Olimpik munasiwiti bilen makanliridin köchürüwétilgen adem sani saxta élan qilinmaqta

• Muxbirimiz eqidening bu heqtiki toluq melumati
• Download story audio

Béyjing hökümitining bildürüshiche, béyjing olimpik meydani qurulushi munasiwiti bilen, turalghu makanliridin ayrilghan adem sani aran 14 ming ikenlikini, bularning 6034 a'ilining ezaliridin terkip tapqanliqini bildürdi.

Béyjing sheherlik qurulush komitétining mu'awin mudiri jang jyaming charshenbe küni muxbirlarni kütiwélish yighinida, bu heqte éniq sanliq melumat bergen bolup, u olimpik meydanini yasash jeryanida toplam 14 ming 901 ademning öyliridin köchürülgenlikini, shuningdek bu kishilerning öz ixtiyarliqi bilen köchürülgenlikini tekitligen. Biraq, jang éytqan sanliq melumat, bir qisim xelq'ara teshkilatlar teripidin teminlen'gen sanliq melumattin alahide derijide perqlinidighanliqi ashkarilanmaqta.

1 Milyon 250 ming kishining öy makanliridin köchürülgenliki melum

Xelq'ara kishilik hoquq teshkilatigha tewe "turalghu öy ‏- zémin hoquqi we mejburiy qoghlap chiqirish mesilisi merkizi" ning éniqlishiche, xitayda olimpik meydani berpa qilish üchün élip bérilghan teyyarliq xizmiti jeryanida 1 milyon 250 ming kishining öy makanliridin köchürülgenliki melum bolghan.

Olimpik tenterbiye sariyini yasash tüpeyli öyliridin köchürülgen adem sani heqqide élan qilin'ghan bu ikki sanning otturisidiki perqning bu qeder chong derijide perqlinishi, xitay hökümiti peqet, olimpik meydanini yasash üchün, shu meydan da'irisige tewe jaydiki köchürülgen ahalilar toghrisidiki sannila élan qilghan bolup, bu san olimpikni kütiwélish üchün retke sélish, béyjing shehirining muhitini güzelleshtürüsh üchün, sheherlik hökümet teripidin élip bérilghan qurulushta mejburiy halda öyliri chéqiwétilip köchürülgen adem sanini öz ichige almaydiken.

Közetküchiler: olimpik munasiwiti bilen köchürülgen ahalilarning sanini saxta élan qilish yaman aqiwetlerni meydan'gha keltüridu

Bu heqte mulahize yürgüzgen xitay mesililiri buyiche tetqiqatchi, türkiye hajetepe uniwérsitétining proféssori doktori erkin ekrem ependi, xitay hökümitining olimpik meydani berpa qilish shuningdek olimpik murasimi üchün teyyarliq körüsh jeryanida élip bérilghan, ahalilarni öy ‏- zéminliridin köchüriwétish mesiliside sanliq melumatni éniq élan qilmay, saxta melumat élan qilishining olimpik murasimigha xilap bir heriket ikenlikini, buningdin xitayning ezeldin saxta uchurlarni élan qilish arqiliq xelq'arani aldap kéliwatqanliqini biliwalghili bolidighanliqini körsitip ötti.

Erkin ekrem ependi meydan'gha kélidighan birinchi xil aqiwet toghrisida toxtulup ötidu. Öy ‏- makanliridin ayrilghan béyjing ahalisi, yeni 1 milyon 250 ming ademning hemmisi, öz raziliqi bilen makanlirini tapshurup bergenmu, yaki xitay hökümiti nöwette ijra qiliwatqan öy - zéminliridin köchürüshke qoshulmighan ahalilargha nisbeten, buyruq buyiche mejburiy halda köchürüsh usuli bilen bésim ishlitish arqiliq köchürülgenmu? dégen mesile buyiche mulahize yürgüzgen erkin ekrem ependi meydan'gha kelgen ikkinchi xil aqiwet heqqide toxtulup ötidu. (Eqide)