Kucha nahiyiside xitay hökümitige qarshi naraziliq namayishi élip bérilghan


2007-07-19
Share

Xitay hökümitining yéza emgek küchlirini yötkesh siyasiti bilen Uyghur élidiki déhqan yashlarni bolupmu Uyghur qizlarni her xil wasitiler bilen xitay ölkilirige yötkishi, Uyghurlarda birdek naraziliq qozghawatqan mesilige aylanmaqta. Gerche xitay hökümiti bu xil atalmish Uyghur déhqanlirini bay qilish siyasitige déhqan hemde ularning ishlemchilikke apirilghan perzentliri intayin mayil bolghanliqini teshwiq qiliwatqan bolsimu , emma buninggha naraziliq inkaslirining barliqini yoshurup keldi. Derweqe yéqinda ige bolghan uchurlargha qarighanda aqsuning kucha nahiyiside déhqanlar xelq meydanigha yighilip hökümetning , qizlirini mejburiy halda xitay ölkilirige yötkewatqanliqigha naraziliq bildürgen iken.

Toluq bolmighan qimmetlik uchur

Chet'ellerdiki Uyghurlarning erkin uchur orgini bolghan, gérmaniyige jaylashqan sherqiy türkistan uchur merkizining -18küni Uyghur élidin ige bolghan toluq bolmighan uchurgha asasen tarqatqan xewirige qarighanda , yéqinda aqsuning kucha nahiyiside déhqanlar kucha nahiyilik xelq meydanigha yighilip , xitay hökümitining Uyghur déhqan qizlirini mejburiy halda xitay ölkilirige ishlemchilikke orunlashturiwatqanliqigha naraziliq bildürüp namayish qilghan.

'Gerche namayishchi amma téz arida yétip kelgen saqchilar teripidin tarqitiwétilgen bolsimu, emma ularning ichidiki ikki nepiri qolgha élin'ghan iken. Uchur merkizining xewiride eskertishiche, saqchi da'iriliri dawamliq türde namayishqa chiqqan ammidin, bu qarshiliq namayishni kimning oyushturghanliqini qattiq sürüshte qilmaqta iken.

Xitay hökümiti Uyghur yéza éshincha emgek küchlirini sirtlargha yötkep ishqa orunlashturush siyasiti buyiche asasen Uyghur élining qeshqer, xoten, qizilsu we aqsugha oxshash Uyghurlar zich olturaqlashqan jayliridiki Uyghur déhqan qizlirini xitay ölkiliridiki zawutlargha türkümlep yötkimekte. Bu siyasetni emeliyleshtürüsh jeryanida yerlik da'iriler hetta déhqanlarni mejburlash wasitilirini qollan'ghan iken .Gerche Uyghur déhqanlirida xitay hökümitining Uyghur déhqan yashlirini xitay ölkilirige ishlemchilikke yötkesh siyasitige qarita naraziliqning küchlük ikenliki melum bolsimu , emma konkrét bir qarshiliq herikiti yüz bergenliki heqqide bu tunji melum bolghan uchur hésablinidu.

Bu orun we kishiler xewersiz

Mezkur uchur heqqide yenimu toluq melumat élish meqsitide biz aqsu wilayetlik hemde kucha nahiyilik topilanglarni basturush qoralliq etritige téléfon qilduq bu ikkila orun kuchada namayish bolghanliqini inkar qildi.

Biz yene kucha nahiyiside namayish yüz bergen xelq meydani etrapida olturushluq a'ililik hemde orunlargha téléfon qilip sinap körgen bolsaqmu, epsus téléfon ziyaritimizni qobul qilghuchilar bu weqedin xewersiz ikenlikini bildürdi.

"Namayish yüz berdi, emma éniq ..."

Biz yene kucha nahiyilik hökümet ishxanisigha téléfon qilduq, bu chagh Uyghur élide kech kirgen , xizmetchiler ishtin chüshken waqit bolghachqa téléfonimizni peqet kechlik küzetchilikte turghuchi xadim aldi. Gerche bu xadim weqe yüz bergen waqit we bashqa toluq melumatlar bilen teminliyelmigen bolsimu , emma kucha nahiyisining xelq meydanida déhqanlarning heqiqeten namayish élip barghanliqini bildürdi.

Nöwette chet'ellerdiki Uyghur teshkilatliridin dunya Uyghur qurultiyi shundaqla amérika Uyghur kishilik hoquq programmisi qatarliq teshkilatlar shundaqla xelqara kishilik hoquq we ayallar hemde emgekchilerning heq ‏- hoquqlirini qoghdash teshkilatlirimu xitay hökümitining Uyghur qizlirini ishqa orunlashturush bahanisida xitay ölkilirige mejburiy yötkep Uyghurlarning insaniy hemde qanuniy heq ‏- hoquqlirigha dexli teruz yetküziwatqanliqidek mesilige ortaq köngül bölmekte shundaqla ular mezkur mesilining xelq'aralishishi üchün Uyghur élidiki déhqanlarning xitay hökümitining mezkur siyasitige qarita naraziliq bildürgenliki heqqidiki emeliy uchurning halqiliq rol oynaydighanliqini ipadilimekte.

Bir qisim Uyghurlarning inkasliridin melumki , xitay da'iriliri Uyghur déhqanlirining qizlirini xitay ölkilirige teshebbuskarliq bilen ewetiwatqanliqini teshwiq qilish bilen bir peytte , mushuninggha oxshash qarshiliq inkaslirida bolghan Uyghurlargha türlük wasitiler bilen bésim ishlitip , bu heqtiki uchurlarnimu qamal qilip kelmekte. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet