Америка дөләт мәҗлисидә уйғур мәдәнийәт күни өткүзүлди


2006-03-15
Share
Америка дөләт мәҗлиси авам палатасиниң әзалири там лантос әпәнди уйғур мәдәнийәт күнидә сөзлимәктә.

Америка пайтәхти вашингтондики хәлқара уйғур кишилик һоқуқ вә демократийә фонди җәмийити билән америка дөләт мәҗлисиниң кишилик һоқуқ гурупписиниң тәшкиллиши билән 3-айниң 14-күни кәч саәт 5 йеримдин тоққузғичә, америка дөләт мәҗлисиниң канан иш бинасида уйғур мәдәнийәт күни өткүзүлди. Бу паалийәтни, атақлиқ уйғур кишилик һоқуқ паалийәтчиси, хәлқара уйғур кишилик һоқуқ вә демократийә фонди җәмийитиниң президенти рабийә қадир ханим өзи баш болуп уюштурған.

Рәңга- рәң нәпис уйғур миллий кийимлирини кийгән уйғурлар, уйғурларниң америкилиқ достлири шуниңдәк америка ташқи ишлар министирлиқи вә америка дөләт мәҗлисиниң бир қисим юқири дәриҗилик әрбаблири һәм хизмәтчи хадимлири бир йәргә җәм болуп, 30 нәччә хил уйғур таамлири вә уйғур қиз-йигитлириниң шох усуллиридин һозурланди.

Қазақистанниң яркәнт шәһиридин кәлгән "яркәнт булбуллири" намлиқ миллий нахша-усул гурупписиниң шуниңдәк шветсийидә яшайдиған уйғур музиканти күрәш күсәнниң һәм сабиқ өзбекистан дөләтлик уйғур ансамбилиниң нахшичиси султан мәмәтопниң иҗрасидики уйғурчә нахша-музикилардин һозурланди.

Бу йәргә йәнә уйғур миллий алаһидиликини әкис әттүридиған сизма сүрәтләр шуниңдәк уйғурларниң сиясий, иҗтимаий вә мәдәнийәт һаятини җүмлидин хитай һөкүмитиниң уйғур диярида елип бериватқан бастуруш сиясәтлирини намайән қилидиған 200 парчидин артуқ фото сүрәтлири һәмдә уйғур миллий чалғу әсваблириниң өрнәклири қоюлған иди

Бу уйғурларниң америка тарихида җүмлидин уйғурларниң узун әсирлик сиясий вә мәдәнийәт тарихида биринчи қетим америка дөләт мәҗлисидә мәхсус уйғур мәдәнийәт күни өткүзүши болуп һесаблиниду. Мурасимниң ечилиши нутуқлирини америка дөләт мәҗлисиниң қармиғидики инсан һоқуқи гурупписиниң рәиси том лантос әпәнди, хәлқара уйғур кишилик һоқуқ вә демократийә фонди җәмийитиниң президенти рабийә қадир ханим, хәлқара кәчүрүм тәшкилатиниң асия бөлүминиң мәсули т.Кумар вә америкиниң сабиқ муавин ташқи ишлар министири лорн крайнер қатарлиқлар сөз қилди.

Хәлқара уйғур кишилик һоқуқ вә демократийә фонди җәмийитиниң тәшкиллиши билән вашингтон әтрапида яшайдиған бир қисим уйғур қиз-йигитлири бир қанчә айдин буян җиддий усул тәйярлиқлирини елип барди. Уйғур җамаити бу паалийәтни маддий вә мәниви җәһәтләрдин қоллап қуввәтлиди.

Бу паалийәткә америка, японийә, түркийә қатарлиқ мәмликәтләрниң ахбарат васитилири мәхсус мухбирларни әвәткән болуп, улар паалийәтниң әмәлий әһвалини тарқитиш үчүн сүрәтләргә алди.( Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт