Süriye liwandiki eskerlirini martning axirida ilip chiqip kétishni pilan qilmaqta

7 -Mart küni, süriye prézidénti beshar el - asad bilen liwan prézidénti émil lahud süriyining paytexti demeshiqte bir arigha kélip, süriye eskerlirining liwandin chékinip chiqip kétish waqtining mart éyining axirigha qeder dawamlishidighanliqi heqqide qarar alghan.

En'giliye b b s radi'o téléwiziye shirkitining bu heqte bergen xewiridin melum bolushiche, mölcherleshlerge qarighanda eskerlerni chékindürüsh üchün ikki- üch künla waqit kétidiken.

Royitiris agéntliqining neq meydanni körgüchi bir kishining sözini neqil keltürüshiche, béka wadisida küzetküchilik qiliwatqan süriyilik eskerler tagh wadisidin ayrilish üchün yük - taqilirini yighishturup buyruq kütmekte iken.

Yerliklerning qoshun chékindürüshke bolghan qarashliri

Biraq, liwandiki süriyeperesh teshkilatlar seyshenbe küni, yeni 8 - mart küni süriye eskerlirining hazirche liwiyidin chiqip ketmeslikini telep qilip, chong kölemde namayish élip baridiken.

Liwandiki shiye musulmanlirining allah partiyisining rehbiri sheyix hasan nesirullah izchil türde, süriyining liwandin eskerlirini élip chiqip kétishge qarshi ikenlikini bildürüp kelmekte. U buning sewebini liwan bilen isra'iliye otturisida urush halitining hazirgha qeder dawamlishiwatqanliqidin dep körsetken.

Allah partiyisi rehbiri sheyix hasan nesrullah sözide yene: " birleshken döletler teshkilatining süriye eskerlirining, liwandin chiqip kétish heqqidiki qararini liwanning ret qilish hoquqi bar, chünki bu liwanning ichki ishlirigha arilashqanliq hésablinidu. Eksinche bu xil qararni ishqa ashurush, isra'iliye üchün paydiliq shara'it yaritishtin ibaret" dep tekitligen.

Buningdin sirt yene bir qisim, süriyilikler, süriye eskerlirining liwandin chiqip kétishini xalaydighan liwanliqlarni, ular " yaxshiliqqa yamanliq bilen jawap qayturiwatidu" dep eyiplimekte. Süriyiliklerning bildürüshiche, süriye eskerliri liwanning muqimliqigha yardem bergen birdin - bir dölet bolup, süriye 2000 -yilidin kéyin, 60 ٪ eskirini liwandin qayturup chiqqan iken.

Xelq'araning, süriye eskerlirining liwandin chiqip kétish pilanigha qarita qarashliri

Bu arida amérika da'iriliri, süriyining esker chékindürüsh pilanidin memnun emeslikini bildürüp, süriyining liwandin pütün eskerlirini yötkep chiqip kétishini telep qilish bilen birge, süriye eskerlirining liwandin chiqip kétishige qarshiliq bildüriwatqan, bir qisim liwan teshkilatlirining namayish ötküzüshigimu intayin narazi ikenlikini bildürdi.

Fransiye tashqi ishlar ministiri méshel barnér , prézédint beshar el -asadning eskerlerni chékindürüsh heqqide bergen wedisini intayin ehmiyetlik we muhim dep körsitip, " amma fransiye süriyining bu jehette emeliy we heqiqiy heriket élip bérishini ümid qilidu" dégen agahlandurushni berdi.

En'giliye tashqi ishlar weziri jek straw, süriyining eskerlirini liwandin élip chiqip kétish qararini qizghin qollaydighanliqini bildürüsh bilen birge, süriye terepning birnchi qedemni tizdin emelge ashurushini tekitlidi.

Süriyining esker chékindürüsh pilani boyiche nöwette, liwan paytexti béyrut etirapidiki 5 ming kishilik süriye qoshuni deslepki qedemde chékindürilidiken, biraq qalghan 14 ming eskerning qachan chiqip kétishi iniqlanmighan bolup, fransiye, gérmaniye, se'udi erebistan we amérika qatarliq döletler bolsa, süriyining derhal pütün eskerlirini liwandin élip chiqip kétishini telep qilmaqta. (Eqide)