D u q qatarliq xelq'araliq teshkilatlar merkil xanimgha ochuq xet yazdi

Xelq'ara kechürüm teshkilati, chégrasiz muxbirlar teshkilati, xelq'ara tibet herikitini himaye qilish teshkilati we d u q birlikte gérmaniye bash ministiri merkil xanimgha qarita ochuq xet élan qildi.
Ixtiyariy muxbirimiz ekrem
2011.06.27
Angela-Merkel-305.jpg Gérmaniye bash ministiri angela merkil xanim. 2011-Yili 28-yanwar.
en.wikipedia.org

Gérmaniye axbarat agéntliqining 6-ayning 25-küni bayan qilishiche, xitay bash ministiri wén jyabawning gérmaniye ziyariti munasiwiti bilen xelq'ara kechürüm teshkilati, chégrasiz muxbirlar teshkilati, xelq'ara tibet herikitini himaye qilish teshkilati we d u q qatarliq teshkilatlar 24-iyun küni birlikte gérmaniye bash ministiri merkil xanimgha qarita ochuq xet élan qilip, xitay bilen bolghan söhbette ochuq-ashkara halda kishilik hoquq mesilisini otturigha qoyushni telep qilghan.

Xitay bash ministiri wén jyabawning yawropadiki üch döletke bolghan ziyaritining tunji küni élan qilin'ghan bu xet gérmaniye metbu'atlirida diqqetni qozghidi. Wén jyabaw ziyaritining birinchi békiti wén'griyige bolup, u 24-iyun küni budapéshtqa kelgen idi. 26-Iyundin bashlap en'gliyide ziyarette bolup, axirqi qedem 27-28-iyunda gérmaniye ziyaritini dawamlashturatti. Xelq'ara kechürüm teshkilati gérmaniye shöbisining mes'uli maya ependi gérmaniye axbarat agéntliqining ziyariti qobul qilghanda, merkil xanimning xitay bash ministiri bilen körüshkende ochuq-ashkara halda kishilik hoquq mesilisini otturigha qoyup, xitaygha bésim ishlitishi kéreklikini tekitligen. U sözide, yillardin béri gérmaniyining xitay bilen bolghan kishilik hoquq söhbitining yépiq halette dawamliship kelgenlikini, emdi perdini échip, xitayni dunya jama'iti aldida ashkara tenqidlishi kéreklikini éytqan. U yene gérmaniye hökümitining xitay bilen bolghan kishilik hoquq söhbitining emeliy qedem basidighan basquchqa kelgenlikini, söhbette kishilik hoquq mesilisini tilgha élip qoyush bilenla cheklenmeslikini, belki kishilik hoquq pa'aliyetchilirini qoghdaydighan héqiqi tüzülme berpa qilish zörürlükini eskertken.

Gérmaniye dolqunliri radi'osi 26-iyun küni élan qilghan “Gérmaniye kishilik hoquq teshkilati hökümetning xitayni ochuq tenqidlishini telep qildi” namliq xewiride bayan qilinishiche, kishilik hoquq teshkilati merkil hökümitidin xitay bash ministiri bilen bolghan söhbette kishilik hoquq mesilisini merkizi téma qilishini telep qilghan. Xewerde éytilishiche, kishilik hoquq teshkilatliri gérmaniye hökümitining xitay bilen bolghan söhbette eger xitaydiki kishilik hoquq mesilisini shekil jehettinla tilgha alsa, bu emeliyette “Apet xaraktérlik bir signal bolidu” dégen.

Gérmaniye bash ministiri merkil xanimgha ochuq xet yézishni d u q teshkilligen bolup, bu toghrisida d u q bash katipi dolqun eysa ependi chüshenche bérip ötti.

Wén jyabaw gérmaniyidiki ziyaritide gérmaniye terep bilen iqtisadiy we medeniy sahelerde bir yürüsh kélishimlerni imzalimaqchi bolghan. Gérmaniye axbarat agéntliqining 27-iyundiki xewerliride körsitilishiche, xitay bash ministiri wén jyabawning bu qétimqi gérmaniye ziyariti jeryanida yene, xitay terep bilen bir süre medeniy hemkarliqlar ornitilidiken. Gérmaniye we xitaydiki muzéylar, kutupxanilar, opéra ömekliri otturisidimu kélishimler tüzilidiken. Gérmaniye tashqi ishlar ministirliqining bildürüshiche, ikki dölet otturisida yene medeniy sahediki kespiy xadimlarni öz'ara terbiyilesh we kino filimliri almashturush sahesidimu hemkarliqlar ornitilidiken. 2012-Yili gérmaniyide “Xitay medeniyet yili pa'aliyiti” uyushturulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.