Amérika dölet mejliside Uyghur medeniyet küni ötküzüldi

• Muxbirimiz ümidwarning bu heqtiki toluq melumati
• Download story audio

Amérika dölet mejlisi awam palatasining ezaliri tam lantos ependi Uyghur medeniyet künide sözlimekte.

Amérika paytexti washin'gtondiki xelq'ara Uyghur kishilik hoquq we démokratiye fondi jem'iyiti bilen amérika dölet mejlisining kishilik hoquq guruppisining teshkillishi bilen 3-ayning 14-küni kech sa'et 5 yérimdin toqquzghiche, amérika dölet mejlisining kanan ish binasida Uyghur medeniyet küni ötküzüldi. Bu pa'aliyetni, ataqliq Uyghur kishilik hoquq pa'aliyetchisi, xelq'ara Uyghur kishilik hoquq we démokratiye fondi jem'iyitining prézidénti rabiye qadir xanim özi bash bolup uyushturghan.

Rengga- reng nepis Uyghur milliy kiyimlirini kiygen Uyghurlar, Uyghurlarning amérikiliq dostliri shuningdek amérika tashqi ishlar ministirliqi we amérika dölet mejlisining bir qisim yuqiri derijilik erbabliri hem xizmetchi xadimliri bir yerge jem bolup, 30 nechche xil Uyghur ta'amliri we Uyghur qiz-yigitlirining shox usulliridin hozurlandi.

Qazaqistanning yarkent shehiridin kelgen "yarkent bulbulliri" namliq milliy naxsha-usul guruppisining shuningdek shwétsiyide yashaydighan Uyghur muzikanti küresh küsenning hem sabiq özbékistan döletlik Uyghur ansambilining naxshichisi sultan memetopning ijrasidiki Uyghurche naxsha-muzikilardin hozurlandi.

Bu yerge yene Uyghur milliy alahidilikini ekis ettüridighan sizma süretler shuningdek Uyghurlarning siyasiy, ijtima'iy we medeniyet hayatini jümlidin xitay hökümitining Uyghur diyarida élip bériwatqan basturush siyasetlirini namayen qilidighan 200 parchidin artuq foto süretliri hemde Uyghur milliy chalghu eswablirining örnekliri qoyulghan idi

Bu Uyghurlarning amérika tarixida jümlidin Uyghurlarning uzun esirlik siyasiy we medeniyet tarixida birinchi qétim amérika dölet mejliside mexsus Uyghur medeniyet küni ötküzüshi bolup hésablinidu. Murasimning échilishi nutuqlirini amérika dölet mejlisining qarmighidiki insan hoquqi guruppisining re'isi tom lantos ependi, xelq'ara Uyghur kishilik hoquq we démokratiye fondi jem'iyitining prézidénti rabiye qadir xanim, xelq'ara kechürüm teshkilatining asiya bölümining mesuli t.Kumar we amérikining sabiq mu'awin tashqi ishlar ministiri lorn kraynér qatarliqlar söz qildi.

Xelq'ara Uyghur kishilik hoquq we démokratiye fondi jem'iyitining teshkillishi bilen washin'gton etrapida yashaydighan bir qisim Uyghur qiz-yigitliri bir qanche aydin buyan jiddiy usul teyyarliqlirini élip bardi. Uyghur jama'iti bu pa'aliyetni maddiy we meniwi jehetlerdin qollap quwwetlidi.

Bu pa'aliyetke amérika, yaponiye, türkiye qatarliq memliketlerning axbarat wasitiliri mexsus muxbirlarni ewetken bolup, ular pa'aliyetning emeliy ehwalini tarqitish üchün sür'etlerge aldi.( Ümidwar)