9 - январ күни косова парламенти, косова партизанлириниң сабиқ башлиғи һашим тачини баш министирлиққа тәйинлиди. Һашим тачи 1998 - йили сирбийә тәрипидин террорист елан қилинған, әйни чағда, америка ташқи ишлар министирликиниң косова вәкили роберт гелбардму һашим тачини террорист дәп әйиплигән иди. Һашим тачи вәзипини тапшуруп алғандин кейин, косова мустәқиллиқини бир қанчә һәптиликла вақит мәсилиси дәп билдүргән һәм бу тоғрида явропа бирлики билән америкиниң мәслиһәтини һич қачан нәзәрдин сақит қилмайдиғанлиқини әскәртип өткән.
Һашим тачи сайламдин кейинки сөзидә йәнә, сирбийәни мустәмликичилик нийитидин қисқа вақит ичидә ваз кечишкә чақирған; косовани косовадики барлиқ милләтләрниң вәтинидур дәп билдүргән һәм косовадики аз санлиқ милләтләрниң, җүмлидин сирибларниң һәқ-һоқуқиға капаләтлик қилидиғанлиқи һәққидә вәдә бәргән, буниң билән тәң, уруш мәзгилидә косовадин чиқип кәткән сирб көчмәнлирини, косоваға қайтип келип нормал һаятини давамлаштурушқа чақирған.
Һашим тачи мухбирларни қобул қилған чеғида мустәқиллиқ еланиниң ениқ вақтини билдүрүшни рәт қилип мундақ дегән: " ғайимиз мушу йилниң алдинқи йеримида косовани мустәқил бир дөләт қилип қуруп болуш. Биз хәлқимизниң мустәқиллиқ арзусини мүмкин болған әң қисқа вақит ичидә әмәлгә ашуримиз."
Һашим тачи, 1990 -йилларниң оттурида косова азадлиқ армийиси дәп аталған партизанлар сепидә әскирий һәрикәткә қатнашқан вә йетәкчилик қилған; нато армийиси косовадики сирбийә армийисигә һавадин һуҗум қилғанда, һашим тачи башчилиқидики косова азатлиқ тәшкилати қуруқлуқтин һуҗум қилған. Косова, 1999 - йили б д т ниң башқурушиға өткәндин кейин, һашим тачи косова демократик партийисини қуруп сиясий һәрикәткә өткән.
Бултур 17 - ноябирда өткүзүлгән косова парламент сайлимида, косова мустәқиллиқ һәрикитидики радикал қанат һесабланған косова демократик партийси %34 аваз билән парламенттики вәкил сани җәһәттин 1 -орунни; мөтидил қанат һесабланған демократик иттипақ партийиси болса %22 аваз билән иккинҗи орунни игәллигән. Буниң нәтиҗисидә косова президенти фатмир сәҗду, бултур 19 -ноябир күни һашим тачиға һөкүмәт кабинтини қуруп чиқиш вәзиписини тапшурған. Һашим тачи қуруп чиққан 15 кишилик бирләшмә һөкүмәт кабинти вә баш министирлик вәзиписи косова парламентиниң түнүгүнки йиғинида, 22 гә қарши 85 аваз билән тәстиқтин өткән. Косова бирләшмә һөкүмәт кабинтида радикал қанат 7 министирликни, мөтидил қанат 7 министирликни, сирблар бир министирликни игәллигән.
Нөвәттә косова мустәқиллиқини қәтий мәйданда туруп қоллаватқан дөләт америка, явропа бирликидики дөләтләрниң көп қисми косова мустәқиллиқиниң қоллиғучилири; пәқәт сирбийә, росийә вә хитай қарши мәйдандики тосалғулардур.
Һашим тачиниң әслидики пилани бултур 10 - декабирда, мустәқиллиқ елан қилиш болуп, явропа бирликиниң изчил агаһландуруши вә тәшәббуси билән мустәқиллиқ еланини кечиктүрүп кәлмәктә. Һашим тачиниң нөвәттики пилани, сирбийәдә, бу йил 3 - февралда өткүзилидиған президент сайлиминиң нәтиҗисини күтүш, әгәр, сирбийәниң йеңи президенти , косова мустәқиллиқини қобул қилған тәқдирдә, косова мустәқиллиқи һәққидә сирбийә билән бирликтә қошма баянат елан қилиш; әгәр йеңи президент қарши турған әһвалда, мустәқиллиқни өз алдиға йәни бир тәрәплимә елан қилиштур.
Бу йил 39 яшқа киргән һашим тачи пиристина университетида пәлсәпә оқуған андин шветсарийидики зурич университетида хәлқара мунасивәт кәспидә оқуған. Көзәткүчиләр, һашим тачиниң сиясий һаяттики утуқлирини, униң миллий вәзийәт билән хәлқара вәзийәтниң мунасивитини тоғра дәңсийәлигәнликидә дәп қарашмақта. (Шөһрәт һошур)
