Җәнубий корийә парламент әзалириниң бейҗиңдики ахбарат елан йиғини хитай даирилириниң тосалғусиға учриди


2005-01-13
Share

Хитай даирилириниң тосалғусиға учриған төт нәпәр җәнубий корийә парламент әзасиниң бейҗиңдики мухбирларни күтүвелиш йиғини, җәнубий корийә билән хитай оттурисида дипломатик сүркилиш яратти.

Бейҗиң һөкүмити төт нәпәр җәнубий корийә парламент әзасиниң бейҗиңда мухбирларни күтүвелиш йиғини чақиришини қанунсиз, дәп җакарлиған шундақла уларниң әпу соришини тәләп қилған. Хитай даирилириниң һәрикити җәнубий корийә һөкүмитиниң наразилиқини қозғиди.

Мәхпий сақчиларниң тосқунлуқи

Хитайни зиярәт қиливатқан төт нәпәр җәнубий корийә парламент әзаси, чаршәнбә күни бейҗиңдики сәддичин -шеритон меһманханисида мухбирларни күтүвелиш йиғини чақирип, хитайниң шәрқий - шималидики өлкиләрдә мусапир болуп яшаватқан шимали корийиликләрниң әһвалини ашкарлимақчи болған. Амма хитайниң дөләт бихәтәрлик идарисидики мәхпий сақчилар йиғин мәйданиға үссүп кирип, мухбирларни тарқитивәткән шундақла парламент әзалири билән 11 саәткә йеқин вақит тиркәшкәндин кейин, уларниң қисқичә баянат беришигә йол қойған иди.

Ким әпу сориши керәк?

Хитай ташқи ишлар министирлиқиниң баянатчиси коң чүән, пәйшәнбә күни бейҗиңда өткүзүлгән мухбирларни күтүвелиш йиғинида, төт нәпәр җәнубий корийә парламент әзасини хитайда һөкүмәтниң рухситини алмай қанунсиз мухбирларни күтүвелиш йиғини чақириш билән әйиблигән. Җәнубий корийә һөкүмити хитай даирилириниң әпу соришини тәләп қилған. Бирақ, коң чүән бейҗиң һөкүмитиниң әпу соримайдиғанлиқини билдүргән.

Коң чүән мундақ дәйду: "мән хәвәрдә немә дийилгәнликини билмидим, бирақ хәвәрдикиләр раст болса, улар алди билән җоңгодин әпу сориши керәк". Бу вәқә җәнубий корийә даирилириниң наразилиқини қозғиған. Җәнубий корийә ташқи ишлар министирлиқи хитайниң җәнубий корийидики баш әлчисини чақиртип, вәқәдин нарази болғанлиқини билдүргән.

Коң чүән төт нәпәр парламент әзасиниң бири рәсми виза билән, қалған үч нәпәр парламент әзаси саяһәт визиси билән хитайға киргәнликини тәкитлиди. У, җәнубий корийә парламент әзалири техиму көп шимали корийиликниң хитайға қанунсиз кириши үчүн, учур билән тәминләшкә урунғанлиқини илгири сүргән. Парламент әзалирини "көз боямчиларға охшайду" дәп әйиблигән коң чүән, "улар бу йәргә саяһәтчиләр қияпити билән кәлгән шундақла мухбирларни күтүвелиш пурситидин пайдилинип, җоңго қанунлирини бузуш арқилиқ өз мәқситигә йәтмәкчи болған," дәп тәнқид қилди.

Амма бейҗиң даириниң хитайдики шималий корийилик мусапирларни дөлитигә қайтуруветиш һәрикити, җәнубий корийә парламент әзалирини ғәзәпләндүргән. "Америка авази" радиосиниң хәвәр қилишичә, җәнубий корийиликләр хитай мәхпий сақчилириниң мухбирларни күтүвелиш йиғинидики бузғунчилиқи, бейҗиң даирилириниң мусапирлар мәсилисидики мәйданини ашкарилайду, дәп қариған. Бейҗиң һөкүмити җәнубий корийилик мусапирлар мәсилисини назук мәсилиләр қатарида көрүп, мусапирларни шундақла мусапирларға ярдәм қилғанларни тутқун қилип кәлди.

Америкиниң инкаси

Җәнубий корийиә парламент әзалириниң хитай мәхпий сақчилири тәрипидин қопал муамилигә учраш вәқәси, америка һөкүмитиниң диққитини қозғиған. Америка ташқи ишлар министирлиқиниң баянатчиси речард бовчер, пәйшәнбә күни ташқи ишлар министирлиқидики мухбирларни күтүвелиш йиғинида, америкиниң бу мәсилигә диққәт қилғанлиқини билдүрди. Речард бовчер "мән бизниң җәнубий корийә парламент әзалири бейҗиңда хитай мәхпий сақчилири тәрипидин мудахилигә учриғанлиқи һәққидики хәвәргә диққәт қилғанлиқимизни билдүримән. Хитай һөкүмити кишиләрниң өзини ипадиләш, йиғилиш өткүзүш, мухбирларни күтүвелиш, шундақла сөз қилиш әркинликигә йол қоюшини давамлиқ тәкитләймиз, дәп көрсәтти.

Бу қетимқи бейҗиңда мухбирларларни күтүвелиш йиғини өткүзүп, хитай мәхпий сақчилирининиң тосишиға учриған җәнубий корийилик сиясәтчиләр, корийә парламентидики өктичи партийигә тәвә әзалар болуп, шимали корийигә қаттиқ қоллуқ сиясәт йүзгүзишни тәшәббус қилиду.(Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт