Доктор қаһар баратниң кучарда байқалған қәдимқи қәбриләр вә хитайниң шийүдухуфуси һәққидики мулаһизиси


2007-09-17
Share

Кучарниң шәһәр ичидә йәр асти сода базири бина қилиниватқанда, 8 ‏- айниң 19 ‏- күни йәр қатламлиридин қәдимқи кучар қәбрилири байқалған. Кучарда байқалған гүмбәз шәкиллик қәдимқи хиш қәбриләр, ахирәтлик сапал қачилар вә қәбрә темидики тулпар (учар ат) нусхиси кучарниң типик мәдәний ядикарлиқилири иди. Әмма ақсу вилайәтлик парткомниң секритари, тәшвиқат бөлүм башлиқлири қурған рәһбәрлик орган бу мәдәний ядикарлиқларни миладидин илгири 60 ‏- йилида хитайниң хән сулалиси тәсис қилған 'шийүдухуфу' дәп аталған һәрбий органниң кучарни идарә қилғанлиқиниң бивастә пакити, дәп тәшвиқ қилди.

Һазир америкида туруватқан тарих пәнлири буйичә доктор қаһар барат әпәнди бу һәқтә мулаһизә елан қилип, бу қетим кучардин тепилған қәдимқи қәбриләр вә униңда сақлинип қалған мәдәний ядикарлиқларниң тәтқиқат қиммити наһайити юқири икәнликини муқимлапла қалмай, бәлки коммунист хитай һөкүмити тилған алған хитайниң хән сулалиси дәвридики 'шийүдухуфу' дегән органниң қандақ орган икәнлики һәққидә мулаһизисини оттуриға қойди.

Қаһар барат әпәндиниң қаришичә, кучардин байқалған қәдимқи мәдәнийәтләрниң һечқайсисини хитайниң 'шийү духуфу' яратқан әмәс, бәлки кучарниң йәрлик хәлқи өзлири яратқан мәдәнийәт.

Қаһар барат әпәндиниң қаришичә, хән сулалисиниң 'шийүдухуфу'си асасән һунларға зәрбә беришкә қаритилған орган, йәрлик мәдәнийәтләрни униңға мунасивәтлик дәп қараш әхмиқанилиқ.

Қаһар барат әпәнди хән сулалисиниң һунларға сәддичиндила қаршилиқ билдүрүп қалмай, бәлки сиртқа чиқишқа мәҗбур болғанлиқиниң сәвәблирини вә сртқа чиққандин кейин һәрдаим йәрлик хәлқләрниң вә һунларниң қаршилиқиға учрап һалсириған ақивитини баян қилди.

Қаһар барат әпәнди йәнә, таң сулалиси дәвридиму бундақ 'шийүдухуфу' қурулғанлиқини, униң йәнә мәғлуп болғанлиқини баян қилди вә хитай қурған бундақ органни, әмәлийәттә хитайларниң сиртқа таҗавузчилиқ қилғанлиқиниң пакити, хитай һөкүмитиниң һазир бу һәқтә дәватқан гәплири болса, пәқәт бир сиясий тәшвиқат, мустәмликичилик сиясәт, дәп көрсәтти. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт