Merhume göherning 10 yilliq hékayisi

10 Yil awwal amérikida yüz bergen 11-séntebir térrorluq hujumida, dunya soda merkizi binasining ayropilan bilen soqup kömürüwétilgende, binaning 96-qewitide Uyghur qizi göhermu bar idi.
Muxbirimiz gülchéhre
2011-09-08
Share
dunya-sod-merkizi-koyuwatqan-korunush-305.jpg Dunya soda merkizining köyüwatqan körünüshi. 2001-Yili 11-séntebir, nyu york.
AFP

10 Yil awwal amérikida yüz bergen 11-séntebir térrorluq hujumida her irq, her millettin bolup 3000 gha yéqin bigunah insan mezkur pewqul'adde zor paji'ede jan berdi. Bu paji'e ata-anilarni baliliridin, balilarni ata-anisidin, bezilerni hemrahliridin, dost -yarenliridin waqitsiz ayridi. Shu paji'ening biwasite qurbanigha aylan'ghanlar ichide eyni chaghda nyuyorktiki ikki dane ayropilan soqulghan dangliq qoshmaq bina-dunya soda merkizi binasining 96-qewitide xizmet qiliwatqan Uyghur qizi göhermu bar idi. Aridin on yil ötti, köp nersiler özgerdi, emma göherning ata-anisining ümidi özgermidi. Ular qizini hazirmu "Hayat" dégen ümidte, 11-séntebir térrorluq hujumining biwasite qurbanigha aylan'ghan bu Uyghur a'ilisining hékayisini muxbirimiz gülchéhredin anglayli.

Dunyaning her qaysi jayliridin amérika tupriqigha dessigen her bir insan'gha oxshash, könglige ajayip güzel arzu-armanlarni pükken özbekstanliq 24 yashliq Uyghur qizi göher séytmemet nyuyorktiki dunya soda merkizining 96-qewitide xizmette idi, 2001-yili 11-séntebir sa'et 9 din 3 minut ötkende, u xizmet qiliwatqan bu binagha térrorchilar teripidin qachurulghan ikki dane ayropilan arqa-arqidin soquldi. Bu xewer dunyaning barliq axbarat menbelirini qaplidi, elwette xewerni körüp olturghan göherning anisi peride xanimning yüriki tuyuqsiz aghdi, belkim u arzuluq qizi, balilarning chongi göherning paji'ege yoluqqanliqining béshariti bolsa kérek.

Mana hazir göherning a'ilisi özbékistandiki hayatini, ögen'gen qoru-jaylirini barliqini tashlap qizining dérikini qilip, qalghan töt perzentini élip a'ile boyiche amérikigha keldi.

Aridin 10 yil ötti, her yili 11-séntebir ular térror hujumigha uchrighan qoshmaq bina xarabiside ötküzülidighan 11-séntebir térrorluq hujumining bigunah qurbanlirini xatirilesh pa'aliyige qatnishidu, a'ilide qur'an tilawetler qilip, uzun-uzun olturup du'alar qilidu. Aridin 10 yil ötti, köp nersiler özgerdi, emma hazirgha qeder peride ana bashqa qizlirini arilapla "Göher" dep chaqirip salidu, her waq etken tamiqidin ixtiyarsiz halda göher qizimgha dep élip qoyidu....Uning bu aditi özgermidi.

Ata a'ilining tüwrüki, anining, balilarning rohi yöliki, anilar béshigha éghir kün kelgende uning yelkisige béshini qoyup, balilar bolsa uning quchiqigha özini étip qan'ghiche yighliwalidu, éghir künlerde atilar bashqilarning béshini silaydu-yu, özi yürikide yighlaydu. Chong qizi göherdin waqitsiz ayrilghan séytmemet akimu ene shundaq sewrchan jesur bir ata, u barliq ghem-ghussini ichige yutqachqimikin, qizi paji'ege yoluqqan bu 10 yil ichide, bir qanche on qétim doxturda yatti, ikki qétim chong apiratsiyige kirdi, salametliki bu sewrchan ata üchün turmushtiki éghirchiliq hésablanmaydu, eng éghir kélidighini 11-séntebir térrorluq hujumigha uchrighanda qizini binadin yulup qutquzup chiqishqa qurbi yetmigenliki, paji'e yüz bergende qizining qandaq qorqunchluq ehwallarda qalghanliqi heqqidiki tügimes qiyasliri, qaytilinidighan échinishliq, qorqunchluq körünüshler, göherning chirqirashliri, "Dada méni qutquzung!!!" dep warqirashliri.... Bu qara chüsh 10 yil, her küni qanche qétimlap uning méngiside tekrarlinidu.

3000Gha yéqin bigunah insan, 10 yil awwalqi térrorluq hujumning qurbanigha aylandi, bu her qit'e, her dölet, her millet, her din, her irqtiki bigunah insanlar arisidiki özbekstanliq Uyghur qizi göher Uyghurlarningmu dunyani titretken 11-séntebir paji'esining qurbani ikenlikining simwoli süpitide eslinip, xatirilinip kelmekte. Bu yash ketken hayatning rohi hélihem arimizda.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet