Ixlas - sadaqet remzidur


2007-12-27
Share

Uyghurlar kündilik turmushida " ixlas baghlash, ixlas qilish, ixlasmen, ixlasliq"dégen'ge oxshighan sözlerni köp ishlitidu. Buningdin Uyghurlarda ixlasning qanchilik orni we qedir - qimmitining barliqini bilish anche qéyin emes. Uyghurlar ixlas bilen ish qilghuchilarni yaqturidighan we her ishni ixlas bilen qilidighan xeliqtur.

Ixlasning menisi

Ixlas - lughette bir nersini bashqisidin tallap ayrish, ilghash menisini bildüridu. Emma istimalda ixlas her ishni güzel niyet, sap qelb bilen qétirqinip qilish démektur. Ixlas qelb qétidin kelgen semimiy söygü bilen körsitilgen sadaqettur. Ixlasning eksi riya (yeni emellerni köz boyamchiliq üchün qilish)dur.

Adem balisining ikki dunyaliq sa'aditi we maddiy, meniwiyitige képillik qilalaydighan ixlastin bölek ikkinchi bir xislet yoqtur. Birawning ixlasini qazanmaq heqiqeten muhim bir ishtur. Chünki zerrichilik ixlas bilen qilin'ghan ish, ixlassiz qilin'ghan minglarche ishtin eladur.

Ixlasning ehmiyiti

Se'udi erebistanining medine munewwere shehiride turushluq alim muhemmed niyaz hajim ixlasning ehmiyiti we zörürlüki heqqide toxtilip mundaq dédi:" her qandaq bir ishta ixlas telep qilinidu. Ilim tehsil qilishta, emel - ibadet qilishta, yétim - yésirlargha yardem qilishta, halal rizq üchün ishleshte ixlas baghlap ish qilish telep qilinidu.

Her qandaq bir ishning özige layiq ixlasi bardur, mesilen: semimiy ixlas bilen baghlan'ghan muhebbetning bir zerrisi, bérer menpe'et yüzisidin baghlan'ghan minglarche muhebbettin elwette chong we qimmetliktur. Chin muhebbetni körüshni xalighan kishi anilarning tebi'itige qarisa bolidu.

Heqiqiy xalis muhebbetke anilar sazawerdur. Ular perzentliri üchün nurghunlighan japa - musheqqetlerni tartip, chin dilidin baliliri üchün köyüp - piship, ularni chong qilidu. Lékin u qilghanliri üchün baliliridin bérer mukapat yaki sowgha -salam tama qilmaydu, bérer payda közlimeydu. Ademmu birer nersige ixlas qilghan iken, shundaq chin eqide we söygü bilen ixlas qilghandila, ghelibige érisheleydu."

Emeller köpliki bilen ölchenmeydu

Muhemmed niyaz hajimning éytishiche, kömür kilogram, hetta tonnilap, altun bolsa gramlap tartilidu. Ixlasliq emel altun bolsa, ixlassiz emel kömürge oxshaydu. Bu misaldin ixlasliq ibadet bilen ixlassiz emel- ibadetning otturisidiki perq ochuq körünüp turuptu.

Ixlasmenler qilghan ishlirini bashqilargha körsetmeydu

Heqiqiy ixlasmen adem wetini üchün, milliti üchün we jimi insaniyet üchün qandaqla bir yaxshi ishni qilmisun, özining yaxshi ishlirini kishilerge bildürüsh üchün aldirap qalmaydu. Belki yaxshi ishning tamamlinishi üchünla aldiraydu. Allah ta'alamu mundaq ixlasmen bendilerni yaqturidu we uninggha medet béridu.

Birawning qilghan emelliri we yaxshiliqliri qarimaqqa qanchilik katta bolup ketsimu, eger uning qilghan ishlirida chin ixlas bolmisa, uning ejri asanla yoqqa chiqidu. Chünki bashqilarning közlirini boyash üchün qilin'ghan emeller özlükidin netijisiz qalidu. Mundaq qilghuchilarni allahmu yaqturmaydu. Emma chin ixlas bilen qilin'ghan yaxshi emel qarimaqqa kichik bolsimu, uning ejri we netijisi katta bolidu. (Ömerjan )

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet