Istanbul zeytinburnuda 9 - nöwetlik medeniyet künliri pa'aliyiti ötküzüldi

Istanbulgha qarashliq zeytinburnu sheherlik hökümetning uyushturushi bilen 9 yildin buyan yilda bir qétim medeniyet künliri pa'aliyetliri uyushturuluwatqan bolup, bu yil 9 - nöwetlik medeniyet künliri pa'aliyiti ötküzüldi.
Ixtiyari muxbirimiz arslan
2012-09-21
Share
turkiye-istanbul-9-nowetlik-mediyet-kuni-305.png Zeytinburnu sheher bashliqi murad aydin bu yighilishta sözlimekte
RFA/Arslan


9 - Nöwetlik medeniyet künliri namidiki pa'aliyet 2012 - yili 9 - ayning 10 - küni zeytinburnu medeniyet - sen'et merkizining yighin zalida bashlan'ghan bolup, bu pa'aliyet 9 - ayning 28 - künigiche 18 kün dawam qilidiken. Bu pa'aliyetke ottura asiya, kawkasiye we türkiyining her qaysi sheherliridin köchüp kélip zeytinburnuda olturaqliship qalghan xelqler teripidin qurulghan 18 ammiwiy teshkilat qatnashti we milliy medeniyetlirini tonushturup pa'aliyet körsetti.

Zeytinburnu medeniyet merkizining aldidiki chong meydan'gha 18 ammiwiy teshkilat ayrim - ayrim körgezme we milliy medeniyet, örp - adetlirini tonushturup her xil qimmetlik milliy boyumlirini körgezmige qoyghan. Bu qatarda sherqiy türkistan köchmenler jem'iytimu orun alghan bolup, sherqiy türkistan köchmenler jem'iyiti körgezmige sherqiy türkistan bayriqi bilen ottura asiyadiki 7 döletning bayriqini ésip türk birliki simwoli shekillendürgen. Uningdin bashqa yene, türkistan polusi, manta we qazaq chéyi qatarliq milliy ta'amlarni qoyup ziyaretchilerge teqdim qildi.

Bu yighilishqa qatnashquchilardin bir körünüsh
Bu yighilishqa qatnashquchilardin bir körünüsh

Bu pa'aliyetning asasi meqsiti, türkiyining her qaysi sheherliridin we türk dunyasining oxshimighan jayliridin zeytinburnugha kélip olturaqliship qalghan xelqlerning, öz - ara bir - biri bilen chüshenche hasil qilishi, bir - birining örp - adet we medeniyetliri bilen tonushup chiqishi arqiliq birlik - barawerlik hasil qilishtin ibaret iken.

Bu pa'aliyetke zeytinburnuda pa'aliyet qiliwatqan sherqiy türkistan köchmenler jem'iyiti qatarliq 18 ammiwi teshkilat ishtirak qilghan bolup, bu teshkilatlardin her biri her küni nöwet bilen özlirining medeniyet örp - adetlirini, en'eniwi sen'etlirini namayan qilip pa'aliyet körsetti. Shu jümlidin 9 - ayning 20 - küni zeytinburnu kültür - sen'et merkizining yighin zalida sherqiy türkistan köchmenler jem'iyitining oyushturushi bilen "Sherqiy türkistan medeniyet kéchisi" nami astida sherqiy türkistan xelqining medeniyet - sen'etliri tonushturuldi.

Bu pa'aliyetke zeytinburnu sheher bashliqi murad aydin, türkiye armiyisi zeytinburnu shöbisining bashliqi, général eli quli'achik, zeytinburnu saqchi bashliqi metin titiz, zeytinburnu sheher bashliqi mu'awini gökan qasap, adalet we tereqqiyat partiyisi zeytinburnu shöbe bashliqi bahattin ünwer, milletchi heriket partiyisi zeytinburnu shöbe bashliqi fethi exmet alp'arslan, istanbulda yashawatqan Uyghur pishqedemlerdin, proféssur sultan mehmut qeshqerli, isma'il chin'giz we sherqiy türkistan ammiwiy teshkilatlirining mes'ulliri bolup köp sanda kishi qatnashti.

Pa'aliyet qur'an kerim tilawet qilish bilen bashlanidi, kéyin sherqiy türkistan köchmenler jem'iytining bashliqi yaqupjan échilish nutiqi sözlidi.

Yaqupjan sözide birlik - barawerlik toghrisida toxtaldi we xitay zulumi asitidiki sherqiy türkistanliqlarning awazi bolushni dawam qilidighanliqini ipadilidi. Yaqupjan sözide yene hemsheherlerni bir yerge jem qilip bu xil pa'aliyet qilishqa shert - shara'it yartip bériwatqan zeytnburnu sheher bashliqi murad aydin'gha teshekkür éytidighanliqini ipadilidi.

Yaqupjan sözide yene mundaq dédi: "Bir millet özining medeniyetlirige ige chiqqanda andin mewjutluqini saqlap qalalaydu, bu zalgha toplan'ghanlarning birliki sherqiy türkistan, istanbul we zeytinburnudiki birlik we barawerlikning körünüshi hésablinidu. Medeniyet bir milletning, bir döletning eng muhim xezinisidur, bir milletning mewjutluqini saqlap qalghan uning tarixi we medeniyiti. Tarixigha, medeniyitige, milliy yadikarliqlirigha ige chiqmighan her qandaq millet yoq bolup tügeydu. Medeniyetler otturisidiki dostluq, medeniyetler otturisidiki hemkarliq shu xelqning tereqqiy qilishigha türtke bolidu, shuning üchün birlik we barawerlik ichide medeniyetni özleshtürüsh, janlandurush we kelgüsi ewladlargha ögitish intayin muhim.

Kéyin sherqiy türkistan medeniyet we hemkarliq jem'iyitining bashliqi isma'il chin'giz sehnige chiqip 1950 - yillarda Uyghur diyaridin köchüp türkiyige kelgen Uyghur, qazaqlarning köchüsh jeryanidiki béshidin ötken külpetler, qiyinchiliqlar shundaqlar ularning qandaq bolup türkiyige kélip olturaqlashqanliqi toghrisida toxtaldi we sözlesh jeryanida u zamandiki tarixi süretlerni resim silayd körsitish arqiliq, köchüsh jeryanida yolda we kéyin türkiyige kélip wapat bolup ketken yaki hazir hayat yashawatqan muhajirlarning hayat ish - izlirini tonushturup ötti.

Pa'aliyet jeryanida yene, qazaqistandin alahide teklip qilin'ghan qazaq sen'etchi arslan ependi bir qanche parche qazaqche naxsha teqdim qildi. Kéyin ösmür balilar shé'ir oqudi, milliyche usul oynap yighin ehlining qizghin alqishigha érishti.

Axirida, zeytinburnu sheher bashliqi murad aydin ependi söz qilip mundaq dédi: zeytinburnu türkiyining bashqa sheherlirige oxshimaydighan alahide bir sheher, men buning sheher bashliqi bolghanliqim üchün özemni eng bextlik hés qilimen, chünki bu sheher maddi - meniwi her jehettin medeniyetke tolghan eng bay sheherdur, bu yerdin nechche ming kilométir uzaqlardiki qérindashlirimizning türkiye bilen baghlinishliq munasiwet qurghan yéri zeytinburnudur. Bu nahayiti ochuq, sherqiy türkistan we türk dunyasidin bir qérindishimiz anaduliyige kelgen bolsa, uning choqum zeytinburnu bilen bir baghlinishliqi bar. Bu munasiwet béghi bolsa 1950 - yillarda sherqiy türkistandin kelgen qérindashlirimiz arqiliq quruldi. Bu yerge u zamandin bashlap bügünkige kéliwatqan qérindashlirimiz bar. Sherqiy türkistandin bu yerge kelgen qérindashlirimiz we ularning ewladliri köp sanliqni teshkil qilidu.

Zeytinburnu sheher bashliqi murad aydin ependi zeytinburnugha kélip yerleshken sherqiy türkistanliqlargha xitap qilip mundaq dédi: siler bu yerge kélip bek yaxshi qilipsiler, zeytinburnuni yurt tallap bek yaxshi qilipsiler, siler kelgendin kéyin afghanistandin men silerning sayenglerde türk dunyasini bildim. U yerdiki qérindashlirimizni tonudum, u yerdiki qimmetlik medeniyetlirimizni körüsh pursitige ige boldum. Shuning üchün men özemni türkiyining eng bextlik sheher bashliqi dep hés qilimen.

Biz birlikte yashashning güzellikini hés qilish meqstide bu pa'aliyetni uyushturduq

Murad aydin sözide yene, bu pa'aliyetni oyushturushtiki asasiy meqstini ipadilep mundaq dédi: biz bu pa'aliyetlerni 9 yildin buyan uyushturup kéliwatimiz. Buningdiki meqset, zeytinburnuning bu qimmetlik medeniyetlerge ehmiyet bérishni meqset qilimiz. Türkiyidiki bu güzel körünüshke téximu köp ehmiyet bérilishini arzu qilimen, sherq, gherb, jenub shimal töt terep bilen türk dunyasi bilen, rumeli bilen, sherqiy türkistan bilen pütkül türk dunyasi quchaqlashqan yer zeytinburnu we türk dunyasi jughrapiyisining güzellikini namayen qilghan yer zeytinburnudur. Bu güzel menzirini türkiyige körsitimiz. Biz birlikte yashashning güzellikini hés qilish meqstide bu pa'aliyetni uyushturduq.

Murad aydin sözide yene, dunyaning birlik - barawerlik we dostluq ichide yashash bilen qimmiti bolidighanliqini ipadilep mundaq dédi: zeytinburnu peqet birla kishining bolsa, istanbul peqet birla kishining bolsa we u sheherde peqet shu kishidin bashqa héchkim bolmisa, türkiye peqet birla kishining bolsa we türkiyide u kishidin bashqa héchkim bolmisa, dunyada peqet birla kishi bolsa we u kishidin bashqa héchkim bolmisa, u kishning hayatining bir menisi we lezziti bolamdu? elwette bolmaydu. Zeytinburnu, bu yerde yashawatqan pütün insanlar bilen güzeldur, türkiye 75 milyon xelqi bilen, dunya 6 milyard insan bilen güzeldur. Biz birlikte yashashning güzellikini hés qilish meqstide bu pa'aliyetni uyushturduq. Biz türkiyining 81 wilayet we rumeli we sherqiy türkistandin kelduq, deslepte qoshna bolup yashiduq, kéyin qiz bérip - qiz élip uruq - toghqan bolduq we axirida 75 milyon xelqning bölünmeydighan pütünlükige zeytinburnudin hesse qoshtuq. Bu yerde kök bayraq bilen albayraq birge lepildewatidu, qiyametkiche bu bayraqlar birlikte lepildigey. Allah birlikimizni kücheytkey.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet