Mektep mudirining xizmitidin qaldurulush sewebi

Hazir Uyghur élide hökümet kadirlirining, oqutquchi - oqughuchilarning jüme namizigha kirishi cheklen'gen bolup, xitay hökümiti idare, organlarda bu toghriliq mexsus höjjet tarqitish bilen bille, her qaysi nahiye, yézilardiki meschitlerde her jüme küni jüme namizigha kirgen kadirlarni hem 18 yashtin töwen mektep oqughuchilirini, shu yéziliq saqchixana, yéziliq hökümet hetta oqutquchilar teshkillinip tizimgha élishqa hem ashu tizimlik boyiche ulargha öz xizmet orunlirida chare körüshke bashlighan.
Muxbirimiz mihriban
2009-06-22
Élxet
Pikir
Share
Print
Héytgah meschitide namaz oquwatqan uyghurlar.
Héytgah meschitide namaz oquwatqan uyghurlar.
AFP Photo

Biz ötken hepte, Uyghur tor betliridin Uyghur élidiki melum bashlan'ghuch mektep mudirining, nahiyilik hökümetning özini jüme küni meschitke kirgenlerni tizimlash ishigha qoyghanliqini ret qilghanliqi üchün, qolgha élin'ghanliqi heqqidiki inkaslarni körgendin kéyin, sürüshtürüsh arqiliq bu weqening heqiqeten bolup ötkenlikini, emma bu mektep mudirining qolgha élinish emes, belki mektep mudirliq hem oqutquchiliq wezipisidin élip tashlan'ghanliqi heqqidiki ehwalni igiliduq.

Bu ishning öz kentide bolup ötkenlikini bayan qilghan bir déhqan, bu kishining öz kentidiki bashlan'ghuch mektep mudiri bolup, bu yil 5 - ayning bashliri, yéziliq hökümetning shu yézidiki jüme namizigha kirgen oqutquchi, oqughuchilarni namazgha kirishtin tosushni ret qilghanliqi üchün, nahiyilik hökümet teripidin wezipisidin élip tashlan'ghanliqini, bu ishni pütün yézidikilerning bilidighanliqini inkas qildi.

Biz bu mektep mudiri ishligen mektepke téléfon qilghinimizda téléfonimizni alghan mektepning partiye yachéyka sékrétari,deslep mektep mudirining bir nechche kün ruxset sorighanliqini, hazir ishxanida yoqluqini éytti, u bizning erkin asiya radi'o istansisidin téléfon qiliwatqanliqimizni bilgendin kéyin, mektep mudirining xitay tili sewiyisi töwen bolghanliqi üchün, nahiyilik ma'arip idarisi uni xizmettin toxtatqanliqini bayan qildi. Bu kishi bizning heqiqiy ehwalni bilidighanliqimizni uqqandin kéyin, bu mesilining bir qeder sezgür mesile ikenlikini, özini tengqisliqta qoymasliqimizni, eng yaxshisi xizmitidin istépa bergen ashu mektep mudirining özi bilen sözleshsek téximu yaxshi bolidighanliqini éytti.

 Téléfonimizni alghan sabiq mektep mudiri bizning téléfonni erkin asiya radi'o istansisidin uruwatqanliqimizni bilgendin kéyin, nahayiti sezgürlük bilen, özining yéshi toshup qalghanliqi üchün özlükidin istépa sorighanliqini éytip, bu toghriliq artuq sözligüsi yoqluqini bildürdi.

Uyghur tor betliride, Uyghur élidiki ziyaliylargha chüshken bésimning nahayiti éghirliqi heqqide bes - munaziriler köpiyiwatqan bolup, hökümet kadirlirining, ziyaliylarning bolupmu oqutquchilarning hökümetning türlük emir,permanlirini, özi xalimisimu orunlashqa mejbur ikenliki, buninggha boysunmighanlarning xitay hökümiti teripidin her waqit jazaliniwatqanliqi heqqidiki munaziriler bérilmekte.

Melum bir tor bétide, nahiyilik hökümetning jümege kirgenlerni tizimlashqa qarshi turghanliqi uchun, xizmitidin qaldurulghan bu mektep mudirigha oxshash aqiwetke qalghan ziyaliylarning nahayiti köplüki, lékin Uyghur ziyaliylirining heqiqet üchün xelq terepte tursila xelqning ularni qedirleydighanliqi bayan qilinip, bu mektep mudirining jasaritige kishilerning hörmiti ipadilen'gen.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet