"Күрәш өлмиди", көрәшниң избасари униң изидин маңиду


2006.11.01
kuresh-kusen-miyit-200.jpg
Мәрһум күрәш күсәнниң мейити 1 – ноябир күни узитилди

Һаят қиммәтлик әмма толиму чәклик, әнә шу чәклик һаятта инсанийәт дунясида өчмәс изларни қалдуруп кәткән кишиләрниң гәрчә җисми бу дуня билән видалашқан болсиму, бирақ униң роһи әбәдий ‏- әбәд һаят қалғанлар арисида дастан болуп күйлиниду. Уйғур оғли күрәш султан көсән әнә шуларниң бири.

Уйғур хәлқиниң әркинлики вә кишилик һоқуқини қолға кәлтүрүш җеңигә өзини атиған, ахирқи тиниқиға қәдәр "уйғурум" дәп сөзләп "уйғурум" дегән нахшисини яңратқан күрәш көсән хәлқи, қериндашлири вә пәрзәнтлири қәлбидә мәңгү һаят.

Узун йиллардин бери, әләм билән қәләм күриши елип бериватқан көрәш көсәнниң техи қилип болалмиған ишлири ейтип түгәткүсиз иди, чүнки у хәлқиниң шадлиқ күлкисини көрмиди, киндик қени төкүлгән әзиз дияриға қәдәм ташлиялмиди, у пәрзәнтлирини өзигә охшаш шиҗаәтлик қилип йетиштүрүп әлгә қетиш арминиға йәтмигән иди.

Көрәш көсән әпәндиниң өмүрлүк һәмрийи бәхтигүл ханим, һаят сәбдишиниң чириқини адаққичә йоритидиғанлқини, у қилип болалмиған ишларни, улуғвар хизмәтләрни күчиниң йетишичә әмәлгә ашуридиғанлқини билдүрүш билән биргә пиғанлиқ һәсритини төкти.

Һәқиқәтән көрәш көсән әпәнди 47 йиллиқ һаятини әһмийәтлик өткүзди, шуңа уйғур хәлқи униң билән мәңгүлүк айрилишқа чидимай, униңға қиймай һәсрәтлик пиғанлирини төкмәктә. Мәшһур шаир әхмәтҗан осман мәрһумниң роһиға атиған мисралирида мундақ дәйду:

Сени күтимиз

(Мәрһум күрәш күсәнниң роһиға) Әхмәтҗан осман

Кетип қалдиң балдур неманчә? атмидиғу техи теңимиз! муңдашқанчә дуттариң билән, түнимәктә миллий еңимиз.

Чақирдиму яки шеһитләр, аңлиғуси келип бир пәдә? сорап баққин улардин, достум, қуяшимиз тепилар нәдә!

Келәлмисәң әгәр сән қайтип, биз қалимиз учурсиз йәнә. Ай-юлтузлуқ асминимизда қалар зулмәт қилип тәнтәнә.

Көрәш көсәнниң йеқин сәпдиши дуня уйғур қурултийиниң муавин рәиси мәмәт тохти чәтәлләрдики уйғурларға вакаләтән мәрһумниң аилә тавабатлириға сәбир тилиди вә мәрһумниң хисләтлири һәққидә тохталди.

Тоғра, көрәш көсән хәлқидин вақитсиз айрилди, әмди у нахша ейтмайду, әмди у күлмәйду, у мәңгүлүк хәлқи билән видалашти.

" яқ" дегән бир аваз чиқти, күрәшниң җәңгә атиған оғли кичик көрәш "мән дадамниң изидин маңимән" дәп җакарлиди. Көрәш наһайитиму тоғра ейтқан икән, һәқиқәтән "көрәш өлмәпту", униң избасари униң изини давмлаштуриду. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.