Enqerede Uyghurlar heqqide melumat bérish yighini chaqirildi

Sherqiy türkistan medeniyet we hemkarliq jem'iyiti enqere shöbisining mes'uli xeyrullah efendigil ependi heptilik yighinida soz qildi. 2011-Yili 8-yanwar.

1-Ayning 8-küni chüshtin kéyin milletchi heriket partiyisining enqere altuntagh rayonluq shöbisining rehberliri we ezaliridin bolup köp sanda kishi teshkilatning enqerediki ishxanisida Uyghurlarning hazirqi weziyiti heqqide doklat anglidi.

Yighinda aldi bilen sherqiy türkistan medeniyet we hemkarliq jem'iyiti enqere shöbisining mes'uli xeyrullah efendigil ependi Uyghurlarning hazirqi weziyiti heqqide qisqiche melumat bergendin kéyin milletchi heriket partiyisi altuntagh rayoni mes'uli hesen qartal ependi söz qildi. Kéyin méhmanlargha Uyghur tamaqliri bilen ziyapet bérildi. Ziyapettin kéyin sherqiy türkistan medeniyet we hemkarliq jem'iyitining kichik zalida méhmanlargha "5-iyul ürümchi weqesining aldi keynide" témisida ishlen'gen höjjetlik filim körsitildi.

5-Iyul ürümchi weqesining kélip chiqish sewebliri we 5-iyul ürümchi weqesidin kéyinki weziyet bayan qilin'ghan bu höjjetlik filimni körgen milletchi heriket partiye mes'ulliri köz yashlirini tutalmidi.

Mezkur söhbet yighini bu témini chöridigen halda 2 sa'et etrapida dawam qildi.

Sherqiy türkistan medeniyet we hemkarliq jem'iyiti enqere shöbisining mes'uli xeyrullah efendigil ependining éytishiche, ular bu yil 6-ayda türkiyide omumi saylam ötküzülüp, hakimiyet béshidiki partiye almashqan teqdirde bashqa partiyilerningmu Uyghur mesilisige köngül bölüshini emelge ashurush üchün bu pa'aliyetni bashlighan.

RFA/Erkin Tarim

Yighin axirlashqandin kéyin milletchi heriket partiyisi rayon mes'ulliridin munire sofo'oghlu xanim bu pa'aliyetning ehmiyiti heqqide toxtilip mundaq dédi: "bu höjjetlik filimde körsitilgenlerni ürümchi weqesi yüz bergende téléwizorlardin körgen iduq. Emma awazsiz peqetla körünüshler körsitilgen idi. Bu échinishliq körünüshlerni körüp chidiyalmay chiqip kettim. 18-19 Yashliq bigunah balilargha ölüm jazasi bériliptu, menche ularning birdin bir gunahi Uyghur we musulman bolushi. Bularni dunya jama'etchilikige anglitish kérek, shunga bu xil yighilishlar bek muhim."

Bügünkige oxshash türkiyidiki siyasiy partiyilerning mes'ullirini chaqirip melumat bérish pa'aliyetlirining Uyghurlargha paydisi bolarmu sizche? dégen so'alimizgha munire xanim mundaq jawab berdi: "elwette paydisi bolidu. Mesilen bu yil 5-iyulda pütün siyasiy partiyilerde 5-iyulni xatirilesh yighini ötküzse bolidu. Herqaysi partiyilerning her derijilik yighinida türkiye siyasitini tilgha alghanda 5-iyul weqesinimu tilgha alsa bolidu. Sherqiy türkistan mesilisini türkiyidiki pütün siyasiy partiyining dawasigha aylandurushimiz kérek."

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar