqralirining qoyup bérilishi üchün afghanistan hökümitidin türmidiki taliban mehbuslirini qoyup bérishni telep qilmaqta. Lékin afghanistan hökümiti talibanlarning bu telipini ret qilmaqta. Afghanistan hökümet da'iriliri talibanlarning telipini qobul qilish, ularni téximu jasaretlendürüp, görüge élish weqelirini téximu köpeytishi mumkin, déyishmekte.

Xewerlerge qarighanda, amérika hökümiti, talibanlarning teleplirini qobul qilmasliq we ular bilen görüge élin'ghan koriye puqraliri mesiliside söhbet ötküzmeslik toghrisida afghanistan hökümitige bésim ishletmekte.

Emma , görüge élin'ghan jenubiy koriye puqralirining köpinchisining salametlik ehwalining nachar ikenliki we afghan hökümiti teleplirini qobul qilmighanliqi üchün talibanlarning görüge élin'ghanlarning ikkisini öltürgenliki hem jenubiy koriye hökümitini hemde xelq'ara jama'etni ularni qutquzush üchün jiddiy heriket qilishqa mejburlawatidu.

" Talibanlargha mumkin bolghan pütün bésimni ishlitish kérek"

Peyshenbe küni 40 etrapida ammiwiy teshkilat amérika hökümitidin, görüge élin'ghan jenubiy koriye puqralirining öltürülishining aldini élish üchün, jenubiy koriyige wakaliten talibanlar bilen biwaste söhbet élip bérishini telep qildi.

Görüge élin'ghan puqralirini qutquzush üchün, herbiy heriket élip bérilishigha qarshi chiqqan jenubiy koriye hökümiti, bu mesilini söhbet arqiliq bir terep qilish mesilisige yardem bérishi üchün amérika hökümitige bésim ishletmekte. Lékin , afghanistanni ziyaret qiliwatqan amérika tashqi ishlar yardemchi minstiri richard bawcher, görüge élin'ghan jenubiy koriye puqralirini qutquzush üchün talibanlargha mumkin bolghan pütün bésimni ishlitish kérek. Görüge élin'ghanlarni qutquzush üchün élinidighan tedbirlerning herbiy heriketnimu öz ichige alidighanliqini tekitlidi.

Siyasiy mulahizichilerning éytishiche, yéqinda afghanistanda yüz bergen görüge élish weqeliri, talibanlar hakimiyiti gumran bolup 6 yilgha yéqin bir waqit ötken bolsimu, afghanistanda bixeterlik mesilisining téxi bir terep bolmighanliqini, eksiche, weziyetning künséri jiddiylishiwatqanliqini körsitidiken. (Ömer qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.