Xitay metbu'ati kompartiye üchün mulazimette bolmaqta

• Muxbirimiz méhribanning bu heqtiki toluq melumati
• Download story audio

Xitay hökümitining axbaratqa bolghan kontrolluqi yildin -yilgha kücheymekte. Xelq'ara muxbirlar teshkilatining xelq'ara metbu'at mesilisi heqqide élan qilghan 2006 ‏- yilliq doklatida " xitay dunya boyiche axbarat erkinliki eng nachar bolghan döletlerning biri" dep körsitilgen. Bu qétim béyjingda échilghan memliketlik axbaratchilar qurultiyida, xitay hökümitining " metbu'at kompartiyining "inaq jem'iyiti " üchün xizmet qilishi kérek " dep tekitlishi memliket ichi we sirtidiki mutexessislerning diqqitini téximu bek qozghighan.

Fransiye agéntliqi teripidin bérilgen melumatta "xitayda, metbu'at pütünley hökümetning kontrolluqida bolmaqta. Béyjingda échilghan bu qétimqi qurultaydin kéyin, xitay hökümitining metbu'atqa bolghan kontrolluqi gep yoq téximu bek küchiyidu" dep körsitilgen.

Xitay kompartiyisi teripidin ishtin boshitiliwitilgen, ilgiri xitay yashlar gézitining muxbiri bolup ishligen li datung muxbirlarning teqdiri we inaq jem'iyet otturisidiki munasiwet heqqide toxtilip "bu xil inaqliq pütünley xitay kompartiyisining aliqinida bolup qalghan. Chünki ular her zaman xiyaligha kelgenni qilidu, ular qachan adem tutqisi kelse shu chaghda tutidu. Atalmish ' inaq jem'iyet' dégini pütünley qoruq gep" dep bildürdi.

Béyjing uniwérsitéti axbarat institutining proféssori jyaw gobyaw ependi fransiye axbarat agéntliqigha "xitayning en'enisi shuki, metbu'at ezeldin hakimiyet béshida turghuchilarning kaniyi bolup kelgen. Bu qétimqi yighinda otturigha qoyulghan telepni kompartiye teripidin bérilgen derhal ijra qilishqa tégishlik bir wezipe, dep qarisaq bolidu " dégen.

Amérikining nyu york ishtatida turushluq Uyghur ziyaliysi ilshat ependi ziyaritimizni qobul qilip, xitayning tarixtin buyan metbu'atqa bolghan kontrolluqi, xitay kompartiyisining 2005 ‏- yilidin buyanqi metbu'atqa bolghan kontrolluqi we Uyghur élidiki metbu'at mesilisi heqqidimu toxtaldi. (Méhriban)