Лондон уйғур ансамбили вә әнглийә уйғур җәмийити бирликтә қурбан һейт мәрикиси орунлаштурди

Дуняниң һәрқайси җайлиридики уйғурлар мусулманларниң әнәниви диний байрими қурбан һейтни тәбриклимәктә. Лондондики әнглийә уйғур җәмийити һәм лондон уйғур ансамбили бу йиллиқ қурбан һейт мунасивити билән һейтлиқ сәнәт мәрикиси орунлаштурди.
Мухбиримиз меһрибан
2012.10.26
London-Uyghur-Ansambili-senetkarliri-305 Сүрәттә, лондун уйғур ансамбили әзалири.
Сүрәтни лондун уйғур ансамбили тәминлигән.

Лондон уйғур ансамбилиниң мәсули әзиз әйса әпәнди радиомиз зияритини қобул қилип, бу қетимқи қурбан һейт мәрикисини орунлаштуруштики асаси мәқситиниң әнглийидики уйғур җамаитини бир йәргә йиғип, қурбан һейт байримини тәбрикләш, техиму муһими уйғур мәдәнийәт-сәнитини тонуштуруш, әнглийидики уйғур пәрзәнтлиригә ана тил вә уйғур мәдәнийити билән көпрәк учришиш пурсити яритип бериш икәнликини илгири сүрди.

Әнглийидики лондон уйғур ансамбилиниң мәсули әзиз әйса әпәнди, радиомиз зияритини қобул қилип, лондон уйғур ансамбили һәм әнглийә уйғур җәмийити бирликтә әнглийиниң лондон шәһиридики уйғур җамаити вә уйғурларға қизиқидиған әнглийилик достлар үчүн 2012-йиллиқ қурбан һейт мәрикиси орунлаштурғанлиқини билдүрди.

Әзиз әйса әпәнди бу қетимқи қурбан һейт мәрикисини орунлаштуруштики мәқсәт һәққидә тохтилип, бу қетимқи паалийәтниң әнглийидики уйғур җамаитиниң мәдәний турмушини бейитиш, болупму әнглийидики уйғур балилири үчүн, уйғур сәнити, мәдәнийити, уйғур тили вә уйғур җамаити билән техиму йеқиндин тонушуш пурсити яритиш үчүн икәнликини билдүрди.

Лондон уйғур ансамбили 2004-йили 5-ай мәзгилидә, рәһимә маһмут,низамидин сәмәтоф, ялқун абдуреһим, стәпһән җонәс, рачәл һаррис, рустәм салийиф, камил аббас, әзиз әйса қатарлиқлардин тәшкилләнгән болуп, бу өмәк қурулғандин буян, явропа дөләтлиридә орунлаштурулған һәр хил аммиви паалийәтләр вә сәнәт көрәклиридә 200 нәччә мәйдан консерт қоюп, уйғур сәнитини явропа әллиригә тонуштурушта көврүклүк ролини ойнап кәлмәктә. Лондон уйғур ансамбили қурулғандин буян йәнә, лондондики уйғурларниң аммиви йиғилиш- паалийәтлиридә сәнәт номурлирини көрситип, әнглийә уйғур җамаитиниң мәдәний турмушини бейитиш, уйғурларниң музика вә мәдәнийитини әнглийә хәлқигә кәң даиридә тонуштуруш, әнглийидики уйғур пәрзәнтлиригә ана тил вә уйғур мәдәнийити билән учришиш пурсити яритип бериш қатарлиқ җәһәтләрдә өз ролини җари қилдуруп кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.