Bimarlar terkibide qan bolghan dorilarni ishlitip eydiz wirusini yuqturuwaldi

• Muxbirimiz méhribanning bu heqtiki melumati
• Download story audio

9 - Ayning otturiliri, xitayda qan'ghaq késilige giriptar bolghan 20 nechche neper bimar shangxeydiki bi'ologiyilik mehsulat tetqiqat orginining derwazisi aldigha yighilip, mezkur organ'gha qattiq naraziliq bildürgen. Ular yene mezkur tetqiqat orginidin bimarlargha tölem töleshni hemde bimarlardin kechürüm sorashni telep qilghan.

Qan'ghaq késili, bir xil irsiyet késili bolup, bimarning qénida qanni uyuldurush maddisi kem bolghanliqtin, yara éghizidiki qanning uyup toxtishi adettiki kishilerningkige qarighanda asta bolidiken. Shunga bimar yarilan'ghanda asan qan aqidighan we qan köp aqidighan ehwal körülidiken.

Kötirelmiseng sanggiltiwal

Bundin 10 nechche yil ilgiri, shangxeydiki bi'ologiyilik mehsulat tetqiqat orgini mexsus bir xil qan toxtitish we qanning uyup qélishini tézlitish xaraktéridiki dorini ishlep chiqqan. Lékin munasiwetlik melumatlarda körsitilishiche, mezkur tetqiqat orgini bu xil dorini ishlepchiqirishta wirus yoqitish charisini qollanmighanliqtin, köpligen qan'ghaq késili bar bimarlar bu xil dorini bir mezgil ishletkendin kéyin, bara - bara eydiz wirusini özige yuqturuwalghan.

Shangxeydiki bi'ologiyilik mehsulat tetqiqat orgini aldida naraziliq bildürüwatqan qan'ghaq késili bimarlirimu del mushu tetqiqat orgini ishlepchiqqan qan mehsulatini dawamliq ishletkendin kéyin, eydiz wirusi bilen yuqumlan'ghan iken.

Chékidin ashqan mes'uliyetsizlik

Radi'omizning ziyaritini qobul qilghan shangxeyge bérip mezkur naraziliq bildürüsh herikitige qatnashqan xunenlik bir bimar mundaq dédi:

"Men shangxeydiki bu bi'ologiyilik mehsulat tetqiqat orgini aldigha kelginimde sa'et 12 yérim etrapida bolup, 9 ölke we sheherlerdin kelgen 23 neper bimar we ularning a'ilisidikiliri mezkur idarining yighin zalida naraziliq bildürüp, qutquzush puli telep qiliwatqan idi. Chünki bizdek qan'ghaq késilige giriptar bolghan bimarlar doxturgha körünüshte, meyli tekshürüsh jehette bolsun yaki dawalash jehette bolsun, her zaman öz yénimizdin heq tölep dawalinimiz. Dawamliq pütün chiqimni özimiz chiqirimiz. Buni az dep biz nurghun pul xejlep sétiwalghan mezkur tetqiqat orgini ishlepchiqarghan dorini ishletkendin kéyin, qan toxtash bir yaqta tursun, eksiche téximu asan qan chiqidighan bolup qaldi. Shangxey bi'ologiyilik mehsulat tetqiqat orgini bu ishning addiy bir ish emeslikini obdan bilidu. Ular yüz bergen weqelerni ün - tinsiz étirap qilghini bilen, mes'uliyetni öz üstige élishni xalimaywatidu. Ular hazir "bundaq bolushi dölet bilen munasiwetlik, biz u dorilarni qanuniy resmiyetler boyiche ishlepchiqarghan. Shunga qutquzush we tölem puli telep qilmaqchi bolsanglar, yuqirigha béringlar yaki bolmisa yerlik hökümet orunliridin telep qilinglar' dep mes'uliyetni öz üstige alghili unimaywatidu "

Radi'omizning ziyaritini qobul qilghan ken famililik bu bimar naraziliq bildürgüchilerning, shangxey bi'ologiyilik mehsulat tetqiqat orgini teripidin bérilgen bu jawabni anglighandin kéyin, ghezepke chidimay téximu keskin we shiddetlik heriketlerni qollan'ghanliqini bildürdi. U mundaq dédi:

" Shuning bilen biz, bi'ologiyilik mehsulat tetqiqat orginining derwazisi aldida 'hayatimni qayturup ber! yolsizliq qilma! ' dégendek mezmundiki lozunkilarni kötirip, ünimizning bariche shu'ar towlap, namayish qilduq. Birdemdila saqchilar peyda boldi. Ular amalining bériche, bizning derwaza etrapidin yiraqlishishimizni tosidi ".

Biz bu heqtiki ehwalni téximu éniq igilesh üchün, shangxey bi'ologiyilik mehsulat tetqiqat orginigha téléfon qilduq. Lékin téléfonni alghan tetqiqat orgini bashliq ishxanisidikiler özlirining bu heqte birge héchqandaq melumat bérelmeydighanliqini bildürdi.

Mezkur naraziliq bildürüsh namayishidin burun, her qaysi ölkidin kelgen bimarlar shangxey bi'ologiyilik mehsulat tetqiqat orgini üstidin shangxey sheherlik sot mehkimisige erz sun'ghan. Lékin yéngilgen. Shuning bilen shangxeydiki her qaysi sot mehkimiliri bu diloni qobul qilishni ret qilghan.

Hökümet mes'uliyettin özini qachurmasliqi kérek

Béyjingdiki ey jishin tetqiqat orgini her zaman eydiz bimarlirining menpe'etini birinchi orun'gha qoyup kelgen. Mezkur teshkilat mes'uli wen yenxey hökümet orunlirining buxil pozitsiyisini qattiq tenqid qildi. U mundaq dédi:

" Bu mesilige kelgende, hökümet özini qachurmasliqi kérek idi. Hazir meyli qandin yasilidighan mehsulatlarni ishlepchiqiridighan zawutlar bolsun yaki kishilerge qan sélish arqiliq eydiz wirusini yuqturup qoyghan sehiye orunliri bolsun, hemmisi dégidek mes'uliyetni öz üstige almay, mesilini keynige sürüp kelmekte. Menche, bir döletning ammiwi saqliqni saqlash mesiliside, bundaq pozitsiyide bolishi bekmu qamlashmighan bir ish. Ular zadi némini oylaydighandu?! iqtisadiy jehettin ziyan tartip qélishni oylamdighandu ? eger shundaq bolsa, aqiwette téximu chong apetke yoluqidu ". (Méhriban)