Күрәш көсән әпәнди вапатиниң бир йиллиқи хатириләнди


2007.10.29

Бүгүн -29өктәбир уйғур хәлқиниң пәхирлик оғлани , тонулған сәнәткар мәрһум күрәш көсән әпәндиниң вапат болғанлиқиниң бир йил толған күни . Бу күни униң уйғур хәлқиниң дәрдигә дәрман ,арзу ‏- арманлириға дилкәш болған ялқунлуқ авази, хәлқниң һәсритигә мәлһәм болған үмидлик музикилири мәңгүлүк тохтиған иди.

Бу күни униң мусибитигә җөр болған милйонлиған уйғур хәлқи йүрәк бағридин етилип чиққан муң-қайғулири билән матәмдә болған иди. У җан үзгән бугүнки бу хатирә күндә униң уруқ -туғқанлири вә бир қисим йеқинлири бир йәргә җәм болуп униң роһиға атап қуран талавити қиливатиду.

Мәрһум күрәш көсән әпәнди қуран қираитиниң адәм вуҗудини ләрзигә салидиған муңлуқ сеһридин һузурлинатти.У өзиниң йеқимлиқ авази билән ясин сөрисини вайиға йәткүзүп қираәт қилатти. Бәлким кишиләргә анчә билишлик болмиса керәк, мәрһум күрәш әпәнди һаят вақтида йәни 1994 ‏- йили пүтүн уйғур или даирисидә тунҗи қетим 30 парә қуранниң қираитини қаплиқ үналғу лентиси қилип, шаңхәй үн-син нәширияти билән һәмкарлишип нәшр қилдурған иди.

Бирақ хитай һөкүмитиниң тосқунлуқ қилиши,тарқитишни чәклиши сәвәбидин дуканларда очуқ ‏- ашкара тарқитишқа имкан болмиған иди. У нәшр қилдурған бу қираәт каситиси һазир әл арисида қолдин ‏- қолға өтүп көчүрүлмәктә.

Мәрһум әл сөйгән вә әлни сөйгән виҗданлиқ бир инсан иди.Гәрчә у аримиздин кәткинигә бир йил болған болсиму , худди униң қәбрә тешиға йезилған "көрәш өлди десә ким ишиниду, мениң өлүшүм тәбиий , әмма күрәш өлмәйду"дегинидәк , униң башлиған ишлири мәңгү давамлишиду. У уйғур хәлқиниң қәлбидә мәңгү ядлиниду. (ялқун)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.