Xitay néme üchün 'koriye urushi' heqqide öz xelqighe ras gep qilmaydu?

Süret, seksen yashqa kirgen 'amérikigha qarshi turup, koriyige yardem bérish urushi'da mukapatlanghan xitay eskiri jiyang shöchuenning urushta alghan médal we déplomliri.

2010‏ - Yili 10 ‏ - ayning 25 ‏ - küni, xitay kommunist partiyisi teshkilligen 'xitay xelq pida'iy qisimliri' ning 'amérikigha qarshi turup koriyige yardem bérish urushi'gha atlan'ghanliqigha 60 yil toshqan kün. Shinxu'a agéntliqining xewer qilishiche, shimaliy koriyimu, xitaymu bu künni xatirilep daghdughiliq pa'aliyet ötküzdi.

Yéngi shara'ittiki amérikigha qarshi turup koriyige yardem bérish

Xewerde éytilishiche, pinyongda ötküzülgen xatirilesh pa'aliyitige, xitayning azadliq armiye wekiller ömikini öz ichige alghan halda 30 ming adem qatnashqan. Béyjingdiki xelq sariyida ötküzülgen xatirilesh pa'aliyitide, xitay re'isi xu jintaw eyni zamandiki pida'iy qisim komandirliri bilen körüshüsh qatarliq shekiller arqiliq, yéngi shara'ittiki amérikigha qarshi turup koriyige yardem bérishke ilham bergen.

Wiki iniskilopidiyisde bayan qilinishiche, shimaliy koriye 1950‏ - yili 6‏ - ayning 25‏ - küni, jenubiy koriyige hujum qilghan. 7 ‏ - Ayning 7‏ - küni, birleshken döletler teshkilati 84‏ - nomurluq qarar maqullap, amérika, en'gliye, kanada, awstraliye, fransiye, türkiye, jenubiy afriqa qatarliq 15 dölet qatnashqan b d t birleshme armiyisini, shimaliy koriyining kéngeymichilikini chékindürüshke ewetken. 1953‏ - Yili 7‏ - ayning 27‏ - küni urush toxtitish kélishimi imzalan'ghandin kéyin koriye urushi toxtighan. Bu urush dunyada 'koriye urushi' dep atilidu. Emma koriye urushida, shimaliy koriye qisimlirining hujum sépige xitay qisimliri qétiliwalghanliqi bir sir.

'Xitay 60 yildin buyan koriye urushini amérika qozghighan dep aldamchiliq qiliwatidu'

Musteqil tetqiqatchi lin bawxu'aning qarishiche, koriye urushi sowét ittpaqi herbiy qoral chiqirip, kommunist xitay hökümiti adem chiqirip shimaliy koriyini kéngeytish üchün qozghighan urush idi. Emma, xitay 60 yildin buyan buni 'amérika qozghighan urush' dep aldamchiliq qiliwatidu.

'Koriye urushi dégen tarixiy weqe toghrisida, men 25 yil aldan'ghan'

-Koriye urushi dégen tarixiy weqe toghrisida, men 25 yil aldan'ghan, ‏ - deydu lin bawxu'a ependi. Uning bayan qilishiche, xitay kommunist partiyisi 'koriye urushini amérika qozghighan' deliwergendin kéyin, u yash waqtida, hindonéziyide turuwatqandila, xitay kommunist partiyisining gépige ishinip ketken, köp yillarghiche 'koriye urushini amérika qozghighan' dep yürgen, xitay uyushturghan amérikigha qarshi pa'aliyetlergimu qatnashqan. Kéyin u xitaygha kélip oqughandimu amérikigha qarshi pa'aliyetlerge qatnashqan. Sowét ittipaqining bash sékritari xéroshéf eslimiside, 'koriye urushini shimaliy koriye qozghighan' dep iqrar qilghandin kéyin, u, xitay kommunist partiyisi burmilighan tarixni biliwalghan. Xitay kommunist partiyisining gépige ishenmeydighan bolghan.

'Xitay hökümiti hazirgha qeder, koriye urushi toghrisida qilghan aldamchiliqini iqrar qilmaywatidu'

- Xitaydimu köp adem koriye urushining ras hékayisini biliwaldi‏ -‏dep bayanini dawamlashturidu lin bawxu'a e'epndi, - xitay hökümiti özimu bu yil 6‏ - ayning 25 - küni, én'gilizche chiqidighan 'xelq géziti' de, koriye urushi toghrisida tarixshunas shén zixu'aning namida bir maqale élan qilip, bu arqiliq, koriye urushining shimaliy koriye qozghighan urush ikenlikini étirap qildi. Xitay gerche chet'elliklerge qarita bundaq dégen bolsimu, emma xitayche gézit -zhurnallarning héchqaysida undaq démidi. Shuningdin kéyin, 'koriye urushi' depla qoyidighan, emma kim qozghighanliqini hergiz démeydighan birxil müjimel ipadilesh shekli qollinidighan boluwaldi. Démek, xitay hökümiti hazirgha qeder, koriye urushi toghrisida qilghan aldamchiliqini iqrar qilmaywatidu.

'Xitay hazir shimaliy koriyini özining mustemliksige aylanduruwélishni oylawatsa kérek'

Lin bawxu'a ning qarishiche, xitayning hazirmu koriye urushini 'amérikigha qarshi turup koriyige yardem bérish urushi' dep xatirilewatqanliqida, yene bir yéngi xahish yoshurun'ghan. Xitay yillardin buyan 'koriye tarixta xitayning zémini' idi dep kéliwatqan idi, hazir kim yong'unning iz basar bolushini qet'iy qollap, shimaliy koriyining amérikigha qarshi turushta xitay bilen qan bilen yughurulghan dostluqi bar, dégenni gewdilendürüwatidu. Xitay emdi shimaliy koriyini özining mustemliksige aylanduruwélishni oylawatsa kérek.

Yuqiridiki awaz ulinishidin, bu heqtiki melumatimizning tepsilatini anglaysiler.