Qachaqtiki kubaliqlar mustebitlik axirliship démokratiyining bashlinishini ümid - qilmaqta


2006.08.04

Karibiyan déngizidiki eng chong aral döliti bolghan kubada, dölet re'isi fédel kastro döletning hoquqini özining ukisi ra'ul kastrogha biwaste ötküzüp bergenlikini élan qilghandin kéyin, xelq'arada, bolupmu amérika bilen xitayning buninggha bolghan inkasida keskin qarimu-qarshiliq kélip chiqti. Buningdin bashqa, bu heqte aktip inkas qayturuwatqan kishiler yenila bashqa döletlerde turuwatqan kubaliqlardin ibaret boldi. Amérika tashqi ishlar ministirliki bayanatchisining bildürüshiche, fédel kastroning salametliki sewebidin néme özgürüsh bolidighanliqini tesewwur qilish qéyin. Chünki kubada yenila nahayiti az sanliq ademning mustebitliki dawam qiliwatidu. Bu qétim hoquqni ra'ul kastrogha ötküzüp bérish peqet adem almashqanliqtin ibaret bolushimu mumkin.

Döletning hoquqini özining ukisi ra'ul kastrogha biwaste ötküzüp bergen

Birleshme agéntliqining 3 ‏- awghust küni hawanadin xewer qilishiche, kubaning 80 yashliq kommunist rehbiri fédel kastro késel kariwitida yétip turup, buningdin kéyin kubada kolléktip rehberlik shekli qollunushni orunlashturghan. Gerche u kubada hel qilghuch rol oynaydighan siyasiy byurodiki 5 neper 'ishenchilik yoldash' ning namini tilgha alghan bolsimu, emma döletning prézidénliqi we kommunist partiye merkizi komitétining re'islikini biwaste özining 75 yashliq ukisi ra'ul kastrogha ötküzüp bergenlikini jakarlighan.

Xewerde eskertilishiche, kubada bu qétim yüz bergen hoquq ötküzüp bérishning jeryani hazirgha qeder jem'iyetke uchuq-yuruq emes. Fransiye agéntliqining hawanadin bayan qilishiche, kubada 80 yashliq fédel kastroning késel bolghanliqi bilen jem'iyette bir chong jiddiylik peyda bolghan. 7 ‏- Ayning 31 ‏- küni, fédel kastro özining ukisigha biwaste hoquq ötküzüp bergenlikini jakarlighandin kéyin, kubaning uchur wastiliri 'döletni qoghdashqa teyyar turush' , 'jahan'girlikning tehditidin saqlinish' , 'xelqning qanunsiz halda bashqa arallargha qéchishi'ining aldini élish' dégen sözlerni tekitleshke bashlighan. 50 Ming kishilik qoralliq qisim bilen bu döletni qattiq kontrol qilip turiwatqan kuba kommunist partiyisining sotsiyalistik tüzümi shara'itida, kubada hazir buningdin bashqa xewer yaki oxshimighan pikir mewjut emes.

Amérikining inkasi

B b s ning xewer qilishiche, amérika prézidénti jorji bush fédel kastroning dölet hoquqini biwaste özining ukisigha ötküzüp bergenlikini 'kuba xelqning erkinlikke érishish, özning yétekchilirini özliri erkin saylash arzusigha dexl-terz qilghanliq' dep tenqidligen. Shundaqla , kuba xelqini démokratik özgürüshke chaqirghan we kuba xelqighe her jehettin insanperwerlik yardem bérishke teyyar ikenlikini bildürgen. Jorji bush sözide 'kuba xelqining özining hökümitini özi saylash hoquqi bar' dep tekitligen. Kuba téliwiziyiliri buninggha jawaben burun kochilarda xelqni orunlashturup sözlitip, teyyarlap chiqqan xelqining fédel kastroni arzu qilidighanliqi, uning ukisighimu ishinidighanliqini bildüridighan kona höjjetlik filimlerni qaytidin qoyushqa bashlighan.

Xitayning inkasi

B b s ning xewer qilishiche, 4 ‏- awghust küni xitay tashqi ishlar ministirliki amérikining kuba mesilisige qarita tutqan pozitsiyisige qarshi halda bayanat élan qilip, 'amérika bashqa döletning ichki ishlirigha arilashmasliqi kérek, kubaning ichki ishlirini kuba xelqi özi belgileydu' dep tekitligen. Shundaqla yene 'bizning dölet re'isimiz xujintaw ning 2004 ‏- yilidiki kuba ziyariti muweppeqiyetlik bolghan idi, bu qétim fédel kastro késel bolup qalghanda yene uninggha semimiy salam yollidi' dégen.

Amérika awazining bayan qilishiche, amérikining mey'ami shtatida turiwatqan kuba muhajirliri teshkilatining re'isi, buningdin 40 yil burun akisi fédel kastro bilen siyasiy köz qarishi oxshash bolmighanliqtin kubadin chiqip ketken, emma hazirgha qeder akisi bilen tughqanchiliq munasiwitini üzüp qoymighan hu'annita xanimning éytishiche, fédel kastro üchey yolliri qanighanliqtin opératsiye qilin'ghan. Hazir kastroning késili nahayiti éghir iken. Hazir bu xanim tengrining ra'ul kastroning könglige insap bérip kubada yéngidin démokratiye berpa qilinishini ümid qilmaqta. Xewerde bayan qilinishiche, kastroning hoquq ötküzüp bergenliki toghrisida xewer tarqalghandin kéyin, hazir amérikining mey'ami shitatida turiwatqan kubaliqlar özlirining kubada mustebitlik axirliship démokratiye tiklinishke bolghan ümid -arzu we hazirqi özgürüshke bolghan xoshalliqini herxil shekil bilen ipadilimekte. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.