Liwiyige qoyulghan cheklimini ijra qilish üchün bügün nato paraxotliri heriketke ötti

Kazafiy b d t ning qararini ijra qiliwatqan birleshme qisimlarni "Esl-selp" dep jakarlidi. Bügün nato paraxotliri b d t liwiyige qoyghan cheklimini ijra qilish üchün heriketke ötti.
Muxbirimiz weli
2011-03-23
Share
liwiye-bombardiman-bina-305.jpg Zembirekte kukum-talqan qilin'ghan kazafiyning qomandanliq binasi. 2011-Yili 20-mart.
AFP

Liwiyide kazafiygha qarshi qozghilang kötürgen xelqni kazafiyning hujumidin saqlash üchün, gherb birleshme qisimliri b d t ning qarari boyiche élip bériwatqan hawa hujumi, bügün beshinchi künige qedem qoydi. Télégraf gézitining xewer qilishiche, bügün liwiyining paytexti tripolida partlitilghan awazlar anglinip turuwatidu. Kazafiy bügün liwiye téléwiziyisi arqiliq nutuq sözlep, özining qisimlirini meyli qisqa muddetlik yaki uzun muddetlik bolsun, her qandaq urushqa teyyar turushqa, liwiye hökümitige qarshi turghan qozghilangchilar bilen xelq'ara birleshme qisimlirini meghlup qilishqa chaqirdi. Birleshme qisim qomandani loklérning éytishiche, kazafiy qisimliri bügün tanka, zembirekler bilen we mergenlerni ishqa sélip, misrata ahalilirige hujum qozghighan.

B d t ning liwiyige qoyghan cheklimisini ijra qilish üchün, bügün nato heriketke ötti. Eljezire téléwiziyisining enqeredin bayan qilishiche, natoning déngizdin charlash herikitige bügün enqere paraxot chiqardi, buning ichide su asti paraxotimu bar. Türkiye prézidénti abdulla gül, türkiye b d t ning qararini ijra qilishta birleshme qisim bilen birlikte heriket qilidu, emma yoshurun meqsetler üchün xizmet qilidighan heriketlerge qarshi turidu dep jakarlidi.

Télégraf gézitining bayan qilishiche, birleshme qisimlarning liwiyige qaratqan hawa hujumi bügün, kazafiyning 32-köwrük dep atilidighan déngiz qisimlirini, yeni kazafiyning oghli qasim kazafiy qomandanliq qiliwatqan déngiz qisimlirini nishanlashqa bashlidi.

Amérika tashqi ishlar ministiri hillariy kilinton bügün a b s xewerliri agéntliqigha, kazafiy hazir chetke kétishning yollirini izdewatidu, dégen.

B b s ning bayan qilishiche, liwiyide kazafiygha qarshi partlighan namayish xitayning iqtisadigha nahayiti chong ziyan salghan. Xuddi xitayning soda ministiri chén délo éytqandek, xitayning 75 shirkitining (buning 13i xitayning dölet igilikidiki chong shirket) liwiyidiki kespi pütünley ishtin toxtighan. Höddige alghan 50 chong qurulushtimu ish toxtap qalghan, xitayning qurulush esliheliri buzulghan, xitay 35 ming adimini pütünley qayturup kélishke mejbur bolghan. Buningdin kélip chiqqan iqtisadiy ziyan 41 milyard amérika dollirigha teng.

Kazafiy bügünki téléwiziye nutqida, b d t ning qararini ijra qiliwatqan birleshme qisimlarni "Esl-selp" dep jakarlidi. Buningdin burun rusiye bash ministiri wiladémir putin, xuddi roytrs agéntliqi bayan qilghandek, rusiyining bashqurulidighan bomba zawutigha bérip, b d t ning liwiye toghrisidiki qararini xata qarar, uning ichide nuqsan nahayiti köp, dégen, bu qarar boyiche ish qilghan birleshme qisimni, xuddi ottura esirdiki "Esl-selip" ke oxshap qaldi, dégen idi.

Tarixta 1096-yilidin 1291-yilighiche dawam qilghan rim bilen erebler otturisida, irussalémni taliship yüz bergen 6 qétimliq diniy urush "Esl-selip urushi" dep atilidu. Rusiye prézidénti médéwidif tünügün, rusiye bash ministiri putinning b d t ning liwiye mesilisini hel qilish üchün chiqarghan qararini ijra qiliwatqan qisimlarni tarixtiki "Esl-selp"ke oxshatqanliqini xata köz qarash dep tenqid qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet