Мәрһумә гөһәрниң 10 йиллиқ һекайиси

10 Йил аввал америкида йүз бәргән 11-сентәбир террорлуқ һуҗумида, дуня сода мәркизи бинасиниң айропилан билән соқуп көмүрүветилгәндә, бинаниң 96-қәвитидә уйғур қизи гөһәрму бар иди.
Мухбиримиз гүлчеһрә
2011.09.08
dunya-sod-merkizi-koyuwatqan-korunush-305.jpg Дуня сода мәркизиниң көйүватқан көрүнүши. 2001-Йили 11-сентәбир, ню йорк.
AFP

10 Йил аввал америкида йүз бәргән 11-сентәбир террорлуқ һуҗумида һәр ирқ, һәр милләттин болуп 3000 ға йеқин бигунаһ инсан мәзкур пәвқуладдә зор паҗиәдә җан бәрди. Бу паҗиә ата-аниларни балилиридин, балиларни ата-анисидин, бәзиләрни һәмраһлиридин, дост -ярәнлиридин вақитсиз айриди. Шу паҗиәниң биваситә қурбаниға айланғанлар ичидә әйни чағда нюйорктики икки данә айропилан соқулған даңлиқ қошмақ бина-дуня сода мәркизи бинасиниң 96-қәвитидә хизмәт қиливатқан уйғур қизи гөһәрму бар иди. Аридин он йил өтти, көп нәрсиләр өзгәрди, әмма гөһәрниң ата-анисиниң үмиди өзгәрмиди. Улар қизини һазирму “һаят” дегән үмидтә, 11-сентәбир террорлуқ һуҗуминиң биваситә қурбаниға айланған бу уйғур аилисиниң һекайисини мухбиримиз гүлчеһрәдин аңлайли.

Дуняниң һәр қайси җайлиридин америка туприқиға дәссигән һәр бир инсанға охшаш, көңлигә аҗайип гүзәл арзу-арманларни пүккән өзбәкстанлиқ 24 яшлиқ уйғур қизи гөһәр сейтмәмәт нюйорктики дуня сода мәркизиниң 96-қәвитидә хизмәттә иди, 2001-йили 11-сентәбир саәт 9 дин 3 минут өткәндә, у хизмәт қиливатқан бу бинаға террорчилар тәрипидин қачурулған икки данә айропилан арқа-арқидин соқулди. Бу хәвәр дуняниң барлиқ ахбарат мәнбәлирини қаплиди, әлвәттә хәвәрни көрүп олтурған гөһәрниң аниси пәридә ханимниң йүрики туюқсиз ағди, бәлким у арзулуқ қизи, балиларниң чоңи гөһәрниң паҗиәгә йолуққанлиқиниң бешарити болса керәк.

Мана һазир гөһәрниң аилиси өзбекистандики һаятини, өгәнгән қору-җайлирини барлиқини ташлап қизиниң дерикини қилип, қалған төт пәрзәнтини елип аилә бойичә америкиға кәлди.

Аридин 10 йил өтти, һәр йили 11-сентәбир улар террор һуҗумиға учриған қошмақ бина харабисидә өткүзүлидиған 11-сентәбир террорлуқ һуҗуминиң бигунаһ қурбанлирини хатириләш паалийигә қатнишиду, аилидә қуран тилавәтләр қилип, узун-узун олтуруп дуалар қилиду. Аридин 10 йил өтти, көп нәрсиләр өзгәрди, әмма һазирға қәдәр пәридә ана башқа қизлирини арилапла “гөһәр” дәп чақирип салиду, һәр вақ әткән тамиқидин ихтиярсиз һалда гөһәр қизимға дәп елип қойиду....Униң бу адити өзгәрмиди.

Ата аилиниң түврүки, аниниң, балиларниң роһи йөлики, анилар бешиға еғир күн кәлгәндә униң йәлкисигә бешини қоюп, балилар болса униң қучиқиға өзини етип қанғичә йиғливалиду, еғир күнләрдә атилар башқиларниң бешини силайду-ю, өзи йүрикидә йиғлайду. Чоң қизи гөһәрдин вақитсиз айрилған сейтмәмәт акиму әнә шундақ сәврчан җәсур бир ата, у барлиқ ғәм-ғуссини ичигә ютқачқимикин, қизи паҗиәгә йолуққан бу 10 йил ичидә, бир қанчә он қетим дохтурда ятти, икки қетим чоң апиратсийигә кирди, саламәтлики бу сәврчан ата үчүн турмуштики еғирчилиқ һесабланмайду, әң еғир келидиғини 11-сентәбир террорлуқ һуҗумиға учриғанда қизини бинадин юлуп қутқузуп чиқишқа қурби йәтмигәнлики, паҗиә йүз бәргәндә қизиниң қандақ қорқунчлуқ әһвалларда қалғанлиқи һәққидики түгимәс қияслири, қайтилинидиған ечинишлиқ, қорқунчлуқ көрүнүшләр, гөһәрниң чирқирашлири, “дада мени қутқузуң!!!” дәп варқирашлири.... Бу қара чүш 10 йил, һәр күни қанчә қетимлап униң меңисидә тәкрарлиниду.

3000Ға йеқин бигунаһ инсан, 10 йил аввалқи террорлуқ һуҗумниң қурбаниға айланди, бу һәр қитә, һәр дөләт, һәр милләт, һәр дин, һәр ирқтики бигунаһ инсанлар арисидики өзбәкстанлиқ уйғур қизи гөһәр уйғурларниңму дуняни титрәткән 11-сентәбир паҗиәсиниң қурбани икәнликиниң символи сүпитидә әслинип, хатирилинип кәлмәктә. Бу яш кәткән һаятниң роһи һелиһәм аримизда.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.